க்ளீன் [B]போல்ட்[d]! – குறும்படம்

சில மாதங்களுக்கு முன்னர் ஒரு சில குறும்படங்களை உங்களுடன் பகிர்ந்து கொண்டது உங்களுக்கு நினைவிருக்கலாம். நடுவே சற்றே இடைவெளி. இனிமேல் ஒவ்வொரு புதன் கிழமையும் நான் ரசித்த ஒரு குறும்படத்தினை உங்களுடன் பகிர்ந்து கொள்ளலாம் என நினைத்திருக்கிறேன்.  இந்த வாரத்தின் குறும்படமாக க்ளீன் [B]போல்ட்[d]! எனும் குறும்படம்.

Excuse me Entertainers வெளியிட்டு இருக்கும் இப்படத்தில் சொல்ல வரும் விஷயம் சுவாரசியம் – வேறென்ன காதல்! முகப்புத்தகம் மூலம் ஒரு பெண்ணைப் பார்த்து அவரிடம் காதல் கொள்கிறார் கதாநாயகன்.....  காதலை அப்பெண் ஏற்க மறுத்தாலும் இவர் தொடர்ந்து காதலிக்கிறார்.  காதலியின் பிறந்த நாள் பரிசு வாங்க தன்னுடைய செயினை அடகு வைக்கும் அளவுக்கு காதல்!

பிறந்த நாளும் வந்தது. நண்பரிடம் செயினைக் கொடுத்து பரிசு வாங்கச் சொல்ல, அவரும் ஒரு வைர மோதிரம் வாங்கி வைத்திருக்கிறார்.  அதற்குள் கதாநாயகனின் அப்பா [சர்ஜன்] மூலம் ஒரு விஷயம் தெரியவருகிறது. அந்த பெண்ணே தனக்கு அவனை பிடிக்கிறது எனச் சொல்ல வரும்போது அந்த பெண்ணிடம் உனக்கு என்னைப் பிடிக்கவில்லை எனத் திட்டி விட்டு  வீட்டுக்கு வருகிறான்.

சரியான வில்லத்தனமான அப்பா – என்ன செய்து விட்டார் என்பதை பிறகு தான் பார்க்க வேண்டும்! கடைசியில் எழுத்து போட்டு விட்டார்கள் என எழுந்து சென்று விடாதீர்கள்! கடைசி வரை பாருங்கள் – ஒரு ட்விஸ்ட் வைத்திருக்கிறார் கடைசியில்! :)

உங்கள் ரசனைக்கு இதோ அந்த குறும்படம் - க்ளீன் [B]போல்ட்[d]! 

படம் பார்த்து நீங்களும் க்ளீன் [B]போல்ட்[d]! ஆகியிருப்பீர்கள் என நம்புகிறேன்!

மீண்டும் வேறொரு பகிர்வில் உங்களைச் சந்திக்கும் வரை.....

நட்புடன்

வெங்கட்.

புது தில்லி.