சந்தித்ததும் சிந்தித்ததும்: முகலாயர்கள் கால ஓவியங்கள்-பகுதி-2

ஞாயிறு, 13 ஏப்ரல், 2014

முகலாயர்கள் கால ஓவியங்கள்-பகுதி-2

முகலாயர்கள் கால ஓவியங்கள் பகுதி-1 இங்கே

சென்ற ஞாயிறன்று “முகலாயர்கள் கால ஓவியங்கள்” வெளியிட்டபோது இன்னும் பல ஓவியங்கள் இருப்பதாய்ச் சொல்லி, விரும்பினால் மற்ற படங்களையும் வெளியிடுவதாகச் சொல்லி இருந்தேன். பலருடைய விருப்பத்திற்கு செவி சாய்த்து இந்த வாரமும் முகலாயர்கள் கால ஓவியங்கள் இரண்டாம் பகுதியாக!

ஏப்ரல் 1578 – அக்பர், பஞ்சாப் பகுதியில் வேட்டைக்குச் சென்ற போது, அவருக்கு ஞானோதயம் உதித்தது. சில நிமிடங்கள் வரை அமைதியாக இருந்தபின், வேட்டையாடிய, உணவுக்காக பிடித்திருந்த பல விலங்குகளை சுதந்திரமாக திரிய, அவற்றை விடுதலை செய்துவிடச் சொன்னாராம். அந்த காட்சியை வரைந்திருக்கிறார் மிஸ்கினா எனும் ஓவியர் – வரைந்த ஆண்டு 1595.

இளவரசர் சலீம் – அக்பரின் வாரிசு. 1569-ஆம் ஆண்டு பிறந்தவர். அக்பர் இறந்தபின் பேரரசராக முடிசூட்டிக்கொள்ள துடித்தவர். 1600-ஆம் ஆண்டு தனது தந்தையுடன் மனஸ்தாபம் கொண்டு அலாஹாபாத் நகருக்குச் சென்று தன்னை மஹாராஜாவாக பிரகடனம் செய்து கொண்டார்! 1602-ஆம் ஆண்டு தந்தையின் மிக முக்கிய நண்பரான அபுல் ஃபசலை கொலை செய்ய ஏற்பாடு செய்தவர்! 1604-ஆம் ஆண்டு தந்தையுடன் சமரசம் செய்து மீண்டும் சேர்ந்து கொண்டார். 1605-ஆம் ஆண்டு முதல் 1627-ஆம் ஆண்டு வரை ஆட்சி புரிந்தார். ஜஹாங்கீர் [உலகத்தையே கைப்பற்றுபவர்] எனும் பெயர் பூண்டு ஆட்சி புரிந்தார். அவரது இந்த ஓவியம் வரையப்பட்ட ஆண்டு 1620-30க்குள் இருக்கலாம். வரைந்தவர் பெயர் தெரியவில்லை.

1649-ஆம் ஆண்டு லாகூரில் ஷாஜஹான் திவான்–இ-ஆம் [மக்கள் அவை]-ல் அமர்ந்திருக்கிறார். இரானியர்களை ராஜ்புத் வீரர்களுடன் சேர்ந்து முறியடித்து விட்டு அதைப் பற்றி ஷாஜஹானிடம் விவரம் சொல்ல வந்து இருக்கிறார் ஔரங்கசீப் [இடது புறத்தில் கைகளை நெற்றியில் வைத்து மரியாதை செய்பவர்]. இதன் பிறகு பத்து வருடங்களில் ஷாஜஹான் உடல் தளர்ந்து விட அவரை ஆக்ரா கோட்டையில் கைது செய்து ஆட்சியைப் பிடித்தார் ஔரங்கசீப்!

ஔரங்கசீப் – முழு போர் உடையில். குதிரைக்கும் இரும்பாலான உடை. கையிலிருப்பது தங்க ஈட்டி. இடுப்பில் கட்டியிருக்கும் அரைக்கச்சில் அம்புகளும், ”கடர்” என்று அழைக்கப்படும் குத்துவாளும் வைத்திருப்பதைக் காண முடிகிறது. வரைந்த ஆண்டு 1660-70க்குள். வரைந்த ஓவியர் யாரென்பது குறிப்பிடப்படவில்லை.

ஃபரூக்சியார் [அமர்ந்திருப்பவர்] மற்றும் ஹுசைன் அலி கான். ஹுசைன் அலி கான் மற்றும் அவரது சகோதரரின் உதவியோடு தில்லியை 1713-ஆம் ஆண்டு கைப்பற்றியவர் ஃபரூக்சியார். இந்த ஓவியம் வரையப்பட்ட ஆண்டு 1713-லிருந்து 1719-க்குள்.

அஹமத் ஷா – அரண்மணைப் பெண்டிருடன் மான்களை வேட்டையாடும் காட்சி. வரையப்பட்ட ஆண்டு – 1750.

மன்னர் இரண்டாம் ஆலம்கீர். வரையப்பட்ட ஆண்டு 1790.

இரண்டாம் அக்பர் – தனது அரச கூடத்தில். வரையப்பட்ட ஆண்டு 1822.

1569-ஆம் ஆண்டு – அக்பரின் தலைமையில் முகலாயப் படைவீரர்கள் ராஜஸ்தான் சூர்ஜன் ஹாடா பூந்தி கோட்டையினை வெற்றி கொண்ட காட்சி இங்கே ஓவியமாகத் தீட்டி இருக்கிறார்கள். வரைந்த ஓவியர் கேம் கரண். வரையப்பட்ட காலம் 1590-95.

பாபரின் தோட்டம் – 1504-ஆம் ஆண்டு காபூலில் ~~பாபரின் மகன் அக்பரால்~~ உருவாக்கப்பட்டது. அத்தோட்டத்தினை ஓவியமாக வரைந்தவர் DHதனு. வரைய வைத்தவர் பாபரின் பேரன் அக்பர்!

என்ன நண்பர்களே, இந்த ஞாயிறில் பகிர்ந்து கொண்ட ஓவியங்களை ரசித்தீர்களா?

மீண்டும் சந்திப்போம்......

நட்புடன்

வெங்கட்.

புது தில்லி.