ஃப்ரூட் சாலட் – 79 – உலக அழகி – புல்லட் புஷ்பா - சிறுவர்கள்

இந்த வார செய்தி:

புற்று நோயால் பாதிக்கப்பட்ட பெண்களுக்கு Chemotherapy சிகிச்சை அளிக்கும்போது அவர்கள் தங்களது தலைமுடியை இழக்கிறார்கள்.  கூடவே தங்களது தன்னம்பிக்கையையும்.  பல பெண்கள் இதன் மூலம் வெளியே வரவே வெட்கப்பட்டு வீட்டிற்குள் அடைந்து கிடப்பதைக் கண்டதுண்டு. பணம் படைத்த சிலர் செயற்கை முடி [விக்] அணிந்து கொள்வதுண்டு. ஆனால் சாதாரணமானவர்கள், சிகிச்சைக்கு ஆகும் செலவிற்கே மிகவும் கஷ்டப்படும் நிலையில் ஒரு விக் 8000 ரூபாய் முதல் 10000 ரூபாய் வரை விற்பதால் விக் பற்றி யோசிக்கக் கூட முடிவதில்லை.

Green Trends எனும் அலங்கார நிறுவனம் இது போன்ற மக்களுக்காக இந்த மாதம் நான்காம் தேதி கொண்டாடப்பட்ட உலக புற்றுநோய் தினத்தை முன்னிட்டு தன்னார்வம் கொண்ட சிலரிடம் தங்களது தலைமுடியை தானமாகப் பெற முன்வந்தார்கள்.  உதவி மனப்பான்மை கொண்ட பெண்கள் தரும் தலைமுடியிலிருந்து விக் தயாரிக்கப்பட்டு, புற்று நோயால் பாதிக்கப்பட்டு தலைமுடியை இழந்த சில பெண்களுக்கு விக் இலவசமாக தர ஏற்பாடு செய்தார்கள்.

இந்த நிகழ்ச்சியில் கலந்து கொண்ட கிறிஸ்துவ கல்லூரி மாணவிகள் 100 பேர் தங்களது தலைமுடியை தானமாக வழங்கி இருக்கிறார்கள்.  ஒரு விக் செய்ய ஆறிலிருந்து எட்டு பேருடைய தலைமுடி தேவைப்படுகிறது என்று சொல்கிறார் Green Trends நிறுவனத்தின் சார்பில் பத்திரிகைகளுக்கு பேட்டி அளித்தவர்.

புற்று நோயால் பாதிக்கப்பட்ட பெண்களின் தாழ்வு மனப்பான்மையை போக்க இளம்பெண்கள், தங்களது தலைமுடியை மொத்தமாகவோ, இல்லையெனில் 10 அங்குலம் மட்டுமோ தர முன்வரவேண்டும் என்ற கோரிக்கையை வைத்தபோது பல கல்லூரிப்பெண்கள் அதற்கு ஆதரவு தந்திருக்கிறார்கள்.

இந்த நல்ல விஷயத்தில் தங்களது தலையை மொட்டை அடித்துக்கொண்டு மொத்த முடியையும் தானம் செய்த இளம்பெண்களை உலக அழகிகள் என்று சொல்வதில் தவறில்லை!

     

இந்த நல்ல முயற்சியை இளைய சமுதாயத்தினர் வரவேற்று, முடி தானம் செய்ததை பாராட்டுவோம். முடி துறந்தாலும் இவர்கள் உலக அழகிகள் தான்!

இந்த வார முகப்புத்தக இற்றை:

இருள் என்று தெரிந்தும் கண்களைத் திறந்து கொண்டு தான் பயணிக்கிறோம். அது போல தோல்வி என்று தெரிந்தாலும் முயற்சி செய்து கொண்டிருப்போம் வெற்றி காணும்வரை.....

இந்த வார குறுஞ்செய்தி: 

ALL LIFE IS AN EXPERIMENT. THE MORE EXPERIMENTS YOU MAKE, THE BETTER.

ரசித்த புகைப்படம்: 

நாங்க எதையும் செய்வோம்.....  ஏன்னா என் பெயர் புல்லட் புஷ்பா!

ரசித்த காணொளி:

மனதைத் தொட்ட காணொளி....  நிச்சயம் உங்கள் மனதையும் தொடும். வேற்று மொழியாக இருந்தாலும், ஆங்கிலத்தில் Sub-title இருப்பதால் நிச்சயம் புரியும்.  பார்த்துவிடுங்களேன்!

ராஜா காது கழுதை காது:

இந்த வாரம் திருச்சியிலிருந்து தஞ்சை வழியே மயிலாடுதுறை சென்று கொண்டிருந்தேன். ஓட்டுனர் அருகிலேயே இருக்கும் தனி இருக்கையில் அமர்ந்திருந்தேன். தஞ்சையிலிருந்து கும்பகோணம் வரை இருக்கும் குறுகிய சாலையில் பேருந்தினை ஓட்டுவதில் உள்ள சிரமத்தினை கண்கூடாகக் காண முடிந்தது. அந்த குறுகிய சாலையில் இரு இளம் பெண்கள் பின்னால் வரும் வாகனங்கள் பற்றிய கவலை இல்லாது பேசியபடியே சென்று கொண்டிருந்தார்கள். அவர்களைப் பார்த்து ஓட்டுனர் சொன்னது:

”வீட்டுல நிறைய தங்கம் இருக்கு போல! இப்பல்லாம் நல்லா இருக்கற பொண்ணுங்களுக்கே 50 பவுன் 100 பவுன் கேட்கறாங்க! கை கால் போனா 200 பவுன் இல்ல கேப்பாங்க!”

படித்ததில் பிடித்தது!:

காவலாளி: நீ எங்கே வசிக்கிறாய்?

சிறுவன்: எங்க அப்பா-அம்மாவுடன்.

காவலாளி: உன் அப்பா-அம்மா எங்கே வசிக்கிறார்கள்.

சிறுவன்: வேறெங்கு, என்னுடன் தான்!

காவலாளி: நீங்கள் எல்லோரும் எங்கு வசிக்கிறீர்கள்?

சிறுவன்: எல்லோரும் சேர்ந்து தான்!

காவலாளி: உங்கள் வீடு எங்கிருக்கிறது?

சிறுவன்: என் பக்கத்து வீட்டுக்குப் பக்கத்தில்!

காவலாளி: சரி, உங்க பக்கத்து வீட்டுக்காரர்களின் வீடு எங்கே இருக்கிறது.

சிறுவன்: நான் சொன்னா, நீங்க நம்ப மாட்டீங்க!

காவலாளி: சொல்லு....

சிறுவன்: எங்க வீட்டுக்குப் பக்கத்து வீட்டில்!

என்ன நண்பர்களே இந்த ஃப்ரூட் சாலட்-ஐ ரசித்தீர்களா? மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
திருவரங்கத்திலிருந்து...