ஃப்ரூட் சாலட் – 92 – தேர்தல் முடிவுகள் - புதுக்கவிதை - தந்தையின் டைரி

இந்த வார செய்தி:

தேர்தல் முடிவுகள் [இப்பதிவு எழுதும்போது] பல ஊடகங்கள் எதிர்பார்த்தது போலவே பாரதிய ஜனதா கட்சி பெரும்பான்மையான இடங்களில் முன்னணியில் இருக்கிறது/வென்றிருக்கிறது. சென்ற ஆட்சியாளர்களிடமிருந்து இவர்கள் எந்த விதத்தில் மாறுபடுவார்கள் என்பதைப் பொறுத்திருந்து தான் பார்க்க வேண்டும்.

பொதுமக்களுக்கு எந்த விதத்தில் வசதிகள் செய்து கொடுப்பார்கள், ஊழல் இல்லாத, தன்னலம் கருதாத, ஆட்சியாக இந்த புதிய ஆட்சி அமையுமா என்பதை பொறுத்திருந்து தான் பார்க்க வேண்டும்.

இத்தனை பெரிய வெற்றி கிடைத்திருக்கும்போது அந்த வெற்றி ஆட்சியாளர்களின் மனதை களங்கப்படுத்தி, “ஐந்து வருடங்கள் நமக்கு கிடைத்திருக்கிறது. அதில் எந்த அளவு சம்பாதிக்க முடியுமோ அத்தனை சம்பாதிக்க வேண்டும்” என்ற எண்ணம் அவர்களுக்கு வந்து விடாமல் இருக்க வேண்டும். இவர்கள் மேல் நம்பிக்கை வைத்து வாக்களித்துள்ள மக்களுக்கு தேவையான அடிப்படை வசதிகளான – குடிநீர், மின்சாரம், வேலைவாய்ப்பு, உணவு, ஊழலற்ற அரசாங்கம் போன்றவற்றில் கவனம் செலுத்த வேண்டும்.

மோதி அலை அடித்து, மோதியை பிரதமராக ஆக்கிய மக்கள் தாங்கள் எடுத்த முடிவினால் தங்களது தலையை ”மோதி”க்கொள்ளப் போகிறார்களா என்பதை பொறுத்திருந்து பார்க்கலாம்…..

இந்த வார முகப்புத்தக இற்றை:

ஒரு தந்தையின் டைரிக்குறிப்பு:

என்னுடைய மகன் என்னுடையவனாகவே இருக்கிறான் – அவனுக்கு ஒரு மனைவி கிடைக்கும்வரை……

என்னுடைய மகள் என்னுடையவளாகவே இருக்கிறாள் – என்னுடைய வாழ்நாள் முழுவதுமே!

இந்த வார குறுஞ்செய்தி:

ஒரு கண்ணாடி தான் என்னுடைய மிகச் சிறந்த நண்பன் – நான் அழும்போது அந்த கண்ணாடி சிரிப்பதில்லை……  - சார்லி சாப்ளின்.

சுஜாதாட்ஸ்:

புதுக்கவிதை பற்றி சற்று பேசலாம். புதுக்கவிதை தற்போது ஒரு rash போல நம்மிடம் பரவி இருக்கிறது.

“அடிக்கடி கட்சிமாறும் அரசியல்வாதிக்கு அடுத்த தேர்தலில் குரங்கைச் சின்னமாய்க் கொடுத்தால் என்ன”

என்கிற வாக்கியத்தினை ஐந்தாகப் பிரித்து கவிதையாகப் பதிப்பித்திருந்தார்கள்.

என்னய்யா விளையாடுகிறீர்களா?

-    கணையாழியின் கடைசி பக்கங்கள், அக்டோபர் 1972.

ரசித்த பாடல்:

நாசர் மற்றும் ரேவதி நடித்த அவதாரம் படத்திலிருந்து இளையராஜா அவர்களின் குரலில் “தென்றல் வந்து தீண்டும்போது” எனும் நான் ரசித்த பாடல்….  இதோ உங்களுக்காக….

புகைப்படம்:

படித்ததில் பிடித்தது:

துறவி ஒருவர் ஆற்றில் மூழ்கி தவம் செய்து கொண்டிருந்தார். ஒரு இளைஞன் குறுக்கிட்டு “ஐயா நான் தங்களின் சிஷ்யனாக சேர விரும்புகிறேன்” என்றான். ஆற்றிலிருந்து எழுந்தவர், ”ஏன்?” என்றார் துறவி. ”நான் கடவுளை அறிய விரும்புகிறேன்” என்றான்.

சட்டென்று துறவி அவன் கழுத்தின் பின்புறத்தைப் பிடித்து இழுத்து, அவன் தலையை ஆற்றினுள் முக்கினார். சிறிது நேரத்தில் மூச்சிறைத்த இளைஞன், திமுறிக் கொண்டு வெளியே வரத் துடித்தான். கடைசியாக துறவி அவனைப் பிடித்து வெளியே இழுத்தார். வெளியில் வந்த இளைஞன் இருமிக் கொண்டு பெரு மூச்செறிந்தான். துறவி கேட்டார், “நீ நீரினுள் மூழ்கி இருக்கும் போது உனக்கு என்ன தேவைப் பட்டது?” என்றார்.

”காற்று” என்றான் இளைஞன்.

”நல்லது, வீட்டுக்குச் செல். காற்று போல கடவுள் உனக்கு எப்போது தேவையோ அப்போது திரும்பி வா” என்று சொல்லி விட்டார்.

நீதி: முதலில் தகுதியாக்கிக் கொள். பின்னர் ஆசைப்படு.

என்ன நண்பர்களே, இந்த வார ஃப்ரூட்சாலட்-ஐ ரசித்தீர்களா? மீண்டும் அடுத்த வெள்ளியன்று வேறொரு ஃப்ரூட் சாலட்-ல் சந்திக்கும் வரை…..

நட்புடன்

வெங்கட்.

திருவரங்கத்திலிருந்து…..