ஃப்ரூட் சாலட் – 90 – சாக்கடைத் தங்கம் - காற்றின் மொழி – முதுகில் டின்....

இந்த வார செய்தி:

கோவையின் உக்கடம் அருகே இருக்கும் ஒரு கழிவு நீர் பண்ணை. அங்கிருந்து வெளியேறும் கழிவு நீர் சார்ந்து இருக்கிறது சில குடும்பங்கள். அவற்றிலிருந்து வரும் கழிவு நீர் விவசாய நிலங்களை செழிக்க வைப்பதோடு சிலரின் வாழ்வுகளையும் சிறக்க வைக்கிறது என்று சொல்கிறார்கள். 

நகரின் நகைப் பட்டறைகளில் சேதாரமாகும் ஒவ்வொரு துளி தங்கமும் இந்த கழிவு நீர் வழியாக வெளியேறுகின்றது. அதனால் இந்த கழிவு நீர் சிலருக்கு பொக்கிஷம்.

கழிவு நீர், வாய்க்காலாய் பிரியும் இடத்திலிருந்து தொடங்குகிறது அந்த புதையல் தேடும் தொழில். வழி நெடுக பாத்தி கட்டி, ஒவ்வொரு குடும்பமும் தங்கள் வாழ்வாதாரத்தை இந்த கழிவு நீரில் தினம் தினம் தேடுகின்றன.

ஒவ்வொரு நாளும் அதிகாலையில் கழிவு நீர் பண்ணையிலிருந்து வெளியேறும் நீர் கொஞ்சம் குறைந்திருக்கும்போது, வெளியேறும் இடத்தில் இறங்கி அங்கிருக்கும் சேற்றை வாரி, கரையில் போட்டு வைக்கிறார்கள். பிறகு அதை அங்கே வெட்டி வைத்திருக்கும் குழியில் போட்டு காய்ந்த மண்ணுடன் கலந்து, தண்ணீரில் சலித்து எடுத்து, கழிவுகளையும், மண்ணையும் அப்புறப்படுத்தியபிறகு கடைசியாக தங்கத் துகள்கள் கிடைக்கும் என்கிறார்கள். 

நாமக்கல், தருமபுரி, விருதுநகர் மாவட்டங்களைச் சேர்ந்த மக்கள் தான் இத் தொழிலில் ஈடுபடுகிறார்களாம். ”நாமக்கல்லிலிருந்து குடும்பத்துடன் இங்கு வந்து, பல ஆண்டுகளாக இந்த தொழிலை செய்கிறேன். எனது மூன்று பெண் குழந்தைகளையும் படிக்க வைக்கிறேன்” என்று பெருமிதப்பட்டுக் கொள்கிறார் அங்குள்ள முருகேசன்.
 

தினமும் குறைந்தது 13 மணி நேரம் வேலை, 10 நாள் உழைத்தால் 3 கிராம் தங்கம் தேறும். சற்று குறைவான விலையில் விற்றால் கூட, கணிசமான தொகை மிஞ்சும் என்பது இவர்களது கணக்கு. மாதம் ரூ.15 ஆயிரம் வரை கிடைக்கும். இதை வைத்து எனது மகனையும் மகளையும் படிக்க வைக்கிறார் அங்கம்மாள் எனும் பெண்மணி.

தேடலும் உழைப்பும் இவர்களது பலமாக இருந்தாலும், கழிவு நீரில் இறங்கி தங்க வேட்டையில் இறங்கும் இவர்களது சுகாதாரம் பெரிய கேள்விக்குறி.

தி இந்துவில் வெளிவந்த இக்கட்டுரை முழுதும் படிக்க..... இங்கே கிளிக்கவும்!

இந்த வார முகப்புத்தக இற்றை:

வாழ்க்கை ஒரு புத்தகம் போன்றது – சில பக்கங்கள் சோகமாகவும், சில பக்கங்கள் மகிழ்ச்சியானதாகவும் சில பக்கங்கள் மிகவும் எழுச்சியுள்ளதாகவும் இருக்கும். பக்கங்களை திருப்பாமலே இருந்துவிட்டால், அடுத்த பக்கத்தில் என்ன இருக்கும் என்பதே தெரியாமல் போய் விடும்.....

இந்த வார குறுஞ்செய்தி:

”பல லட்சக் கணக்கான மக்கள் காதல் கடிதம் தீட்டுகிறார்கள். அப்படி எழுதும் அனைவருமே தங்களது முதல் காதல் கடிதத்தினை எனக்கே தருகிறார்கள். நான் எவ்வளவு பாக்கியசாலி”

சொன்னது யார்? சத்தியாமாக நான் இல்லீங்கோ! சொன்னது குப்பைத் தொட்டி!

இந்த வார ரசித்த காணொளி:

பகிர்ந்து கொள்வதில் இருக்கும் மகிழ்ச்சியை இந்தக் காணொளி சொல்கிறது.  பாருங்களேன்! 

சாலைக் காட்சி:

நேற்று இரவு, உணவு உண்டபிறகு ஒரு நடைப் பயணம்! எதிர் பக்கத்திலிருந்து ஒரு கணவன் – மனைவி வந்து கொண்டிருந்தார்கள். கணவன் மனைவியிடம் எதோ சொல்லப் போக, இருப்பது சாலை என்று கூடப் பார்க்காது, மனைவி, கணவனது முதுகில் வைத்தாரே பார்க்கணும் ஒரு அடி......  ”டின்னு கட்டிடுவாங்க” என்று சொல்வதன் அர்த்தம் இது தானோ! அப்படி என்ன சொல்லி இருப்பார் – சந்தேகம்......

புகைப்படம்:

என் மேல் விழுந்த பனித்துளியே.....
இத்தனை நாளாய் எங்கிருந்தாய்!

படித்ததில் பிடித்தது:

நோயாளி: டாக்டர், ஊர் முழுக்க அலைஞ்சிட்டேன்! நீங்க எழுதிக் கொடுத்த மாத்திரை எங்கயுமே கிடைக்கல!

மருத்துவர்: வாய்யா வா! பேனா எழுதலைன்னு கிறுக்கி பார்த்த பேப்பரை நீ தான் எடுத்துட்டுப் போனியா!

என்ன நண்பர்களே, இந்த வார ஃப்ரூட்சாலட்-ஐ ரசித்தீர்களா? மீண்டும் அடுத்த வெள்ளியன்று வேறொரு ஃப்ரூட் சாலட்-ல் சந்திக்கும் வரை…..

நட்புடன்

வெங்கட்.

புது தில்லி.