பேரைச் சொல்லவா? - குறும்படம்

சென்ற புதன் கிழமை அன்று தாகம் என்ற குறும்படத்தினை உங்களுடன் பகிர்ந்து கொண்டேன். இந்த வாரம் வேறொரு குறும்படம்.

ஒரு கிராமத்து இளைஞர் காட்டு வழியே வந்து கொண்டிருக்கிறார். ஒரு மரத்தின் அருகே வரும்போது காலில் முள் குத்தி விடுகிறது. அதே சமயத்தில் கொலுசு சத்தம் கேட்க, திரும்பிப் பார்க்கிறார். ஒரு பெண் நடந்து வந்து கொண்டிருக்கிறார். காலில் முள் குத்திய வலியினால் அதில் நினைவு செல்ல, அதற்குள் அந்தப் பெண்ணைக் காணவில்லை.

பார்த்தால் அவர் கால் அருகே அமர்ந்து “பார்த்து வரக்கூடாதா? முள் குத்திடுச்சு பாருங்க!” என்று முள்ளை எடுத்து விடுகிறார்!” பெண்ணின் மேல் ஆசை வந்து அவர் பேரைக் கேட்க, பேரை விடுகதையாகச் சொல்லி விட்டு செல்கிறார் அந்தப் பெண்.  ”பெயரைக் கண்டுபிடித்தால் என்ன தருவாய்?” என பெண்ணிடம் கேட்க, அந்தப் பெண் முத்தம் தருவதாகச் சொல்ல... ஒரு வித கிறக்கத்திலேயே வருகிறார் அந்த இளைஞர்.

படிக்காத அவர், படித்த அவரது நண்பரிடம் நடந்ததைச் சொல்லி, விடுகதையாகச் சொன்ன பெயர் “தேன்மொழி” எனக் கண்டுபிடித்து அவளிடம் சொல்ல, அடுத்த நாள் அந்த பெண் சந்தித்த இடத்திற்குச் செல்கிறார். அவள் வராது போகவே, அந்தப் பெண்ணின் ஊருக்குச் செல்கிறார். பெண்ணின் வீட்டினைக் கண்டுபிடிக்க முயல, அங்கே என்ன நடக்கிறது, அந்தப் பெண்ணிடம் பேரைச் சொன்னாரா இல்லையா? என்பதை சுவையாகச் சொல்லி இருக்கிறார் படத்தின் இயக்குனர்.....

இதோ நான் ரசித்த அந்த குறும்படம் – ”பேரைச் சொல்லவா” நீங்களும் ரசிக்க ஏதுவாய் இங்கே!

என்ன நண்பர்களே, குறும்படத்தினை ரசித்தீர்களா? அடுத்த புதன் அன்று வேறொரு குறும்படத்தினைக் காணலாம்!

மீண்டும் சந்திக்கும் வரை......

நட்புடன்

வெங்கட்.

புது தில்லி.