சூரஜ்குண்ட் மேளா போகலாம் வாங்க! – முதல் பகுதி

 மேளா அழைப்பிதழ்: பட உதவி: கூகுள்

தில்லியிலிருந்து ஆக்ரா செல்லும் போது தில்லியைத் தாண்டினால் ஃபரிதாபாத் வருவது உங்களில் பலருக்குத் தெரியும். அதுபோலவே தெற்கு தில்லியிலிருந்து எட்டு கிலோ மீட்டர் தொலைவில் அமைந்திருக்கும் ஒரு கிராமம் சூரஜ்குண்ட்.  இங்கே ஒவ்வொரு வருடத்தின் ஃபிப்ரவரி மாதம் ஒன்றாம் தேதி முதல் பதினைந்தாம் தேதி வரை மேளா நடைபெறும். இந்த வருடம் இருபத்தி ஏழாவது சூரஜ்குண்ட் க்ராஃப்ட்ஸ் மேளா நடைபெற்றுக் கொண்டிருக்கிறது.

இந்தியாவின் அனைத்து மாநிலங்கள் மற்றும் SAARC நாடுகளிலிருந்தும் நுண்தொழில் கலைஞர்கள் வந்து தங்களது கைவினைப் பொருட்கள், கைத்தறி, நறுமணம் கமழும் பொருட்கள், உணவு வகைகள் என அனைத்தையும் கிராமிய சூழலில் கடை விரிப்பார்கள். இந்த மேளா நடக்குமிடத்தில் நிறைய கருவேல மரங்கள், மரங்களுக்கு நடுவே மண்ணாலான மேடைகள் அமைக்கப்பட்டு, கோரைப் புல்லால் தயாரிக்கப்பட்ட மேற்கூரை என கிராமத்துக்குச் சென்ற ஒரு உணர்வு கிடைக்கும்.

தினமும் பல்வேறு மாநிலங்கள் மற்றும் நாடுகளிலிருந்து வந்திருக்கும் கலைஞர்கள் தங்களது இசை, நடனம் என நாட்டுப்புற நிகழ்ச்சிகளை நடத்தி வரும் காட்சியாளர்களை மகிழ்விப்பார்கள். அது தவிர தில்லி மற்றும் புறநகர் பகுதிகளில் இருக்கும் பள்ளி/கல்லூரி மாணவ/மாணவிகளும் கலைநகழ்ச்சிகள் நடத்துவார்கள்.

ஒவ்வொரு வருடமும் ஒவ்வொரு மாநிலத்தினை மேளாவின் கருப்பொருளாகக் கொண்டு மேளா நடக்கும். இந்த வருடத்தின் மேளாவின் மையக்கரு தமிழகத்தின் அண்டை மாநிலமான கர்நாடகம். சென்ற வியாழனன்று [07.02.2013] நானும் சில நண்பர்களும் சூரஜ்குண்ட் நுண்தொழில் மேளாவிற்குச் சென்றிருந்தோம்.

 

இங்கே தான் நுழைவுச்சீட்டு வாங்கணும். 

ஆளுக்கு அம்பது ரூபாய் என் கணக்கில் அனுப்பிடுங்க. நான் தான் உங்களை கூட்டிட்டு போறேனே...

தில்லியின் பல பகுதிகளிலிருந்தும் ஹரியானாவின் போக்குவரத்து நிறுவனம் பேருந்துகளை இயக்குவதால், சுலபமாக மேளா நடக்கும் சூரஜ்குண்ட் செல்ல முடியும். வீட்டின் அருகில் இருக்கும் சிவாஜி ஸ்டேடியம் பேருந்து நிலையத்திலிருந்து கிளம்பும் ஒரு பேருந்தில் [பயணக் கட்டணம் ரூபாய் 21] பயணித்து மேளாவினை அடைந்தோம். பேருந்து தவிர மெட்ரோ மூலமும் தனியார் வாகனங்கள் மூலமும் இவ்விடத்திற்குச் செல்லலாம். மேளா நுழைவுக்கட்டணமாக ரூபாய் ஐம்பது வசூலிக்கப் படுகிறது. இணையம் மூலமாகவும் நுழைவுச் சீட்டு பெற முடியும்.

 

ஈ Gate ண்ட பேரு எந்தா அறியோ? கோட்டையம்பலம்  Gate.... 

கோட்டையம்பலம் கேட்னு சொல்ல வராது இங்கத்திகாரங்களுக்கு. 

அதுனால கேரளா கேட்

பின்னாடி நீலச் சட்டை போட்டவரு ராட்டை சுத்தல...  

அவர் போக்கில நடந்து போறாரு!

இந்த மேளா நடக்கும் திடலுக்கு உள்ளே நுழைய ஷேகாவதி, கேரளா நுழைவாயில், தந்தேஷ்வரி, TRC நுழைவாயில் என மொத்தம் நான்கு வழிகள். நாங்கள் கேரளா நுழைவாயில் வழியே உள்ளே சென்றோம். கேரள நுழைவாயில் பக்கத்திலேயே ஒரு பெரிய நூல் நூற்கும் இராட்டையும் இருக்கிறது.

 ’நான் ரெடி.. நீங்க ரெடியா?’ கேட்கும் ஒட்டகம்

நுழைவாயிலில் இரண்டு ஒட்டகங்கள், மற்றும் குதிரை ஒன்றும் காத்திருக்கிறது. ஒட்டக சவாரி செய்ய ஆசையாக இருந்தால் நீங்கள் செய்யவேண்டியது ஒன்றுமில்லை – அங்கே சென்றால் போதும். சாதாரணமாக இது போன்ற இடங்களில் நம்மை ஒரு பெரிய மேடை மேலே ஏற்றி, அதன் அருகே நின்று கொண்டிருக்கும் ஒட்டகத்தின் மேல் அமர்த்துவார்கள். ராஜஸ்தானில் கீழே அமர்ந்திருக்கும் ஒட்டகத்தின் மேல் உங்களை அமர்த்தி ஒட்டகத்தினை மேலே எழுந்திருக்க வைப்பார்கள். அப்போது நீங்கள் கூச்சல் போடுவது நிச்சயம்! அவ்வளவு பெரிய ஒட்டகம் எழுந்திருக்கும்போது மேலும் கீழும் போனா எப்படி இருக்கும்!

 கிராமிய சூழலில் கடைகள்.

 விளக்கு அலங்காரங்கள்

உள்ளே நுழைந்ததும் ஒரு கிராமத்தினுள் சென்ற அனுபவம் உங்களுக்குக் கிடைக்கும். பலவிதமான பீங்கான் பொருட்கள், மரப் பொருட்கள், துணிகள், நுண்ணிய வேலைப்பாடு செய்யப்பட்ட பொருட்கள், விதவிதமான ஆடைகளில் பலதரப்பட்ட மக்கள் என காணும் பக்கமெல்லாம் காட்சிகள் உங்களைச் சுண்டி இழுக்கும்.

 

  விதவிதமான பொம்மைகள், பூ ஜாடிகள்.

இந்த மேளாவில் நான் கண்ட காட்சிகள், பார்த்த பொருட்கள், வாங்கிய பொருட்கள், உண்ட உணவு என்பது போன்ற விவரங்கள் அடுத்த பதிவுகளில் தொடரும்.....  சீக்கிரமே போட்டுடறேன் கவலைப்படாதீங்க!

இம்மேளா பற்றிய அடுத்த பதிவில் சந்திக்கும் வரை.....

நட்புடன்

வெங்கட்.

புது தில்லி.