வேதமடி நீ எனக்கு – மகரிஷி

அனைத்து பதிவுலக நண்பர்களுக்கும் இனிய காலை வணக்கம்.  இந்த நாளை, பூமி பற்றி அதர்வண வேதத்தில் வரும் ஒரு ஸ்லாகத்தின் அர்த்தத்துடன் ஆரம்பிக்கலாம்.

நீ பெரியவள், நீ பெரிய வசதியுள்ளவள். உனது குலுக்கலும் கலக்கலும் நடுக்கமும் மகத்தானவை. நாங்கள் எழும்போதும் உட்காரும் போதும், நிற்கும்போதும், தாங்கும்போதும், தரையில் கால்கள் தடுமாறாமல் இருக்க வேண்டும். நிலமே உன்னிடத்தில் இருப்போர், நோய்கள் விலகி, துன்பங்கள் விலகி , தீர்க்க ஆயுளுடன் இருக்க நாங்கள் பணிசெய்வோம்! தாயே! தரணி மாதாவே! நீ என்னை க்ஷேமமாக வைத்திரு. செல்வத்திலும் புகழிலும் நிலைக்க வை. [பூமி (12-1, 18, 28, 62, 63)]

****

கொரோனா தந்த இந்த வீட்டுச் சிறை நாட்கள் எல்லோரையும் கொஞ்சம் படுத்திக் கொண்டிருக்கிறது. பலரும் இணைய வழி, அலைபேசி வழி எதையாவது அனுப்பிய வண்ணமே இருக்கிறார்கள் – சில வாட்ஸப் குழுக்களில் சண்டை வேறு நடக்கிறது – இதை அனுப்பலாம், இதை அனுப்பக்கூடாது என தொடரும் யுத்தம் – வீட்டுக்கு வீடு என்பது போல குழுவுக்குக் குழு யுத்தம் நடைபெற்றுக் கொண்டிருக்கிறது.  நல்ல பயனுக்காக ஆரம்பிக்கப்பட்ட வாட்ஸப் குழுக்கள் தட்டுத் தடுமாறிக் கொண்டிருக்கின்றன – ஒவ்வொரு நாளும் காணொளிகளும், தகவல்களும், மீம்ஸ்களும் மழைபோல பொழிந்து கொண்டே இருக்கின்றன.  அதுவும் ஒரே காணொளி எல்லா குழுக்களிலும் வருகிறது – அதுவும் சில குழுக்களில் ஒரே காணொளி வெவ்வேறு பயன்பாட்டாளரால் மீண்டும் அதே குழுவில் வருகின்ற போது எரிச்சல் மட்டுமே மிச்சமாகிறது.  இரண்டு நாட்களாக அலைபேசியைப் பயன்படுத்துவதை நான் மிகவும் குறைந்திருக்கிறேன்.  புத்தகங்களை படிக்க ஆரம்பித்து இருக்கிறேன் – கிண்டில் வழியேயும், புத்தகமாகவும்.  அப்படிப் படித்த ஒரு புத்தகத்தினைப் பற்றி இன்றைக்கு பார்க்கலாம்!

சமீபத்தில் சென்னையில் புத்தகக் கண்காட்சி நடைபெற்ற சமயத்தில் தில்லி நண்பர் ஒருவர் சென்னை சென்றிருந்தார் – அலுவல் சம்பந்தமாக! அவர் புத்தகக் கண்காட்சிக்குச் சென்றபோது அங்கேயிருந்து அலைபேசியில் அழைத்து புத்தகங்கள் ஏதும் வாங்கிக் கொண்டு வரவேண்டுமா எனக் கேட்டிருந்தார்.  நான் சொன்ன புத்தகங்கள் கிடைக்காததால் வாங்கவில்லை. அவராகவே ஒரு புத்தகம் வாங்கிக் கொண்டு வந்திருந்தார். அவர் படித்து முடித்ததும் என்னிடம் படிக்கத் தந்தார் – அவர் தந்து சில நாட்கள் ஆனபோதும் ஏனோ படிக்கவே தோன்றவில்லை.  அவர் வாங்கிக் கொண்டு அந்த புத்தகம் எழுத்தாளர் மகரிஷி அவர்களின் “வேதமடி நீ எனக்கு” என்ற தலைப்பு கொண்ட புத்தகம்.  மகரிஷி என்றதும் எனக்கு வேதாத்ரி மகரிஷி நினைவுக்கு வந்தார். அவர் எழுதிய புத்தகம் இல்லை இது. இந்தப் புத்தகத்தினை எழுதிய மகரிஷி தமிழ்நாடு மின்சார வாரியத்தில் பணியாற்றிய திரு பாலசுப்ரமணியன் என்ற இயற்பெயரைக் கொண்டவர்.  இது வரை நான் இவரது புத்தகங்களைப் படித்ததில்லை.  அவரைப் பற்றி இணையத்தில் தேடும்போது இப்படியான அறிமுகம் கிடைத்தது:

தமிழ் இலக்கிய உலகில் தமிழ் வாசகர்களிடையே நன்கு அறிமுகமான பெயர் மகரிஷி. மனித வாழ்வை மேம்படுத்தும் தமிழ்ப் புதினங்களை ஐம்பதாண்டுகளாக வாசகர்களுக்குத் தந்து கொண்டிருக்கும் எழுத்துச் சித்தரான இவர் இலக்கிய உலகில் தனக்கென ஒரு இடத்தைத் தக்க வைத்துக் கொண்டவர். மனித வாழ்க்கையை படம் பிடித்துக் காட்டும் நாவல்கள் மட்டுமின்றி சிறுகதைகள், கட்டுரைகள் எழுதி தனிமுத்திரை பதித்தவர். மரபுவழிச் சிந்தனாவாதியான இவரின் பல படைப்புகள் கல்லூரிகளில் பாடமாகவும், பல்கலைக் கழகங்களில் ஆய்வுப் பட்டங்களுக்கு கருப்பொருளாகவும் அமையப் பெற்றவையாகும். “வேதமடி நீ எனக்கு” என்ற இந்த வாழ்வியல் புதினம், திரு. மகரிஷி அவர்களின் 70வது. படைப்பு ஆகும். இந்த நூல் தமிழ்வாசகர்களுக்கு ஒரு நல்ல விருந்து.

சரி அலைபேசியை அப்புறம் வைத்து விட்டு இந்தப் புத்தகத்தினை படித்து விடலாம் என எடுத்த போது முன்னுரையிலும் தெரிந்தது – இப்புத்தகம் திரு மகரிஷி அவர்கள் எழுதிய 70-ஆவது புத்தகம் என! நிறைய வாசித்தவர்களான ஜீவி ஐயா போன்றவர்கள் என்னை மன்னிக்க… என்னைப் போன்றவர்கள் படித்த புத்தகங்கள் மிகக் குறைவே. அதுவும் பிடித்த சில எழுத்தாளர்களை மட்டுமே வாசிக்கிறவர்கள்.  அதர்வண வேதத்தின் பெருமைகளையும், மந்திர சக்தியால் பல நல்ல விஷயங்களைச் செய்ய முடியும் என்பதையும் சிறப்பான கதை மூலம் சொல்லிச் செல்கிறார் ஆசிரியர்.  மந்திர சக்தி எங்கே தவறாக பயன்படுத்தப் படுமோ என்ற பயத்திலேயே பல விஷயங்களை அடுத்த தலைமுறைக்குக் கடத்தாமல் விட்டு விட்டார்களோ என்ற ஐயமும் எனக்கு ஏற்பட்டது.   ஒரு சிலர் இந்த மந்திரங்களைப் பயன்படுத்தி பில்லி, சூனியம் போன்ற கெடுதல்களையும், அடுத்தவர்களுக்குத் தீங்கு விளைவிக்கும் செயல்களையும் செய்வதையும் கதையிலேயே சொல்கிறார் ஆசிரியர். 

மங்கம்மா பாட்டி என்ற மூதாட்டி – தான் தனது அக்காவிடமிருந்து கற்ற மந்திர சக்தி கொண்டு நல்ல செயல்களை மட்டுமே செய்கிறார் – அதுவும் எந்த வித எதிர்பார்ப்பும் இல்லாமல் செய்கிறார் – மந்திர சக்தியை தனது சொந்த வாழ்க்கையை உயர்த்திக் கொள்ள அவர் ஒரு போதும் பயன்படுத்துவதில்லை! அதில் அவருக்கு ஈடுபாடும் இல்லை.  அவரும் அவருடைய மகள் வழி பேத்தி மட்டுமே அவர்கள் குடும்பத்தில்.  மகளும் மருமகனும் ஒரு விபத்தில் இறக்க சிறு குழந்தையாக இருந்த பேத்தியை கஷ்டப்பட்டு வளர்க்கிறார்.  திருமணங்களில் பக்ஷணங்கள் செய்து கொடுப்பதில் வரும் வருமானத்தில் தான் ஓடுகிறது வாழ்க்கை.  பன்னிரெண்டாம் வகுப்பு வரை படித்து வீட்டில் சும்மா இருந்த பேத்தியான கோமு, மில் வேலைக்குச் செல்கிறார்.

அங்கே கோமு என்ன பிரச்சனைகளைச் சந்திக்கிறார், மில் முதலாளிக்கு யாரோ செய்த பில்லி சூனியத்தால் கால்கள் செயலிழந்து போயிருக்க, தனது பாட்டி மூலம் அவரது கால்களைச் சரியாக்குகிறார், அதன் பின்னர் மில்லில் இவருக்குக் கிடைக்கும் பதவி உயர்வு, மில்லில் இருக்கும் வில்லன் ஆன தர்மாவின் உபத்திரவங்கள், மில் முதலாளியின் அப்பா செய்த தவறுகள், முதலாளிக்கு கோமு மீது உண்டான காதல், வேதங்கள் கற்றுக் கொள்ளும் கோமு, வேதங்கள் வழி நல்ல விஷயங்களைச் செய்யும் மங்கம்மா பாட்டி என பல விஷயங்களை கதையில் வருகின்றது.  இதற்கிடையே மங்கம்மா பாட்டியின் இளமைக் கால கதையும் தெரிய வருகிறது – மன்னார்குடியிலிருந்து ஒரு இரவில் தனது அக்கா மற்றும் பெண்ணுடன் யாருக்கும் தெரியாமல் வெளியேறியது, அதற்கு என்ன காரணம், சொந்தமான ஜனகன் எனும் கதாபாத்திரம், அவருடைய பிரச்சனைகள், மந்திர சக்திகள் மூலம் அதனை அவர் எதிர்கொள்ளும் விதம் என பலவும் கதையில் வருகிறது. 

கோமு மீது ஜனகனுக்கும் ஆசை, முதலாளி கேஷவ்-க்கும் ஆசை.  ஜனகனின் பிரச்சனைகள், தர்மாவினால் கோமுவுக்கும், கம்பெனி முதலாளிகளுக்கும் உண்டான பிரச்சனைகள், அவற்றை தீர்க்க முடிந்ததா என்பதையும் கடைசியில் கோமு யாரைத் திருமணம் செய்து கொண்டார் போன்ற பல முடிச்சுகளை கதையில் கொஞ்சம் கொஞ்சமாக விடுவித்துக் கொண்டே வருகிறார் ஆசிரியர்.  நடுவில் வேதம் பற்றியும் நிறைய விஷயங்களை வாசகர்களுக்குச் சொல்லிக் கொண்டு வருகிறார்.  சில பகுதிகள் சற்றே நீளமாகப் போவது போல இருந்தாலும், ஸ்வாரஸ்யத்திற்குக் குறைவில்லை.  240 பக்கங்கள் கொண்ட இந்தப் புத்தகத்தின் விலை 150/- ரூபாய். செண்பகா பதிப்பகத்தின் வெளியீடு.  இவரது கதைகள் திரைப்படமாகவும் எடுக்கப்பட்டு இருக்கிறது என்கிற தகவலை விக்கி மூலமாகவே தெரிந்து கொண்டேன் – அப்படி எடுக்கப்பட்ட படங்கள் – பத்ரகாளி, வட்டத்துக்குள் சதுரம், நதியைத் தேடி வந்த கடல், புவனா ஒரு கேள்விக்குறி – போன்றவை.  படங்களைக் கேள்விப்பட்டிருந்தாலும், எழுத்தாளரைத் தெரிந்து கொள்ளாமல் இருந்திருக்கிறேன் என்பதில் வெட்கப்படுகிறேன்!

புத்தகம் வாசிக்க நினைப்பவர்கள், இந்தப் புத்தகத்தினை இணையம் வழியேயும் வாங்கிப் படிக்கலாம்.  நண்பர்களே, இந்த நாளின் பதிவு பற்றிய உங்கள் கருத்துகளை பின்னூட்டத்தில் சொல்லுங்களேன். விரைவில் வேறு ஒரு பதிவுடன் மீண்டும் ச[சி]ந்திப்போம்...

நட்புடன்

வெங்கட்

புது தில்லி