முடிவும் தொடக்கமும்.....

அனைவருக்கும் இனிய புத்தாண்டு நல்வாழ்த்துகள்

நேற்றுடன் நமது வாழ்வில் இன்னுமொரு வருடம் முடிந்திருக்கிறது.  இன்று புத்தாண்டு புதுப்பொலிவுடன் பிறந்திருக்கிறது. ஒவ்வொரு வருடமும் இவற்றைக் கடைபிடிப்பேன், இந்த வழக்கங்களை ஒழிப்பேன் என்றெல்லாம் முடிவு எடுப்பது பலருக்கு வழக்கம். என்னைப் பொறுத்த வரை இப்படி எல்லாம் முடிவு எடுப்பதே இல்லை.....  எப்போதும் போல, அடுத்தவருக்குத் தீங்கு நினைக்காது, நல்லதையே செய்ய நினைக்க வேண்டும் என்பதைத் தவிர வேறு ஒன்றும் புதியதாக நினைப்பதில்லை.

புத்தாண்டினை வரவேற்க, தில்லியில் இருக்கும்
திருப்பதி பாலாஜி கோவிலில் போட்ட கோலம்

சென்ற வருடத்தில் மொத்தமாக 185 பதிவுகள் வெளியிட்டு இருக்கிறேன். சில மாதங்களில் ஒவ்வொரு நாளும் பதிவு வெளியிட்டிருந்தாலும், சில மாதங்களில் சுணக்கம் – மொத்தமாகவே 7 பதிவு தான் ஒரு மாதத்தில் வெளியிட்டு இருக்கிறேன்.  எனது முதல் மின் புத்தகம் வெளியிட்டதும் இந்த வருடத்தில் தான். இரண்டாவது மின் புத்தகம் தயார் செய்து அனுப்பி இருக்கிறேன். இன்னமும் வெளியிடப்படவில்லை.  2016-ஆம் ஆண்டின் ஆரம்பத்திலேயே இரண்டாவது மின்புத்தகம் – “மத்தியப் பிரதேசம் அழைக்கிறது” வெளியிடப்பட இருக்கிறது.  இன்னும் சில மின்புத்தகங்கள் தயாரிக்கும் பணியையும் செய்ய வேண்டும். புதிய வருடம் எப்படி இருக்கப் போகிறது என்பதை பொறுத்திருந்து தான் பார்க்க வேண்டும்.

வடகிழக்கு மாநிலப் பயணத்தின் போது எடுத்த புகைப்படம்.....

வடகிழக்கு மாநிலப் பயணம் [15 நாட்கள்] சென்ற வருடத்தில் சென்று வந்தது பசுமையாக இருக்கிறது.  அலுவலகத்தில் தொடர்ந்து இருக்கும் பணிச்சுமையை மறக்க இப்படி அவ்வப்போது வெளியிடங்களுக்குச் சென்று வருவது அவசியமாக இருக்கிறது.  இந்த வருடத்திலும் சில பயணங்கள் மேற்கொள்ளும் ஆசை உண்டு. நிறைவேறுமா என்பதையும் பொறுத்திருந்து தான் பார்க்க வேண்டும்.  

புத்தாண்டினை வரவேற்க, தில்லியில் இருக்கும்
திருப்பதி பாலாஜி கோவிலில் போட்ட கோலம்

சென்ற வருடத்தின் கடைசியில் மழையின் காரணமாகவும், வெள்ளத்தின் காரணமாகவும் பலரை இழந்திருக்கிறோம்.  வெள்ளத்தின் காரணமாக பல நல்லுள்ளங்கள் ஒன்றாகச் சேர்ந்து உழைப்பதைப் பற்றி படிக்கும் போதே மகிழ்ச்சி.  வெள்ளத்தின் காரணமாக பலரும் மதம் கடந்து இணைந்து பணியாற்றியதைப் பார்த்திருக்கிறோம்.  அரசியல் ஆதாயம் தேடும் அவலத்தினையும் கண்டுவிட்டோம்.

புத்தாண்டினை வரவேற்க, தில்லியில் இருக்கும்
திருப்பதி பாலாஜி கோவிலில் போட்ட கோலம்

மொத்தத்தில் சில கஷ்டங்கள் இருந்தாலும், 2015 நன்றாகவே கழிந்திருக்கிறது. வரும் ஆண்டிலும் அனைவருக்கும் நல்லதே கிடைக்க எல்லாம் வல்லவனைப் பிரார்த்திக்கிறேன். 

இந்த வருடத்தில் குறைந்தது 200 பதிவுகளாவது எழுத நினைத்திருக்கிறேன். ஆனால் அலுவலகத்தில் இருக்கும் பணிச்சுமையில் தொடர்ந்து எழுத முடியும் என்று தோன்றவில்லை.  இருந்தாலும் மாதத்திற்கு  சில பதிவுகளாவது எழுத வேண்டும்......

அனைவருக்கும் இனிய புத்தாண்டு நல்வாழ்த்துகள்.  இந்த நாளும் வரும் எல்லா நாட்களும் இனிதாய் அமைந்திட்டடும்......

நட்புடன்

வெங்கட்

புது தில்லி.