ஃப்ரூட் சாலட் – 4 – தன்னம்பிக்கை மனிதர்

இந்த வார செய்தி: தன்னம்பிக்கை மனிதர்

உழைப்பாளிகள்.....

[பட உதவி: கூகிள்]

பழைய தில்லி பக்கம் வந்திருக்கும் நண்பர்கள் இங்கு ஓடும் ரிக்‌ஷாக்களைப் பார்த்திருக்கக் கூடும். பீஹார் மற்றும்  உத்திரபிரதேச மாநிலங்களிலிருந்து தலைநகருக்கு வேலை தேடி வரும் பெரும்பாலான மக்கள் செய்யும் வேலை ரிக்‌ஷா ஓட்டுவது தான். இருபது முதல் நாற்பது ரூபாய் வரை வாடகைக்குக் கிடைக்கும் ரிக்‌ஷாக்களை நாள் முழுதும் கஷ்டப்பட்டு ஓட்டினால் நாளொன்றுக்கு இருநூறு ரூபாய் வரை கிடைக்கும். சொந்தமாக ரிக்‌ஷா வாங்கி ஓட்டுவதென்பது நிச்சயம் சாத்தியமில்லை. இவர்களைப் பற்றி என்னுடைய முந்தைய பதிவான“தலைநகரிலிருந்து பகுதி-2”-லும் எழுதி இருக்கிறேன். 

இப்போது இவர்களைப் பற்றி மீண்டும் எழுதக் காரணம் இருக்கிறது. சில நாட்களுக்கு முன் பேட்டரிகளால் இயக்கப்படும் ரிக்‌ஷாக்களை கிழக்கு மற்றும் மத்திய தில்லி பகுதிகளில் அறிமுகம் செய்திருக்கிறார்கள். இவைகளின் மதிப்பு 80,000/- ரூபாய்.  நான்கு பாட்டரிகள் பொருத்தப்பட்ட இவைகள் அறிமுகம் செய்யப்பட்டதிலிருந்தே நல்ல வரவேற்பு. மணிக்கு 30 கிலோமீட்டர் வேகத்தில் செல்லும் இதன் பாட்டரிகளை இரவு முழுவதும் சார்ஜ் செய்ய வேண்டுமாம். இதை வாங்க வங்கியில் கடனுதவியும் தருகிறார்கள்.

தன்னம்பிக்கை மனிதர்.....

எனது வீட்டின் அருகில் இருக்கும் ஒரு ரிக்‌ஷாக்காரர் முன்பு சாதாரண ரிக்‌ஷா ஓட்டிக்கொண்டிருந்தவர் இப்போது, இந்த பாட்டரி ரிக்‌ஷா ஓட்டுகிறார். இவர் சாதாரண மனிதர் அல்ல – விபத்தில் தனது வலது கை முழுவதும் இழந்தவர். ஒரு கையுடனேயே  ஓட்டிக்கொண்டு இருந்தவர் இப்போது இந்த வண்டியை சற்று சுலபமாக ஓட்டுகிறார்.

ஒரு நாள் ராமகிருஷ்ண ஆஸ்ரமம் மெட்ரோ நிலையத்திலிருந்து வீட்டிற்கு வரும்போது அவரது இந்த ரிக்‌ஷாவில் தான் வந்தேன். தன்னுடைய இயலாமையிலும் உழைத்து வாழும் இந்த தன்னம்பிக்கை மனிதர் நிச்சயம் பாராட்டுக்குரியவர் தானே!

இந்த வார முகப்புத்தக இற்றை:

சிறுவன்: தாத்தா, உங்களுக்கு குடும்பக் கட்டுப்பாடுன்னா என்னன்னு தெரியுமா?

தாத்தா: என்ன வயசுல என்ன கேள்வி கேக்குற, எனக்குத் தெரியாது, ஓடு….

சிறுவன்: உங்களுக்குத் தெரியாதுன்னு எனக்குத் தெரியும். தெரிஞ்சிருந்தா உங்க சொத்த 28 பாகமா பிரிக்கத் தேவையிருந்திருக்காது.

இந்த வாரக் காணொளி:

இந்தக் காணொளி 1992-ஆம் வருடம் நடந்த United Nations Conference on Environment and Development-ல் எடுக்கப்பட்டது. ஐந்து நிமிடம் பேசினாலும், உலக நாடுகளிலிருந்து வந்த அனைத்து தலைவர்களையும் வாய்மூடிக் கேட்க வைத்தது இப்பெண்ணின் பேச்சு.  காணொளி 7 நிமிடங்கள் எனினும், நிச்சயம் பார்க்க வேண்டிய ஒன்று. 

இந்த வார குறுஞ்செய்தி: 

அன்பான உறவுகள்.....

அன்பான உறவுகள் உன்னைத் தேடி வரும்போது அதை உண்மையாக நேசி. இந்த உலகத்தில் உன்னை வெறுக்க யாருமே இருக்கமாட்டார்கள்.

படித்ததில் பிடித்தது:

உணவகத்தின் அறிவிப்புப் பலகை...
படம் எடுக்காததால் நானே தயாரித்தது.

ஸ்ரீரங்கத்தில் இருக்கும் ஒரு உணவகத்தின் வெளியே உள்ள கரும்பலகையில் அன்றைய மெனு எழுதி இருந்தது. மெனுவை விட மேலே இருந்த வாசகம் பிடித்தது – “பொறுமை உள்ளவர்களுக்கு மட்டுமே அனுமதி!”  சாப்பிட வந்த சிலர், இட்லி வேகறதுக்குள்ள ”சீக்கிரம் கொண்டுவாய்யா”ன்னு கத்தியிருப்பார்களோ!

மீண்டும் சந்திப்போம்….

நட்புடன்

வெங்கட்.

புது தில்லி.