ஃப்ரூட் சாலட் – 98 – அதிவேக ரயில் – நாயும் பூனையும் – ஹிந்தி எதிர்ப்பு....

படம் இணையத்திலிருந்து......

 

இந்த வார செய்தி:

சமீபத்தில் ரயில் கட்டணங்கள் உயர்த்தப்பட்டது அனைவருக்கும் தெரிந்த விஷயம். அது குறித்த பலவிதமான கருத்துகளை படிக்க முடிந்தது. முதலில் ரயில் பயணிகளுக்கான வசதிகளை மேம்படுத்துங்கள், போலவே ரயில் பயணங்கள் விபத்துகள் இல்லாத/தடுக்கும்படியான நடவடிக்கைகளை எடுக்க வேண்டியதற்கான அவசியம் குறித்தும் பல கருத்துகள் வந்த வண்ணமே இருந்தன. 

ஒரு படத்தில் விவேக் சொல்வார், “ரயில் வண்டியில் இருக்கும் கழிவறையில் ஒரு கோப்பை வைத்து அதை சங்கிலியால் கட்டி வைத்து விடுகிறார்கள் – அந்த சங்கிலியாவது நீளமாக இல்லாது, சிறிய அளவே இருப்பதால் அதைப் பயன்படுத்தும்போது பெரிய சண்டையே போட வேண்டியிருக்கிறது” என....! அதைப் பார்த்த அல்லது அந்த மாதிரி அவஸ்தைப்பட்ட ஒருவரும் இதை ரயில் அமைச்சகத்திற்கு ஆலோசனையாக எழுதி அனுப்பி இருக்கிறாராம்!

சரி இந்த விஷயங்கள் இருக்கட்டும், இன்றைய செய்தியாக நாம் பார்க்கப்போவது ரயில் கட்டணம் பற்றிய விஷயம் அல்ல.  கடந்த வியாழனன்று, தில்லியிலிருந்து ஆக்ரா வரை அதிவேக விரைவில் செயல்படப் போகும் ஒரு ரயில் வண்டியின் சோதனை ஓட்டம் நடைபெற்றது. மணிக்கு 160 கிலோமீட்டர் வேகத்தில் பயணிக்கும்படியான இந்த ரயில் தலைநகர் தில்லியின் ஹஸ்ரத் நிஜாமுதீன் ரயில் நிலையத்திலிருந்து ஆக்ரா கண்டோன்மெண்ட் ரயில் நிலையம் வரை சோதனை ஓட்டம் செய்யப்பட்டது. 98 நிமிடத்தில் செல்ல முடிந்ததாகவும், திரும்பி வரும் போது 96 நிமிடம் எடுத்துக் கொண்டதாகவும் செய்திகள் தெரிவிக்கின்றன.

வரும் நவம்பர் மாதத்திலிருந்து 90 நிமிடத்தில் செல்லும்படியான அதிவேக விரைவு வண்டி அறிமுகம் செய்யப்படும் என்று தகவல்கள் வெளியாகியுள்ளன. தற்போது இந்தப் பாதையில் செல்லும் போபால் ஷதாப்தி மணிக்கு 150 கிலோமீட்டர் வேகத்தில் செல்கிறது – நடுவில் மதுராவில் நின்று பிறகு செல்லும் இந்த வண்டி புது தில்லியிலிருந்து ஆக்ரா வரை செல்ல இரண்டு மணி ஆறு நிமிடங்கள் எடுத்துக் கொள்கிறது! [அதாவது எந்த வித தாமதமும் இல்லை எனும் பட்சத்தில்!]

இந்தப் பாதையில் சின்னச் சின்னதாய் கிராமங்கள் நிறையவே இருக்கின்றது. இக்கிராமங்களில் இருக்கும் பல்வேறு மக்கள் தங்களது காலைக்கடன்களை முடிப்பதே இந்த ரயில் பாதையின் ஓரங்களில் தான். ரயில் வருவது பற்றியோ, அதில் இருக்கும் மக்கள் கவனிப்பார்களே என்பது பற்றியோ இவர்களுக்கு கவலையில்லை – அனைவருக்கும் ராஜ மரியாதை தான்! இப்படிப்பட்ட மனிதர்கள் அதிவேக ரயில் வரும் பாதையின் குறுக்கே போகமுடியாதபடி தடுப்பு இருந்தால் தான் இந்த திட்டம் நிறைவேறும் – சோதனை ஓட்டத்தின் போது பாதையில் பல RPF சிப்பாய்களை நிறுத்தி வைத்தார்களாம்!

27 கிலோமீட்டர் அளவிற்கு பாதுகாப்பு வேலிகள் அமைக்கப்படும் என்றும் தகவல்கள் வெளியாகியுள்ளன! ஒரு விதத்தில் இந்த அதிவேக விரைவு வண்டி நமக்கு கிடைப்பதில் மகிழ்ச்சி என்றாலும், பயணிகளுக்கான வசதிகளை இன்னும் மேம்படுத்தவும், பாதுகாப்பு ஏற்பாடுகளை அதிகரிக்கவும், விபத்து தடுப்புக்கான வழிமுறைகளை மேம்படுத்தவும் முயற்சி எடுக்க வேண்டும் – இதில் அவர்களது கவனத்தினைச் செலுத்தினால் நல்லது. 

நவம்பர் மாதம் இந்த அதிவேக விரைவு வண்டி அறிமுகம் செய்யப்பட்டதும் அதில் பயணித்து, அந்த அனுபவத்தினை உங்களுடன் பகிர்ந்து கொள்கிறேன்! சரியா!

இந்த வார முகப்புத்தக இற்றை:

இந்த வார குறுஞ்செய்தி:

When Life gives you a thousand reasons to cry, show that you have a million reasons to smile.  Your happiness is hidden within you.  Just remove your worries.

ரசித்த பாடல்:

”சைவம்” படத்தில் வரும் ”அழகே அழகே எதுவும் அழகே” பாடலை சில நாட்களாகவே கேட்டுக் கொண்டிருக்கிறேன்.  மிகவும் ரசிக்கும்படியாக இருக்கிறது.  நான் ரசித்த பாடல் இதோ உங்கள் ரசனைக்கு....

சுஜாதாட்ஸ்:

ஹைக்கூவின் கவர்ச்சிக்குக் காரணம் அதன் எளிமை. ஹைக்கூ என்பதில் உவமைகளே இருக்காது. சந்திரனைப் போல கண்கள், பவளம் போல உதடுகள் இதெல்லாம் ஹைக்கூ இல்லை! இவையெல்லாம் கவிதையில் நேரடியான அனுபவத்தைக் கலைக்கிறது. உவமையென்றால் உவமிக்கும் பொருளைப் பற்றி எண்ணிப் பார்க்க வேண்டும். அதெல்லாம் கிடையாது Haiku happens என்பார்கள். நேரடியாகக் கிடைத்த ஒரு அனுபவத்தை உடனே சிறைப்பிடிக்கும் தன்மை எல்லா ஹைக்கூவிலும் உண்டு. அந்த அநுபவக் கணத்தை அதிகம் வார்த்தை ஜாலமில்லாமல், உவமை ஏதும் இல்லாமல் நேராக வாசகனுக்குக் கடத்தும் முயற்சிதான் ஹைக்கூ. கவிதையின் ஜூம்லென்ஸ் என்று ஹைக்கூவினைச் சொல்லலாம்!

சமவெளியில்

பசுவின் உதடுகளில்

புல்லின் ஈரம்....

இந்த வார புகைப்படம்:

படித்ததில் பிடித்தது:

கார்டு கவர்களில்

இந்தி எழுத்தை

நன்றாய் அடித்து

மசியால் மெழுகி

அஞ்சல் செய்யும்

தனித்தமிழ் அன்பர்

“பாபி” பார்த்ததும்

இருடிக் கபூரும்

இடிம்பிள் கபாடியாவும்

[ரகரமும் டகரமும் மொழி

முதல் வாரா.]

அருமையாய் நடித்தனர்......

[என டைரியில் எழுதுகிறாராம்.]

-   ந. ஜெயபாஸ்கரன். 

என்ன நண்பர்களே, இந்த வார ஃப்ரூட்சாலட்-ஐ ரசித்தீர்களா? மீண்டும் அடுத்த வெள்ளியன்று வேறொரு ஃப்ரூட் சாலட்-ல் சந்திக்கும் வரை…..

நட்புடன்

வெங்கட்.

புது தில்லி.

டிஸ்கி: நேற்றே வந்திருக்க வேண்டிய பதிவு! ஒரு நாள் தாமதமாய்......