ஃப்ரூட் சாலட் – 21: – குழந்தைகள் தினம்/உலக நீரிழிவு தினம் – வாயில் புடவை

இந்த வார செய்தி: 

Eshaan Shevate எனும் சிறுவனுக்கு Type 1 நீரிழிவு நோய் இருக்கிறது கண்டுபிடிக்கப்பட்ட போது அவனுக்கு வயது 14. நோய் வந்ததற்குக் கூட கவலைப்படவில்லை சிறுவன். ஆனால் அவனால் ஒரு வருடத்திற்கு நீந்த முடியாது என்பதைத் தான் அவனால் தாங்கிக் கொள்ள முடியவில்லையாம்.

ஐந்து வயது முதல் நீச்சல் கற்றுக்கொண்டு பல போட்டிகளில் வென்று பதக்கங்கள் பெற்ற சிறுவன் ஏழாம் வகுப்பில் படித்துக் கொண்டிருந்தபோது உடல் நிலை சரியில்லாது போய்விட்டது. என்ன ஏது என புரியாது மருத்துவர்களைச் சந்தித்து, பரிசோதனைகளுக்குப் பிறகு, சிறுவனுக்கு நீரிழிவு நோய் இருப்பது கண்டுபிடிக்கப்பட, சிறுவனுக்கும் பெற்றோர்களுக்கும் பலத்த அதிர்ச்சி.

குழந்தையாக இருக்கும்போது வைரஸ்களால் கணையங்கள் தாக்கப்பட்டு பல சிறுவர்களுக்கு நீரிழிவு நோய் உண்டாகிறது என்கிறார்கள் மருத்துவர்கள். நாள் ஒன்றுக்கு நான்கு முறை இன்சுலின் ஊசி போட்டுக்கொள்ள வேண்டியிருக்கிறதாம்.

Eshaan Shevate, ஒரு வருட ஓய்வுக்குப் பிறகு சிறிது சிறிதாக பயிற்சியில் ஈடுபட்டு, இப்போது மாநில அளவிலான நீச்சல் போட்டிகளில் கலந்து வெற்றி பெற ஆரம்பித்து இருக்கிறாராம். மன உறுதியோடு நீரிழிவு நோயை எதிர்த்து போராடி வெற்றி பெற்று வரும் இச்சிறுவனுக்கு Diabetes Care and Research Foundation நிறுவனம் பரிசு அளிக்க இருக்கிறார்கள்.

அவரது விடாமுயற்சிக்கும் தன்னம்பிக்கைக்கும் ஒரு பூங்கொத்து!

இந்த வார முகப்புத்தக இற்றை:

தேவைக்கு மேலே பொருளும், திறமைக்கு மேலே புகழும் கிடைத்துவிட்டால் பார்வையில் படுவதெல்லாம் சாதாரணமாகத்தான் தோன்றும்.

இந்த வார குறுஞ்செய்தி: 

நட்பு என்பது கைக்கும் கண்களுக்கும் உள்ள உறவைப் போல இருக்க வேண்டும் – கையில் அடிபட்டால் கண்கள் அழும்.  கண்கள் அழுதால் கைகள் துடைக்கும்!

ரசித்த புகைப்படம்:  இவர்களின் அன்பை என்னவென்று சொல்ல!

ரசித்த பாடல்:  ”சொல்லாயோ வாய்திறந்து” மோகமுள் படத்திலிருந்து. சிறப்பான இப்பாடலை இந்த வாரத்தின் ரசித்த பாடலாய் பகிர்ந்திருக்கிறேன் நீங்களும் ரசிக்க!

ராஜா காது கழுதைக் காது

தில்லியிலிருந்து திருச்சி வந்து கொண்டிருந்தபோது ரயிலில் ஒரு புதுமணத் தம்பதியும் எதிர் இருக்கையில் அமர்ந்திருந்தனர். பயணத்தின் போது ஒரு வயதான பெண்மணி “Brainvita” மற்றும் சில விளையாட்டுப் பொருட்கள் விற்றபடி வர, நேரத்தினைப் போக்க, அந்தப் பெண் “Brainvita” வாங்கி விளையாட ஆரம்பித்தார். ”ஒரு கோலிகுண்டு மட்டுமே மீதமிருந்தால் வெற்றி பெற்றதாக ஆகும்” எனச் சொல்லி விளையாடி, அப்படி வெற்றி பெற்றால், அப்பெண்ணின் கணவர் 100 ரூபாய் தரவேண்டும் என அவர்களுக்குள் பந்தயம்.  பெண் விளையாடி வெற்றி பெற, கணவரிடம் பணம் கேட்டபோது, “நீ போங்கு ஆட்டம் ஆடறே” என மறுக்க, அப்பெண் சொன்னது – “நம்புப்பா! நான் சரியாதான் ஆடினேன். நம்பிக்கைதான் Life-ஏ!”

படித்ததில் பிடித்தது:

ஒரு நண்பரின் வீட்டிற்குக் கி.வா.ஜ. சென்றாராம். நண்பர் ஒரு அடுக்குமாடியில் குடியிருந்தார். புடவை உலர்த்துவதற்கு வெய்யில் படுகிற வகையில் வசதியான இடம் அந்த வீட்டில் இருக்கவில்லை. வாசல் பக்கத்தில் தான் வெய்யில் அடித்துக் கொண்டிருந்தது.

நண்பரின் மனைவி வாசல் கதவைத் திறந்து வைத்து வெய்யில் படும்படியாகத் துவைத்த புடவையை அதன் மேல் காயப் போட்டிருந்தார். புடவையைப் பார்த்துக் கொண்டே வீட்டிற்குள் நுழைந்த கி.வா.ஜ., “இது என்ன புடவை தெரியுமா?” என்று நண்பரைக் கேட்டார். “ஏன் சாதாரணப் புடவைதானே?” என்றார் நண்பர். ‘அல்ல இந்தப் புடவைக்கு ஒரு விசேஷச் சிறப்பு உண்டு. இதுதான் உண்மையான வாயில் புடவை!” என்றார் கி.வா.ஜ.

மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.