WhatsApp – வரமா சாபமா?

என்ன திடீர்னு WhatsApp பத்தி பதிவு எழுதறீங்க? என்று நீங்கள் கேட்பதற்கு முன்னர் ஒரு WhatsApp செய்தி ஒன்று உங்கள் ரசனைக்கு......

வாட்ஸப் க்ரூப் அட்ராசிட்டீஸ்……

'எங்கடி ஃபேஸ்புக்ல ஆளே காணோம்?'

'கொஞ்சம் பிஸி டி'

'வாட்ஸப்ல ஆன்லைன்லயே இருக்க, ஆனா இந்த பக்கம் மட்டும் வர்றதேயில்ல'

'ஹி ஹி  கொஞ்சம் வாட்ஸப் க்ரூப்ல பிஸியா இருக்கேன்டி'

'அதனால தான் நைட்ல கூட ஆன்லைனா',,??

'ஆமா'

'இப்ப எத்தனை க்ரூப்ல இருக்க?'

'பதினொன்னு'

'அடிப்பாவி போன மாசம் கேட்டப்ப கூட ஆறோ ஏழோ க்ரூப்ஸ் தான் சொன்ன?'

'இப்ப புது க்ரூப்ஸ் நெறையடி'

'என்ன புது க்ரூப்ஸ்? '

'ஸ்கூல் க்ரூப் ஒண்ணு'

'ஆமா அதுல தான் நானும் இருக்கேனே'

'இல்லடி இது மூணாவது வரைக்கும் வரைக்கும் ஒ்ண்ணாப் படிச்சவங்க'

'ம்ம் அப்புறம்?'

'ட்யூஷன் க்ரூப் ஒண்ணு'

'ஆமா நானும் இருக்கேனே அதுல'

'இல்லடி இது கெமிஸ்ட்ரி ட்யூஷன் க்ரூப், நீ இருக்கறது ஃபிஸிக்ஸ் ட்யூஷன் க்ரூப்ல'

'ஓ இது வேறயா? அப்புறம்....'

குழந்தைகள் ஸ்கூல் மிஸ்லாம் இருக்காங்க இல்ல.. அவங்களோட ஒரு க்ரூப்..

தேவைதான்.. அப்பறம்..?

எங்க ஃபேமிலி க்ரூப் நாலு...

என்னது...பேமிலி க்ரூப் நாலா..?? உங்க பேமிலியில மொத்தமே நாலு பேர் தானடி ..??

இல்ல... நாங்க ஓரகத்திங்க எல்லாம் ஒரு க்ரூப்...

வெளங்கும்.... அப்பறம்....??

எங்க வீட்டுக்காரரோட சித்தப்பா பெரியப்பா பசங்க எல்லாரும் சேர்ந்து ஒரு க்ரூப்..

எங்க பேமிலி பிரதர்ஸ் லாம் ஒரு க்ரூப்....

தெய்ய்ய்வமே.....

'நமக்கு தெரிஞ்ச க்ரூப் அட்மின்ஸ் எல்லாம் இருக்காங்க தான, அவிங்க எல்லாம் சேர்ந்து ஒரு க்ரூப்'

'எதுக்குடி வேலை வெட்டி இல்லாம?

சரி. விடு. வேற?'

'எங்க ஏரியா ஹவுஸ் மெய்ட்ஸ் எல்லாம் ஒரு க்ரூப் வச்சிருக்காங்க'

'ஹவுஸ் மெயிட்ஸ் க்ரூப்ல உனக்கு என்னடி வேலை?'

'இல்ல, நான் தான் அந்த க்ரூப் கோ- அட்மின்'

'அட கொடுமையே! சரி அப்ப கூட நீ சொன்ன கணக்கு சரிவரலையே, இன்னும் ஒரு க்ரூப் இடிக்குதே'

'ம்ம்ம் ஆமா'

'என்னடி க்ரூப் அது?'

'நீ என்னை பத்தி ஏதாவது நெனச்சுக்குவே'

'க்கும்ம்ம் இதுக்கு மேலயுமா? சொல்லித் தொலை'

'அது போன ஜென்மத்துல ஒன்னா இருந்தவங்க எல்லாரும் இப்ப சேர்ந்து ஒரு க்ரூப் ஆரம்பிச்சிருக்கோம்...'

'அடியேய்ய்ய்ய்ய்... நல்ல்ல்லா இருடீ இவளே!'

என்ன நண்பர்களே....  மேலே படித்த்தை ரசிச்சீங்களா? இப்ப பதிவு எழுத வேண்டிய விஷயத்துக்கு வரேன்..... 

ரொம்ப நாளாவே இணையத்தில் இருந்தாலும், பதிவுகள் எழுதிட்டு இருந்தாலும், இணையத்தில் உலவுவது எல்லாம் மடிக்கணினி மூலமா தான். சாதாரண அலைபேசி – Camera, Blue Tooth போன்றவை இல்லாத சாதாரண அலைபேசி தான் வைத்திருந்தேன். எங்கேயாவது போகும்போது, குறிப்பா மெட்ரோல, விமானத்துல போகும்போது எல்லார் கையிலும் பெரிசு பெரிசா தோசைத் திருப்பி மாதிரி ஃபோன் வைச்சுருக்கும்போது உள்ளங்கைக்குள்ள சின்ன பூச்சி மாதிரி இருக்கற ஃபோன எடுத்து பேசவே கொஞ்சம் வெட்கமா தான் இருக்கும். 

ஆனாலும், Android, Blackberry அலைபேசிகளை அலுவலகத்திற்குள் எடுத்துச் செல்ல முடியாது என்பதாலும், பெரும்பாலான நேரங்களில் அலுவலகத்திலேயே இருப்பதால் இது போன்ற அலைபேசியை வாங்கினாலும், வீட்டிலேயே வைத்துச் செல்ல வேண்டும் என்பதாலும் வாங்காமலேயே இருந்தேன். ஒவ்வொரு முறை ஊருக்கு வரும்போதும், நண்பர்களைப் பார்க்கும்போதும் என்னய்யா இது, எல்லாரும் புதுசு புதுசா Android phone வச்சுருக்காங்க, நீ மட்டும் பச்சை பட்டன், சிவப்பு பட்டன் வைச்ச அந்தக் காலத்து ஃபோன் வச்சுருக்கைய்யா என்று நிறைய பேர் கிண்டல் பண்ணவும் செய்தார்கள்.

இத்தனை நாளாக அதிலிருந்து விலகியே இருந்த நானும் இப்போது களத்தில் குதித்து விட்டேன். சமீபத்தில் ஒரு Android அலைபேசி வாங்கி, அதற்காகவே ஒரு Nano Sim-ம் வாங்கியாயிற்று.  தெரிந்த அளவு உபயோகித்து, சில பல Apps-உம் தரவிறக்கம் செய்தாயிற்று. முதலில் செய்தது செல்லினம்.... இரண்டாவதாக WhatsApp! வீட்டிலுள்ளவர்களுக்கு கொடுத்தது தவிர இந்த ஒரு வாரத்தில் பத்து நண்பர்களுக்கு இந்த புது எண்ணைக் கொடுத்திருந்தால் அதிகம்!

ஆனாலும் பாருங்கள், அதற்குள் நான்கு WhatsApp Group-களில் என்னைச் சேர்த்திருக்கிறார்கள்.  யார் யார் என்று தெரிந்து கொள்வதற்குள் நாலு Group! இந்த புது அலைபேசியை பயன்படுத்துவது மாலை 07 மணிக்கு மேல் இரவு பத்து மணி வரை மட்டுமே. அலுவலகத்திலிருந்து வீடு திரும்பியபிறகு Wifi On செய்து, அலைபேசியிலும் Wifi ஐ On செய்தால், தொடர்ந்து மணி அடித்துக் கொண்டே இருக்கிறது – நேற்று மாலை பார்த்தபோது 45 New Messages எனக் காண்பிக்கிறது. 

அதிலும் காணொளிகளும், புகைப்படங்களும் வந்தால் ஒவ்வொன்றும் தரவிறக்கம் செய்து பார்க்க வேண்டியிருக்கிறது! தவிர, இதில் பயன்படுத்தப்படும் பல Smiley யின் அர்த்தமும் புரிவதில்லை. என்ன சொல்ல வருகிறார்கள் என்று தெரிந்தால் தானே நான் பதில் சொல்ல! படா பேஜாரா கீதுபா.... 

Group-களில் இருந்து வெளியே வருவது எப்படி என்று தெரிந்து கொண்டேன். சிலவற்றிலிருந்து வெளியே வந்தேன்.  ஏற்கனவே Blog, Facebook, Mail என அனைத்தும் மாலை நேரத்தில் நிறைய நேரம் எடுத்துக் கொள்ள வேண்டியிருக்கிறது – புத்தகங்கள் படிக்க முடிவதில்லை.  இப்போது இந்த Whatsapp….. 

குடும்பத்தினருடன் தினமும் அளவளாவ முடிகிறது என்றாலும் இப்படி தேவையில்லாத விஷயங்களும் வந்து சேர்கிறது...... புதுப்புது Group களில் யாரும் சேர்த்தால், விட்டு விலகி நிற்பது நல்லது என்று தோன்றுகிறது! 

WhatsApp வரமா சாபமா?

யாருக்காவது தெரிஞ்சா சொல்லுங்களேன் ப்ளீஸ்!

மீண்டும் சந்திப்போம்.....

நட்புடன்

வெங்கட்.

புது தில்லி.