ஃப்ரூட் சாலட் – 58 – சுதந்திரம் – ரோஜா - தனிமை

இந்த வார செய்தி:

சஞ்சீவ் சச்தேவா – தனது 20 வயதிலிருந்து தசை பிரச்சனைகளால் நடக்க முடியாது போக சக்கர நாற்காலியில் உட்கார்ந்து கொள்ள வேண்டிய நிலை.  எங்கு செல்ல வேண்டுமானாலும் மற்றவர்களை எதிர்பார்க்க வேண்டிய சூழல். ஒரு ஒன் பாத்ரூம் போகணும்னா கூட வண்டியில் வைத்து தள்ளிக்கொண்டு ஒருவர் கொண்டு விட வேண்டும் எனும் நிலை.  இதையெல்லாம் முடிவுக்குக் கொண்டு வந்தது 27 ஜுன் 2011....  [அட 27 ஜூன்..... என் பிறந்த தேதி!].

அன்று தான் இவர் ஒரு பேட்டரி மூலம் இயங்கக் கூடிய சக்கர நாற்காலியை வாங்கினாராம். அதிலிருந்து எங்கு செல்ல வேண்டுமானாலும் தன்னால் தனியாக செல்ல முடிகிறது என சந்தோஷத்தோடு சொல்கிறார். ஒரு முறை CHARGE செய்து கொண்டால் ஐந்து மணி நேரம் வரை பயணம் செய்ய முடிகிறது என்பதால் சுலபமாக நினைத்தபோது மெட்ரோவில் பயணம் செய்து தில்லியில் பல இடங்களுக்குச் சென்று வரும் இவரும் இவரைப் போன்ற 15 மாற்றுத் திறனாளிகளும் சேர்ந்து WHEELCHAIR FLYING CLUB என்ற ஒரு அமைப்பினை ஆரம்பித்து இருக்கிறார்கள்.

இவர்கள் அனைவரும் சென்ற சுதந்திர தினம் அன்று தங்களது சக்கர நாற்காலிகளில் இந்தியா கேட் பகுதிக்கு தானாகவே வந்து தங்களது சுதந்திரத்தினைக் கொண்டாடியுள்ளார்கள்.  இந்த வருடமும் சில இடங்களுக்கு சென்று வந்து இருப்பதைப் பகிர்ந்து கொள்ளும் போது அவர்களது முகத்தில் தெரியும் மகிழ்ச்சி....  அளவிற்கரியது.....

சுதந்திரமாய் காற்றை ஸ்வாசிக்கும் இவர்களைப் போலவே மற்ற மாற்றுத் திறனாளிகளுக்கும் இந்த சுதந்திரம் கிடைக்கட்டும்.  செய்தியை ஹிந்து நாளிதழின் வலைத்தளத்தில் படித்த போது உங்களுடன் பகிர்ந்து கொள்ளத் தோன்றியது.

இந்த வார முகப்புத்தக இற்றை:

DON’T FORCE ANY ONE TO LOVE YOU. FORCE THEM TO LEAVE YOU….. AND WHOEVER INSISTS TO STAY IS THE ONE WHO TRULY LOVES YOU!

இந்த வார குறுஞ்செய்தி: 

DON’T LET NEGATIVE AND TOXIC PEOPLE RENT SPACE IN YOUR HEAD FOR THEIR SELFISH ATTITUDE. RAISE THE RENT AND KICK THEM OUT FROM YOUR HEAD…..

ரசித்த காணொளி: 

சில விளம்பரங்களைப் பார்க்கும் போதே மனதுக்குப் பிடித்து விடும்.  ஐடியா மொபைலின் சில விளம்பரங்களைப் போல! அவர்களது நெட்வொர்க் வேலை செய்யுமா செய்யாதா என்பது வேறு விஷயம்! அதே போல இந்த விளம்பரம் பார்த்த உடன் பிடித்துப் போன ஒரு விளம்பரம்.  பாருங்களேன்! 

 

ரசித்த பாடல்:

ரோஜா படத்திலிருந்து “புது வெள்ளை மழை இங்கு பொழிகின்றது” பாடல் நான் ரசித்த பாடல்களில் ஒன்று. இதோ உங்கள் ரசனைக்கு.... அந்த வெள்ளைப் பனிமலையில் வீழ்ந்துவிடமாட்டோமா என்று தோன்றும் பல சமயங்களில்....

ராஜா காது கழுதை காது:

நேற்று ஒரு இசை விழாவிற்குச் சென்றிருந்தேன். கார்த்திக் ஞானேஸ்வர் எனும் இளைஞர் சென்னையிலிருந்து வந்து பாடல்கள் பாடினார். மிகச் சிறப்பாக பாடினார். எனது பக்கத்தில் அமர்ந்திருந்த ஒரு பல்லில்லாத பாட்டி, மேடைப் பக்கத்திலிருந்து வருபவர்கள் அனைவரிடமும் சொன்னது “புரந்தரதாசரோட புரந்தர விட்டல் பாட்டு பாடச் சொல்லும்மா......  சொல்லுப்பா...” ஒருவரும் சொல்லாதுவிட, அவரே சத்தமாக புரந்தர விட்டலா எனப் பாட ஆரம்பித்து விட, பாடகரும் பாண்டுரங்கா விட்டலா எனப் பாடி அவரை சந்தோஷப் படுத்தினார். ”பாண்டுரங்கா கோஷம் அதிகமாக அதிகமாக, பாட்டி அப்படியே இசையென்னும் இன்ப வெள்ளத்தில் மூழ்கிவிட்டார். பாட்டிக்கு எவ்வளவு வயசு இருக்கும்னு நினைக்கறீங்க? ரொம்ப அதிகமில்லை...  90 வயசு தான்!   

படித்ததில் பிடித்தது!:

”உறவு என்பது வெப்பம். தனிமை குளிருக்கு எதிராய், இதமாய் கிடைத்த வெப்பம். பனி நேரத்தில் நெருப்பு மீட்டி சுற்றி உட்கார பேசாது பாடாது இருக்க முடியாது. குரல் எழுப்பாமல் இருக்க இயலாது.

ஆனால் குளிர் பழகியவனுக்கு, குளிரே சுகம் என்பவனுக்கு பேசத் தோன்றியதில்லை. தானும் தன்னில் உணரும் குளிரும் அவனை இறுக்கமாக்கி விடுகின்றன. _______ தனிமைக் குளிர் பழகியவன். இளமையிலிருந்தே அந்த சுகம் தெரிந்தவன். இடையே பன்னிரண்டு வருடங்கள் அது பழக்கமாகி, பழக்கம் சாதாரணமாகவும் போய்விட்டது. இரண்டு மூன்று நாட்கள் யாரோடும் எது பற்றியும் பேசாது இருந்ததுண்டு. எந்த வன்முறையும் மனசுள் இல்லாமல், கட்டாயமில்லாமல் மௌனமாய் இருந்ததுண்டு.” 

இப்படிப் பட்ட தனிமையை அனுபவித்தது உண்டா?.....  அது சரி இந்த வரிகள் ஒரு நாவலிலிருந்து எடுக்கப்பட்டது. நாவலின் பெயரோ, எழுத்தாளர் பெயரோ சொல்ல முடியுமா? பின்னூட்டத்தில் சொல்லுங்களேன்!

  

என்ன நண்பர்களே இந்த ஃப்ரூட் சாலட்-ஐ ரசித்தீர்களா? மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.