வாசிப்பனுபவம் - நீயும் நானும் சேர்ந்தே செல்லும் நேரமே - இரா. அரவிந்த்

அன்பின் நண்பர்களுக்கு, இனிய காலை வணக்கம். இந்த நாளில் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட சந்தித்ததும் சிந்தித்ததும் வலைப்பூ - நண்பர்களின் பார்வையில் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

தன்னம்பிக்கை ஜெயிக்கும் வரை அவசியம். தன்னடக்கம் ஜெயித்த பின் அவசியம்.

*****

அன்பின் நண்பர்களுக்கு, இந்த நாளில் நாம் பார்க்கப் போகும் பதிவு ஒரு வாசிப்பனுபவம் பதிவு.  நண்பர் இரா. அரவிந்த் அவர்களின் பார்வையில் ஒரு மின்னூல் - அந்த மின்னூலும் வலையுலக நண்பர்கள் திருமதி பானுமதி வெங்கடேஸ்வரன் அவர்களும் திருமதி கீதா ரெங்கன் அவர்களும் இணைந்து எழுதி வெளியிட்ட மின்னூல்!  வாருங்கள் மின்னூல் குறித்த நண்பர் இரா. அரவிந்த் அவர்களின் வாசிப்பனுபவத்தினை படிக்கலாம் - வெங்கட் நாகராஜ்.  

*****

நீயும் நானும் சேர்ந்தே செல்லும் நேரமே: சுய திறமையை மதிக்கும் உறவின் பலம் - இரா. அரவிந்த். 

மாற்றமே மாறாதது என்றாலும், மாற்றம் அனைவராலும் எளிதில் ஏற்கப்படுவதில்லை என்பதே உண்மை. 

கை நிறைய சம்பாதிக்கும் வல்லமை இன்றைய பெரும்பாலான பெண்களுக்கு ஏற்பட்டபோதிலும், அதனால் பெருகும் உளவியல் சிக்கல்களை அனுதினமும் நம் குடும்பங்களில் காண்கிறோம். 

குறிப்பாக, சமூகத்தில் பிரபலம் ஆகிவிட்ட பெண்கள், தம் இல்லத்தில் எதிர்கொள்ளும் உளவியல் சார்ந்த இடர்கள் பெரும்பாலும் வெளியில் தெரியாததாகவும், வலி நிறைந்ததாகவும் இருப்பது வேதனையானது. 

அத்தகைய இடர்கள் குறித்தும், அவற்றைக் கையாளும் நடைமுறைகள் குறித்தும் உணர்த்துவதே, எழுத்தாளர்கள் திருமதி பானுமதி வெங்கடேஸ்வரன் அவர்களும், திருமதி கீதா ரெங்கன் அவர்களும் இணைந்து படைத்துள்ள 'நீயும் நானும் சேர்ந்தே செல்லும் நேரமே' சிறுகதைத் தொகுப்பு. 

இசையுலகில் பிரபலமாக வளர்ந்து கொண்டிருக்கும் கதையின் நாயகி ஸ்ருதி, இசை விமர்சனக் கட்டுரைகள் எழுதிக் கொண்டிருக்கும் கதையின் நாயகனை மணந்த பின், மண வாழ்வில் எழுந்த சிக்கல்களைத் தீர்த்தார்களா என்பதே, நூலின் பெயரைத் தாங்கி வரும் முதல் கதையின் சுவாரசியம். 

'எங்கள் ப்ளாக்' வலைத்தளத்தில் வெளிவந்து பெரும் வரவேற்பைப் பெற்ற இக்கதை, இரண்டு எழுத்தாளர்களால் எழுதப்பட்ட சுவடே இன்றி ஒரே சீரான நடையில் செல்வது அனைவராலும் பாராட்டப்பட்டது. 

கதையின் கருவிற்கேற்ப, இசையின் உன்னத உணர்வுகளை எழுத்திலும் பிரதிபலித்திருப்பது, வாசகர்கள் தாமே வாசித்து அனுபவிக்க வேண்டியவை. 

தம் கணவன் பிரபலமாக இருப்பதை மனைவியர் எதார்த்தமாக ஏற்கும் அதே சமயம், மனைவி, தம்மை விட உலகக் கவனம் பெறுவதை ஏற்க பல ஆண்கள் காட்டும் தயக்கம் கதையில் எதார்த்தமாக காட்டப்பட்டுள்ளது. 

குறிப்பாக, நாயகன் ஷ்ரவண், தன்னை 'மிஸ்டர் ஸ்ருதி' என பத்திரிக்கை குறிப்பிட்டதையும், 'சுருதிப்பெட்டி' என நண்பர்கள் நகைச்சுவையாகப் பட்டப்பெயர் வைத்ததையும் தன் தன்மானத்தின் வீழ்ச்சியாக கருத அம்மனக்காயங்கள், அவள் மீதான குத்தலானச் சொற்களாக வெளிப்படுகின்றன. 

தனது லட்சிய தாகத்தையும், குடும்பத்தின் தேவைகளையும் ஒரே சமயத்தில் நிறைவேற்றுவதில் இன்றைய தலைமுறைப் பெண்கள் சந்திக்கும் சவால்களை எழுத்தாளர்கள் ஒருபுறம் பட்டவர்த்தனமாகக் காட்டியிருக்கிறார்கள். 

மறுபுறம், நாயகன் மன ஓட்டத்தை விவரிக்கும் பகுதிகளில், நாயகன் தன் மனைவி மீது வைத்துள்ள உயரிய மதிப்பும், தன் தன்மானம் பாதிக்கப்பட்டதாக உணரும் தருணங்களில் தன்னை மீறி எழும் சொற்களால் தானும் வேதனையுறுவதையும் எழுத்தாளர்கள் எதார்த்தமாகச் சித்தரித்துள்ளார்கள். 

நம்மை விமர்சிப்போரில், உண்மையான அக்கறை உள்ளோரையும், தத்தம் தாழ்வு மனப்பான்மையை நம் மீதான விமர்சனமாக வைப்போரையும், பொறாமையால் புழுங்குவோரையும் பிரித்துப் பார்க்கும் பக்குவம் அடைவதே, குடும்பம் சரியான ஸ்ருதியோடும், நாதத்தோடும் இயங்கும் வழியாக இக்கதை காட்டுகிறது. 

அத்தோடு, நம்மை சொற்களால் காயப்படுத்துவோரே நம்மைவிட உளரீதியாக அதிகம் பாதிக்கப்பட்டோர் என்ற எதார்த்தத்தை உணர்தலும்; அதனால் பழிவாங்கும்  உணர்வின்றி, நாயகி ஸ்ருதி மற்றும் விக்கியைப் போல உறவை உரமேற்ற கையாண்ட உக்திகளுமே, இக்கதை சமுதாயத்திற்குக் கூறும் செய்திகள் எனலாம். 

குடும்ப வாழ்வை வெற்றிகரமாக எடுத்துச் செல்ல சிறந்த உத்திகளை நூலின் முதல் கதை உணர்த்த, அக்குடும்பத்தின் அடித்தளமான சரியான துணையை தேர்வு செய்தல் குறித்து நூலின் ஏனைய இரு கதைகள் பேசுகின்றன. 

குடும்ப விருப்பத்தை விட தனி சுதந்திரத்தை வலியுறுத்தும் இத்தலைமுறை, தான் தேர்ந்தெடுக்கும் துணையின் பண்புநலன்கள், அவர் சார்ந்த குடும்பத்தாலேயே உருவாக்கப்பட்டவை என்பதை உணரும் அத்தியாவசியத்தை இவ்விரு கதைகள் உணர்த்துகின்றன. 

தாம் தேர்ந்தெடுக்கும் துணையின் முழு குடும்பத்தையும் உணர, ஒரு வித்யாசமான உத்தியைக் கதைக்கருவாக எங்கள் ப்ளாகின் மற்றொரு தளமான நம்ம ஏரியாவில் திரு கௌதம் அவர்கள் சொல்லிக் கதை எழுத வாசகர்களை அழைத்திட அதற்கு, திருமதி பானுமதி வெங்கடேஸ்வரன் அவர்களின் 'என்னோடு வா வீடு வரைக்கும்' சிறுகதை முன் மொழிகிறது. 

அந்த உத்தி நடைமுறையில் செயல்பட்ட விதம், திருமதி கீதா ரெங்கன் அவர்களின் 'சுந்தரி நீயும் குணபதி நானும்' சிறுகதையில் வெளிப்பட்டுள்ளது. 

'அயோக்கியன் வீட்டுக்கு வா னு கூப்பிட மாட்டான், வேற எங்கயோ கூப்பிடுவான்' போன்ற நறுக்குத் தெறித்தார் போன்ற வரிகள், சரியான துணையை அடையாளம் காண்கையில் இத்தலைமுறையினர் மனதில் கொள்ள வேண்டியவை. 

இரு வீட்டு அனுபவங்கள் குறித்து நாயகனும் நாயகியும் வெளிப்படுத்திய வார்த்தைகளில் உள்ள வேறுபாடே, நேர்மறை எண்ணத்தின் வலிமையையும், இன்ப துன்பங்களை பகிர்ந்து வாழ்வதன் அவசியத்தையும் வாசகர்களுக்குக் கடத்துகின்றன. 

அதற்கும் அப்பால், இன்றைய பெரும்பாலான மண முறிவுகளுக்குக் காரணமான, ஒருவரின் நிறைகளை முற்றிலும் மறந்து அவரின் குறைகளையே பெரிதாகக் கருதும் உளநிலை குறித்து கணபதி சுந்தரியிடம் கூறும் அறிவுரை, இத்தலைமுறைக்கு  நூல் விடுக்கும் செய்தி ஆகும். 

இவ்வாறு, சமூகத்தின் பல சிக்கல்களையும் அதற்கானத் தீர்வுகளையும் முன்வைக்கும் இக்கதைத் தொகுப்பை பின்வரும் சுட்டியில் வாங்கி வாசிக்கலாம். 

நீயும் நானும் சேர்ந்தே செல்லும் நேரமே

நட்புடன்,

இரா. அரவிந்த்

******

நண்பர்களே, இந்த நாளில் வெளியிட்ட வாசிப்பனுபவம் பதிவினை நீங்களும் ரசித்திருப்பீர்கள் என நம்புகிறேன்.  பதிவு குறித்த உங்கள் எண்ணங்களை, பின்னூட்டம் வாயிலாக சொல்லுங்கள்.  மீண்டும் வேறு ஒரு பதிவுடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

திருவரங்கத்திலிருந்து...