ஃப்ரூட் சாலட் – 53 – ஷ்வேதா - இசக் தேரா... - மானசி

இந்த வார செய்தி:

ஷ்வேதா – வெகு விரைவில் கனவு நகரமாம் நியூயார்கில் உள்ள BARD COLLEGE-ல் சென்று மேற்படிப்பு படிக்க இருக்கிறார். வரும் ஆகஸ்ட் மாதம் இந்தியாவின் மும்பை நகரிலிருந்து செல்லும் இவர் ஒரு NGO ஏற்பாடு செய்த Scholarship மூலம் தான் மேற்படிப்பு படிக்க இருக்கிறார்.  அட வருஷம் பூரா, இப்படி நிறைய பேர் யு.எஸ்.-ல படிக்க போறாங்க, இதுல என்ன புதுசா இருக்கு?

ஷ்வேதா வளர்ந்த சூழலைக் கொஞ்சம் பார்க்கலாம். பாசமுள்ள தாய். தந்தை சிறுவயதிலேயே இறந்து விட, தாய் மறுமணம் புரிந்து கொள்கிறார். அவரோ குடிகாரர். ஷ்வேதாவினை துன்புறுத்த, அவரைத் தனது தந்தையாக ஏற்றுக்கொள்ள மனம் மறுக்கிறது. தாய் பக்கத்தில் உள்ள அலங்கார விளக்குகள் தயாரிக்கும் தொழிற்சாலையில் வேலை செய்து கொண்டு வரும் பணம் கொஞ்சமானாலும் அதிலும் தனது குழந்தைகளுக்குக் கல்வி தரும் உன்னதமானவள். இந்த குடும்ப சூழலை விட கொடுமையானது அவள் இருக்கும் இடம்!

மும்பை பற்றி தெரிந்திருக்கிறதோ இல்லையோ, மும்பையின் சிவப்பு விளக்குப் பகுதியான காமத்திப்புரா பற்றி பலருக்கும் தெரியும். அப்படிப்பட்ட காமத்திப்புராவில் தான் இருக்கிறது ஷ்வேதாவின் வீடு. அந்த பெரிய வீட்டின் மற்றபகுதிகளில் வெறிபிடித்த மனிதர்களின் காம இச்சைகள் தீர்க்கப்பட, பள்ளிக்குச் செல்லும்போது இவரையும் தொந்தரவு செய்த நாட்கள் ஏராளம்.

அதுவும் மாலை வேளைகளில் படிக்க உட்காரும்போது, அந்த கட்டிடத்தின் சில பகுதிகளிலிருந்து வரும் சத்தங்களும், வெறிபிடித்தவர்களின் கூச்சல்களும் இருக்க அந்த சூழ்நிலையில் படிக்க நினைத்த ஷ்வேதா, தற்போது க்ராந்தி எனும் NGO உதவியோடு 10+2 வரை முடித்து விட்டார். அடுத்தது கல்லூரி படிப்பு தான். அதுவும் அமெரிக்க கல்லூரியில் படிப்பது மற்றவர்களுக்கும் பயனுள்ளதாக இருக்க வேண்டுமென நினைக்கிறார் ஷ்வேதா.

அமெரிக்க கல்லூரியில் மனம் பற்றிய உளவியல் துறையில் பட்டம் பெற்று, தான் வளர்ந்த பகுதியான காமத்திப்புராவில் இருக்கும் மக்களுக்குக்காக வேலை செய்யவேண்டும் என்ற எண்ணத்தோடு அமெரிக்கா செல்ல இருக்கும் ஷ்வேதாவினை எல்லா வித வெற்றியும் பெற வாழ்த்தி வழி அனுப்புவோம்....

  

இந்த வார முகப்புத்தக இற்றை:

கடைசி மரமும் வெட்டுண்டு,

கடைசி நதியும் விஷமேறி,

கடைசி மீனும் பிடிபட,

அப்பொழுது தான் உறைக்கும்.....

..

..

..

பணத்தை சாப்பிடமுடியாதென!

இந்த வார குறுஞ்செய்தி: 

IT’S HARD TO BE A WOMAN – YOU MUST THINK LIKE A MAN; ACT LIKE A LADY; LOOK LIKE A YOUNG GIRL; AND WORK LIKE A HORSE!

ரசித்த காணொளி: 

சாதாரணமாக தில்லியில் பள்ளிகள் வெகு சீக்கிரத்தில் திறந்துவிடுவார்கள். 06.45 - 07.15 மணிக்குள் பள்ளிக்கு அழைத்துச் செல்ல பள்ளியின் பேருந்து வந்துவிட, குழந்தையை அவர்களது பாதி தூக்கத்தில் எழுப்பி விடுகிறோம். இப்படி பாதி தூக்கத்தில் எழுந்து சென்ற குழந்தை பள்ளியில் எப்படி படிக்கும்? சுறுசுறுப்பாய் இருக்கும்? தூங்கி வழியத்தான் செய்யும் இந்த ”மானசி” யைப் போல! நீங்களும் பாருங்களேன்! [நன்றி அனன்யா....  முகப்புத்தகத்தில் பகிர்ந்ததற்கு!]

ரசித்த புகைப்படம்:

இயற்கையிலேயே இவருக்கு ஒய்யாரக் கொண்டையாம்! என்ன அழகு. கொக்கு வகையைச் சார்ந்த இவரைப் பார்க்கும்போதே பிடிச்சுருக்கு இல்லையா!

தொலைக்காட்சி:

சோனி மிக்ஸ் தொலைக்காட்சியில் எப்போதும் பாடல் ஓடிக்கொண்டிருக்கும். நேற்று ஒரு பாடல் பார்த்தேன். பார்த்ததும் பிடித்துவிட்டது! ”இசக் தேரா” எனும் படத்தின் டைட்டில் சாங்... பாட்டு ஆரம்பிக்கும்போது நாயகனும் நாயகியும் செய்யும் முகக் கோணல் சேஷ்டை! ”நன்றாக இருக்கும் முகத்தினை இப்படியும் செய்து கொள்ள முடியுமா?” என நினைக்க வைத்தது. ஆனாலும் பாடல் படம்பிடிக்கப்பட்ட இடங்களும் விதமும் ரசிக்க வைத்தன. நீங்களும் ரசியுங்களேன்!

படித்ததில் பிடித்தது!:

உன்னோடு பேசாமல்

என்னால் இயல்பாக

வாழ முடியவில்லை

அதனால் தான்

தினமும் எனக்கு நானே

பேசிக்கொள்கிறேன்

உன்னுடன்

பேசுவதாக நினைத்து!

-          இணையத்தில் படித்தது. [மனதில் தோன்றியது.... பார்த்துப்பா!, தனியா பேசுனா யாராவது தப்பா நினைச்சுடப் போறாங்க!]

என்ன நண்பர்களே இந்த ஃப்ரூட் சாலட்-ஐ ரசித்தீர்களா? மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.