ஃப்ரூட் சாலட் – 84 – விருந்தாவன் விதவைகள் – ரெஜியா - பேய்

இந்த வார செய்திகள்:

மதுராவினை அடுத்த பிருந்தாவனம் [அ] விருந்தாவன் பற்றி அனைவரும் அறிந்திருப்போம். அங்கே கிருஷ்ண பகவான் நடத்திய லீலைகள் பற்றி பல கதைகள் உண்டு. இன்றைக்கும் அங்கே சுற்றுலாப் பயணிகள் அங்கே வந்து கிருஷ்ணன் விளையாடிய இடங்கள், கோவில்கள் என பார்த்துச் செல்கிறார்கள். 

இங்கே இன்னுமொரு விஷயமும் சொல்ல வேண்டும்.  வங்காள மாநிலத்தினைச் சேர்ந்த பலர் கணவனை இழந்த பெண்களை இங்கே கொண்டுவந்து விட்டுவிடுவார்கள். இப்படி இருப்பவர்களுக்காகவே பல ஆஸ்ரமங்கள் இங்கே உண்டு. அவர்களில் பலர் இங்கே கையேந்தி நிற்பதை பார்த்திருக்கிறேன்.

நீல மேல் சட்டை அணிந்திருக்கும் பெண் தான் கோபல்.... 

அப்படிப்பட்ட பெண்களின் முகங்களில் கொஞ்சமாவது சந்தோஷம் வர வைக்கவேண்டும் என ஒரு அமெரிக்காவில் இருக்கும் ’கோபல்” எனும் இந்திய ஆடை வடிவமைப்பாளர் முன் வந்திருக்கிறார். வடிவமைத்துக் கொடுத்தபடி விருந்தாவனில் இருக்கும் கைவிடப்பட்ட இந்த பெண்மணிகளின் உதவியோடு உடைகளை தைத்து அதை அமெரிக்கா மற்றும் மற்ற வெளிநாடுகளுக்கு ஏற்றுமதி செய்ய முன்வந்திருக்கிறார்.

இந்த முயற்சியில் Sulabh International நிறுவனரான மருத்துவர் பிந்தேஷ்வர் பதக் உதவியாக இருக்கிறார். சர்வதேச மகளிர் தினமான மார்ச் 8-ஆம் தேதி சில பெண்களுக்கு உடைகள் வடிவமைப்பு/தயாரிப்பு ஆகிவற்றிற்கு பயிற்சி வகுப்புகள் கொடுத்து துவங்கி இருக்கிறது இந்த சிறந்த முயற்சி. 

கணவனை இழந்து விட்ட ஒரே காரணத்திற்காக இவர்களை இப்படியே தனித்து விட்டுவிட்ட சமுதாயத்தில் அவர்களுக்கு உதவும் நல்லெண்ணம் கொண்ட கோபல் போன்றவர்களை பாராட்டுவோம்......

     செய்தி: மெயில் டுடே.....

இந்த வார முகப்புத்தக இற்றை:

எனக்கு ஒரு Blackberry அல்லது Apple தான் வேண்டுமென்று உறுதியுடன் என் பெற்றோர்களிடம் சொன்னேன்.... 

அம்மா சொன்னார்: வீட்டுல சாத்துக்குடி இருக்கு அத முதல்ல சாப்பிடு!

இந்த வார குறுஞ்செய்தி:

SUCCESS SEEMS TO BE CONNECTED WITH ACTION. SUCCESSFUL PEOPLE KEEP MOVING. THEY MAKE MISTAKES, BUT THEY DON’T QUIT – CONRAD HILTON.

ராஜா காது கழுதை காது:

 நாங்களும் பூ வரைவோம்டே!

சமீபத்தில் தில்லியில் ஒரு கண்காட்சி. அதில் National Disaster Response Force-ஐ சேர்ந்த வீரர்கள் பெரும் விபத்துகளில்/இயற்கை சீற்றங்களில் எப்படி உதவுகிறார்கள் என்பதைக் காண்பித்தார்கள்.  கூடவே இடிபாடுகளில் சிக்கிய மனிதர்களை கண்டுபிடிக்க இருக்கும் பழக்கப்பட்ட நாய்கள் கொண்டு ஒரு DOG SHOW ஏற்பாடு செய்திருந்தார்கள். அதைக் கண்டுகளிக்க வந்த ஒரு பெண்மணி ஒவ்வொரு நாயையும் தடவிக்கொடுத்து, அதை பழக்குபவரிடம் நாயின் பெயரைக் கேட்டுக் கொண்டிருந்தார். நாய்களின் பெயரை தன்னு, ப்ரீத்தி என வரிசையாகக் கேட்டுக்கொண்டே வந்தவர் ஒரு நாயின் பெயர் “ரெஜியா” என்று கேட்டதும், துள்ளலோடு சொன்னது......

“ஐ....  இந்த நாயோட பெயரும் ரெஜியாவா.... என் பேரும் ரெஜியா...” 

இந்த வார ரசித்த பாடல்:

இந்த வார ரசித்த பாடலாக “மெட்டி ஒலி காற்றோடு என் நெஞ்சை தாலாட்ட” எனும் அருமையான பாடல். இசை அமைத்து பாடலை பாடியது: இளையராஜா. பெண் குரல்: ஜானகி?

)

ரசித்த கார்ட்டூன்:

நன்றி: தி இந்து.

படித்ததில் பிடித்தது:

பேயைக் கண்டவர்கள் கிடையாது. ஆனால் அதனைக் கண்டு, அதன் குணங்களைத் தெரிந்து கொண்டவர்களைப் போல ஜனங்கள் பேசிக்கொள்கிறார்கள். பேயின் உருவம் தெரியாது என்றும், அது மனிதர்களைப் பிடித்துக் கொண்டால், அவர்கள் செய்யும் சேஷ்டைகளின் மூலம், பேயின் போக்குத் தெரிந்து கொள்ள முடியுமென்றும் பேசுகிறார்கள். இந்தப் பைத்தியக்காரத்தனமான எண்ணம், எவ்வளவு விபரீதமான நடவடிக்கைகளுக்கு இடம் தருகிறது. என்னைக் கொட்டி வேதனை கொடுத்த தேளை அடிக்க நான் என் அப்பாவின் தடியை எடுத்தேன். எனக்குப் பேய் பிடித்திருப்பதாக நம்பியதால், நான் தடியை எடுத்ததும், தங்களுக்கு ஆபத்து வரும் என்று பயந்து, என் தகப்பனாரும், புருஷனும் ஓடினார்கள். என்னால் சிரிப்பைத் தாங்கமுடியவில்லை. மகா சூரர்கள், வீரர்கள் இந்த ஆண்பிள்ளைகள்! எதிலே! பெண்களை மிரட்டுகிற விஷயத்திலே! நான் என்ன சின்னப் பிள்ளையா? எனக்கென்ன பயம்? என்று பெருமையாக பேசுவார்கள். பெண் என்றால் பயங்காளி, ஆண்களேதான் தைரியசாலிகள் என்று எப்படியோ ஒரு தப்பான எண்ணத்தை நாட்டிலே பரப்பிவிட்டார்கள். இரண்டு ஆடவர்கள் ஓடினார்கள், நான் கையிலே தடியை எடுத்ததும்! அவ்வளவு பயம்! பேய் என்ன செய்துவிடுமோ என்ற பயம்!

- பேரறிஞர் அண்ணாதுரை எழுதிய ”ரங்கோன் ராதா” புத்தகத்திலிருந்து......   

என்ன நண்பர்களே, இந்த வார ஃப்ரூட்சாலட்-ஐ ரசித்தீர்களா? மீண்டும் அடுத்த வெள்ளியன்று வேறொரு ஃப்ரூட் சாலட்-ல் சந்திக்கும் வரை…..

நட்புடன்

வெங்கட்.

புது தில்லி.