மிடறு – குறுங்கவிதைகள்.....

மே மாதத்தின் ஒரு ஞாயிறு – விதைக்கலாம் நிகழ்வுக்காக புதுக்கோட்டை சென்ற போது நண்பர்கள் கஸ்தூரி ரெங்கன், தென்றல் கீதா, ஸ்ரீமலையப்பன் ஸ்ரீராம் ஆகியோர்களை சந்தித்தேன். விதைக்கலாம் நிகழ்வு பற்றி ஏற்கனவே எனது பக்கத்தில் ”விதைக்கலாம் – மரம் நடுவோம் வாங்க” என்ற தலைப்பில் எழுதி இருக்கிறேன். சந்திப்பின் போது சகோ தென்றல் கீதா அவர்கள் எனக்கு சில கவிதைப் புத்தகங்களைத் தந்தார்கள்.  அவற்றில் ஒன்று தான் இன்று நாம் பார்க்கப் போகும் “மிடறு” எனும் குறுங்கவிதைகள் தொகுப்பு.

மே மாதம் கொடுத்தது, அப்போதே படித்தது என்றாலும் இதுவரை அந்தத் தொகுப்பினை வாசித்த அனுபவம் பற்றி பகிர்ந்து கொள்ளவில்லை. இந்த ஞாயிறில் அந்தத் தொகுப்பினை வாசித்துக் கொண்டிருந்தேன்.  அதிலிருந்து எனக்குப் பிடித்த சில குறுங்கவிதைகள் – இதோ இன்றைக்கு இங்கே ஒரு பதிவாக......  “மிடறு” – ஆசிரியர் சா முருகதாஸ். வெளியிட்டோர் - கலகம் வெளியீட்டகம் - இந்த நூலின் விலை ரூபாய் 70.  புத்தகத்தில் எனக்குப் பிடித்த சில குறுங்கவிதைகள் இதோ.....

விலை உயர்ந்தது

வாங்கப் பணமில்லை

கைகொட்டி சிரித்தது பொம்மை.

மண்புழுவை கோர்த்து

மீன் பிடித்தான்

ஏழைக்கு இலவசம்.

சாலை முழுவதும் கண்ணீர்

முன்னே

மணல் லாரி.

மழைக்காக உண்ணாவிரதம்

மடிந்தது

புல்வெளி.

ஆறு காணாத மக்களுக்கு

தாகம் தீர்த்தது காவேரி

தண்ணீர் லாரியின் பெயர்.

அழகான மழை

ரசிக்கவில்லை

வாசலில் வடகம்.

என்ன பெயர் வேண்டுமானாலும் வை.

பிறக்கும் போது குழந்தை

இறக்கும் போது பிணம்.

இங்கே எடுத்துக் காட்டியிருக்கும் குறுங்கவிதைகள் வெகுசிலவே.  இதைத் தவிர புத்தகத்தில் தொகுத்திருக்கும் பலவும் எனக்குப் பிடித்தவையே.....  புத்தகத்தினைக் கொடுத்த சகோ கீதா அவர்களுக்கு நன்றி.  கவிதைகளோடு இப்பதிவில் வெளியிட்டு இருக்கும் படங்கள் நான் எடுத்தவை....

நாளை வேறு ஒரு பதிவில் சந்திக்கும் வரை....

நட்புடன்

வெங்கட்.

புது தில்லி.