Value Your Parents - குறும்படம்

அனைத்து நண்பர்களுக்கும் இனிய காலை வணக்கம். இன்றைய பொழுதை ஒரு இனிமையான வாசகத்துடன் ஆரம்பிக்கலாம்.

 

 

அப்பா – மனைவி இல்லாமல் தானாகவே பெண் குழந்தையை வளர்க்கும் பொறுப்புள்ள ஒரு அப்பா.  ஒரு பழைய ஆட்டோவை தினம் தினம் ஓட்டி அதில் வரும் பணத்தில் தன் மகள் விரும்புவனவற்றை எல்லாம் வாங்கித் தரும் அப்பா.  ஆனால் அப்படி வாங்கித் தரும் எவையுமே அந்த மகளுக்குப் பிடிக்கவில்லை. காரணம் அத்தனை சிறப்பாக இல்லை – அவள் படிக்கும் பள்ளியில் இருக்கும் மாணவர்களுக்கு மத்தியில் தன்னை பார்க்கும்போது அப்படி ஒரு தாழ்வு மனப்பான்மை அவளுக்கு! போதாதென்று அப்படி கூடப் படிக்கும் மாணவ மாணவிகள் இந்தப் பெண்ணை ரொம்பவே படுத்துகிறார்கள்.  முதல் காட்சியிலேயே அவளது காலணிகளை உதைத்துத் தள்ளி எடுக்க வரும் அப்பெண்ணை நடுவில் நிற்க வைத்து சுற்றிச் சுற்றி வந்து மாணவ, மாணவியர்கள் கிண்டல் செய்கிறார்கள்.  அவளுக்கு தனது அப்பாவின் மீது அடங்க முடியாத அளவிற்குக் கோபம் வருகிறது.  ஒவ்வொரு இடத்திலும் அந்தப் பெண் Peer Pressure அவஸ்தைகள் அனுபவிக்கும் போதும் அப்பாவின் மீது கோபம் வருகிறது.  அப்பாவைப் பார்க்கும்போதெல்லாம் எரிந்து விழுகிறார். 

 

அப்பா எவ்வளவு கஷ்டப்பட்டு சம்பாதித்து, போதாத குறைக்கு வீட்டிலுள்ள பொருட்களை விற்றேனும் மகளுக்கு தேவையானதை வாங்கித் தந்தாலும் மகளுக்கு மகிழ்ச்சி இல்லை. ஒரு நாள் ரொம்பவே கோபமாக மகள் திட்டிவிட்டு பள்ளிக்குச் செல்ல, மனதளவில் உடைந்து போய், அவர் வாங்கி வைத்த ஒரு அலைபேசியை வீட்டில் மகள் பார்க்கும்படி வைத்து ஒரு கடிதமும் எழுதி வைக்கிறார்.  பிறகு அழுதபடியே ஆட்டோவினை ஓட்டிக்கொண்டு செல்கிறார்.  அழுத போது வரும் கண்ணீரைத் துடைக்க, எதிரே வரும் வாகனத்துடன் மோதிக்கொள்கிறார்.  அந்த இடத்தில் அந்தப் பெண்ணும் வேறு ஒரு வாகனத்தில் இருக்க ஓடி வந்து பார்த்தபோது தான் தெரிகிறது அடிபட்டது தனது அப்பாவென.  வீடு திரும்பி அப்பாவின் கடிதத்தினைப் படிக்கும்போது தான் ஒவ்வொரு பொருளையும் வாங்க தனது அப்பா என்னவெல்லாம் செய்திருக்கிறார் என்பதைப் படிக்கப் படிக்க கண்களில் கண்ணீர் பெருக்கு!  ரொம்பவே சிறப்பாகச் செய்திருக்கிறார் அந்த அப்பா பாத்திரத்தில் நடித்த நடிகர்.  பெண்ணும் நன்றாகவே நடித்திருக்கிறார்.  பாருங்களேன்.

 

பெற்றவர்கள் தங்கள் மக்களுக்காக என்னவெல்லாம் செய்கிறார்கள் என்பதை பிள்ளைகள் உணர்ந்து கொள்வது கடினம் தான் – தானும் பெற்றோராக ஆகும்போதே தம் பெற்றோரின் வலிகளை உணர்கிறார்கள் இல்லையா…

காணொளியாக இணைத்திருந்தாலும், சில சமயங்களில் யூவில் சென்று தான் பார்க்க வேண்டும் என வரலாம். அதனால் கீழே யூட்யூப் சுட்டியும் கொடுத்திருக்கிறேன். அங்கேயும் சென்று பார்க்கலாம்!

 

Value Your Parents

 

நண்பர்களே, இந்தக் குறும்படம் உங்களுக்குப் பிடித்ததா? இந்தக் குறும்படம் பற்றிய உங்கள் கருத்துகளைச் சொல்லுங்களேன். விரைவில் வேறு ஒரு பதிவுடன் மீண்டும் ச[சி]ந்திப்போம்...

 

நட்புடன்

 

வெங்கட் நாகராஜ்

புது தில்லி