மதுபனி [MADHUBANI] ஓவியங்கள்

நேற்று நானும் நண்பர் பத்மநாபன் அவர்களும் தில்லியின் ஜன்பத் பகுதியில் இருக்கும் ஒரு கிராமிய கலை மற்றும் உணவு திருவிழா சென்றிருந்தோம். இப்போதெல்லாம் ஏதாவது கண்காட்சி என்று சொன்னால், அதுவும் கிராமிய/பழங்குடிகளின் கண்காட்சி என்று சொன்னால் அத்தனை மக்களை ஈர்க்கமுடியாது என்பதாலோ என்னவோ உணவினையும் தலைப்பில் சேர்த்து விட்டார்கள் போல!

அங்கே சில கிராமிய/பழங்குடி மக்கள் பழக்கத்தில் இருந்த ஓவியங்களை கண்காட்சியாகவும், விற்பனைக்காகவும் வைத்திருந்தார்கள். பல இடங்களிலிருந்து வந்திருந்தாலும், இன்றைக்கு நாம் பார்க்கப்போவது மதுபனி ஓவியங்கள் மட்டுமே. மதுபனி [MADHUBANI] எனும் நகரம் பீஹார் மாநிலத்தில் இருக்கிறது. மிதிலா அல்லது மைதிலி என்ற மொழி பேசும் மக்கள் அதிகம் இருக்கும் இடம் இது. மதுபனி என்பதன் அர்த்தம் தேன் நிறைந்த காடு!

பெரும்பாலான மதுபனி ஓவியங்கள் இந்து கடவுள்களான ராமர், கிருஷ்ணர், சிவன், சரஸ்வதி, துர்க்கை போன்றவர்களையும் இயற்கை அழகினையும் காண்பிப்பவை. பெரும்பாலும் பெண்களால் தான் இந்த ஓவியங்கள் வரையப்படுகின்றன என்றாலும் ஆண்களும் வரைவதில் வல்லவர்கள் தான். முதன் முதலில் இந்த ஓவியங்களை வரைந்தது மிதிலையின் மன்னரான ஜனக மஹாராஜா காலத்தில் என்றும், அவரது மகள் சீதையின் திருமணத்தின் போது இந்த ஓவியங்களை வரைய வைத்தார் எனவும் சொல்வார்கள்.

பொதுவாகவே இந்த ஓவியங்களில் காலி இடங்களே இருப்பதில்லை. முன்பெல்லாம் மண்ணாலான வீடுகளின் சுவர்களில் முழுக்க முழுக்க இந்த ஓவியங்களை வரைந்து வைப்பார்களாம். இப்போதெல்லாம், துணி, காகிதம் போன்றவற்றிலும் வரைகிறார்கள்.  இதில் இன்னுமொரு விசேஷமும் உண்டு. இந்த ஓவியங்களை வரைவதற்கு பயன்படுத்துவது அனைத்துமே இயற்கை வண்ணங்கள் தான் – செடி, பூ, இலைகள் போன்றவற்றிலிருந்து வண்ணங்களை எடுத்து ஓவியங்களை வரைகிறார்கள்.

இந்த ஞாயிறில் சில மதுபனி ஓவியங்களை நாம் பார்க்கலாம்.

கிருஷ்ணரும் கோபிகைகளும்.....

குகனின் படகில் செல்லும் ராமன், சீதை மற்றும் இலக்குவன்.....

தேரோட்டியாக கிருஷ்ணன்....

எவ்வளவு அழகாய் இருக்கிறது இந்த ஓவியம்!

 

அர்த்தநாரீஸ்வரர்

 

 

என்ன நண்பர்களே இந்த ஓவியங்களை ரசித்தீர்களா? அடுத்த ஞாயிறன்று வேறு சில புகைப்படங்கள் பார்க்கலாம்!

தொடர்ந்து சந்திப்போம்......

நட்புடன்

வெங்கட்.

புது தில்லி.