ஃப்ரூட் சாலட் - 34 – குடியரசுத் தலைவர் மாளிகை – காதலர் தினம்

இந்த வார செய்தி:

தில்லியின் முகல் கார்டன் இந்த மாதம் 15-ஆம் தேதி முதல் அடுத்த மாதம் 17-ஆம் தேதி வரை திறந்திருக்கும். ஒவ்வொரு வருடமும் இந்த நாட்களில் தான் பொதுமக்கள் அனுமதிக்கப் படுவார்கள். இதனால் தமிழகத்திலிருந்து தில்லிக்கு சுற்றுலா நோக்கத்துடன் வரும் பயணிகளால் முகல் கார்டனின் அழகைக் கண்ணாரக் கண்டுகளிக்க முடிவதில்லை என்ற குறை எப்போதும் உண்டு. இதைப் போக்க ஒரு வழி பிறந்திருக்கிறது. நீங்கள் எந்த சமயத்தில் வந்தாலும், குடியரசுத் தலைவர் மாளிகையையும், முகல் கார்டனையும் பார்க்க முடியும்.  

சமீபத்தில், அதாவது திரு பிரணாப் முகர்ஜி அவர்கள் குடியரசுத் தலைவராக பொறுப்பேற்ற பிறகு சில பல மாற்றங்களைக் கொண்டு வந்திருக்கிறார். குடியரசுத் தலைவர் மாளிகையை பொதுமக்களும் கண்டுகளிக்க ஏற்பாடுகள் செய்து இருக்கிறார்.  அதுவும் இதற்கான வழிமுறைகளும் சுலபமாக்கப்பட்டிருக்கின்றன.

நீங்கள் தில்லிக்கு எந்த சமயத்தில் வந்தாலும் முன்கூட்டியே குடியரசுத் தலைவர் மாளிகையைக் காண முன்பதிவு செய்து கொள்ள முடியும் – அதுவும் இணையத்தின் மூலமாகவே. குடியரசுத் தலைவரின் இணைய முகவரியில் இதற்கான சுட்டி இருக்கிறது. இங்கே சென்று நீங்கள் செல்ல விரும்பும் நாளில் தேவையான நேரத்தினையும் தெரிவு செய்து விவரங்கள் அளித்து முன்பதிவு செய்ய வேண்டும். இரண்டு நாட்களில் உங்களுக்கு மின்னஞ்சல் மூலம் பதிவு செய்யப்பட்டதன் விவரம் வந்து சேரும்.

வாரத்தில் மூன்று நாட்கள் – அதாவது வெள்ளி, சனி, ஞாயிறு ஆகிய மூன்று நாட்களில் இந்த ஏற்பாடுகள் உண்டு. இந்த தளத்திலேயே எந்த வழியாக செல்வீர்கள், அங்கே என்ன காண முடியும், செல்லும் போது என்ன பொருட்கள் எடுத்துக் கொண்டு போகக் கூடாது ஆகிய விவரங்களும் இருக்கின்றன.

என்ன அடுத்த பயணத்தின் போது, குடியரசுத் தலைவர் மாளிகையை ஒரு ரவுண்ட் சுற்றி வருவீர்கள் தானே!    

இந்த வார முகப்புத்தக இற்றை:

நாம் வாழும் போது யாரை சிரிக்க வைக்கிறோமோ அவர்கள் தான் நாம் இறக்கும் போது அழுகிறார்கள்! நாம் வாழும்போது யாரை அழ வைக்கிறோமோ அவர்கள் தாம் நாம் இறக்கும்போது சிரிக்கிறார்கள்.

இந்த வார குறுஞ்செய்தி: 

ACCORDING TO A RESEARCH 87% OF YOUNG PEOPLE HAVE BACK PAIN. THE OTHER 13% HAVE NO COMPUTER!

ரசித்த புகைப்படம்: 

ரொம்பவே பசிக்குது போல. திறந்த வாயை மூடலையே?  ”ப்ளீஸ் யாராவது கொஞ்சம் உணவு கொடுங்களேன்....” என்று கேட்பது போல இருக்கு! சரியான நேரத்தில் எடுத்த படம்!

  

ரசித்த காணொளி:

காதலர் தினம் என்று கவிதைகள், கதைகள் என நிறைய விஷயங்கள் எல்லோரும் எழுதியாயிற்று. நான் ஒன்றுமே எழுதவில்லையெனில் ”காதல்னா என்ன விலை?” என்று கேட்கும் ஆளென நினைத்து விடுவார்கள். காதலர் தினம் சமயத்தில் SBI Life Insurance விளம்பரம் அடிக்கடி வந்தது. எனக்கு மிகவும் பிடித்த விளம்பரங்களில் இதுவும் ஒன்று. பாருங்களேன் இந்த முதியவர்களின் காதலை!

ரசித்த பாடல்:

ரசித்த பாடலில் எப்பவும் ரொம்ப பழைய பாடல் தான் போடுவீங்களா,  என்று நண்பர் ஒருவர் கேட்டார். அவருக்காகவே இந்தப் பாடல். வாகை சூடவா படத்திலிருந்து ‘சர சர சாரக்காத்து வீசும்போது’ பாடல். எனக்கு மிகவும் பிடித்த பாடல். நீங்களும் ரசிக்க ஏதுவாய் இங்கே! 

 

படித்ததில் பிடித்தது:

தமிழகம் எங்கும் டாஸ்மாக் திறந்து குடிமக்களை ‘குடி’ மக்களாக மாற்றிக்கொண்டு இருக்கும் வேளையில் இந்தக் கவிதை உங்களுக்காக. அதில் இருக்கும் உண்மை புரிய வேண்டியவர்களுக்குப் புரிய வேண்டுமே :(

எழுதப்பட வேண்டும்

சாராயக் கடை நுகர்வோர் பற்றியும்

அடகுக் கடை வந்து போகும்

பெண்களைப் பற்றியும்

சாராயக் கடைக்கும்

அடகுக் கடைக்கும்

இடையே இருக்கும்

மறைவான சுரங்கப் பாதை பற்றியும்.

-          இரா. உமா மகேஸ்வரி.

மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.