ஃப்ரூட் சாலட் – 42 – ஃபெராரி – பி.பி. ஸ்ரீனிவாஸ் - மரம்

இந்த வார செய்தி:

யூ-ட்யூபில் இந்த வாரம் ஒரு காணொளி பல முறை [இதை எழுதும் போது கிட்டத்தட்ட ஒன்பது லட்சம் ஹிட்ஸ்] காணப்பட்டு இருக்கிறது. அப்படி என்ன காணொளி அது. கார் பந்தயங்களில் பங்கு கொள்ளும் திறன் பெற்ற ஃபெராரி வண்டியை ஓட்டும் காணொளி இது. வெளியிட்ட ஏப்ரல் 10-ஆம் தேதியிலிருந்து இது வரை இத்தனை ஹிட்ஸ்.

அப்படி என்ன இந்த காணொளியில் இருக்கிறது எனச் சந்தேகத்தோடு[!] படிப்பவர்களுக்கு, தவறான நினைப்பு வேண்டாம்....  ஃபெராரி வண்டி எத்தனை வேகமாகச் செல்லும் திறன் கொண்டது என்பதைப் பற்றிச் சொல்ல வேண்டியதில்லை. மிகவும் வேகமாகச் செல்லும் இந்த வண்டியை ஓட்டுவதற்கு தனித் திறமையும் கவனமும் தேவை. சாதாரண சாலைகளில், அதுவும் நமது இந்தியாவின் சாலைகளில் இதைச் செலுத்துவது கடினம்.

கேரளாவில் உள்ள ஷோபா சிட்டி எனும் தனியார் இடத்தில் இந்த ஃபெராரி வண்டியை மிகச் சுலபமாக இரண்டு ரவுண்டுகள் ஓட்டி வந்ததைப் பற்றிய காணொளி தான் இப்படி பிரபலமாக ஆயிருக்கிறது. வண்டியை ஓட்டியது ரொம்பவும் பழகிய ஓட்டுனர் அல்ல! ஒரு ஒன்பது வயது சிறுவன். அவனது பிறந்த நாளுக்குப் பரிசாக ஃபெராரி வண்டி ஓட்டக் கொடுத்திருக்கிறார்கள்.

சிறு வயதிலேயே இந்த ஓட்டும் திறமை இருப்பது பாராட்டத் தக்க விஷயம் என்றாலும், மிகவும் ஆபத்து நிறைந்த விளையாட்டு இது. ஒன்பது வயது சிறுவன் வண்டியை ஓட்ட, அருகில் அவனை விட சிறியவன் உட்கார்ந்து செல்வதைப் பார்க்க முடிகிறது – அதாவது அவ்வண்டியில் பெரியவர்கள் யாருமே இல்லை!

அவசரமாய் முடிவு எடுக்க வேண்டிய நிலையில் இச்சிறுவனால் என்ன செய்து விடமுடியும்....  வேகமாய்ச் செல்லும் போது அவனுக்கும் சக சாலைப் பயணிகளுக்கும் எத்தனை ஆபத்து காத்திருக்கிறது இது போன்ற செயல்களால்.  நினைக்கவே வேதனையாக இருக்கிறது.

காணொளியை நீங்களும் பார்க்க விரும்பினால் இங்கே பார்க்கலாம். 

இந்த வார முகப்புத்தக இற்றை:

இந்த வார குறுஞ்செய்தி: 

LAUGHING AT YOUR OWN MISTAKES, CAN LENGTHEN YOUR LIFE – SHAKESPEARE.

BUT……

LAUGHING AT YOUR WIFE’S MISTAKES, CAN SHORTEN YOUR LIFE – SHAKESPEARE’S WIFE.

ரசித்த புகைப்படம்: 

இந்தப் புகைப்படத்தினைப் பார்த்தவுடன் உங்களுக்கு ஒரு கண் போலத் தோன்றுகிறதா? ஆனால் இது கண்ணின் படம் இல்லை! இது என்ன படம், பின்னூட்டத்தில் சொல்லுங்களேன்! :)

ரசித்த பாடல்:

பழைய படங்களில் பாடிய பலரில் எனக்கு மிகவும் பிடித்த பாடகர் இந்த வாரம் இறைவனடி சேர்ந்த திரு பிரதிவாதி பயங்கரம் ஸ்ரீனிவாஸ் அவர்கள். அவர் பாடிய பல பாடல்களை ஒலிப்பேழைகளில் கேட்டு ரசித்திருக்கிறேன். இந்த வார ஃப்ரூட் சாலட்-ல் அவரது நினைவாக அடுத்த வீட்டு பெண் திரைப்படத்திலிருந்து “மாலையில் மலர் சோலையில்” எனும் இந்த பாடல் உங்கள் ரசனைக்கு. 

ரசித்த விளம்பரம்:

SN Brussels Airlines விளம்பரம் இது. தனது பயணிகளுக்கு இவர்கள் தரும் மரியாதையைப் பாருங்களேன்.....  நான் ரசித்த இந்த விளம்பரத்தினை நீங்களும் ரசிப்பீர்கள் என நம்புகிறேன்.

படித்ததில் பிடித்தது:

மரம்

வீட்டின் முன் உள்ள மரம் ஒன்று

எங்களை இத்தனை பாடுபடுத்தக் கூடாது.

பழுத்து வெடித்த கோணைப்புளியம்பழங்களால்

அடர்ந்து நிறைந்தது அது.

அதன் சிவந்த கனிவு

பாதசாரிகளை மறிக்கிறது.

‘இத்தனை பழங்கள் பழுத்திருக்கின்றனவே…

அவற்றைப் பறித்துண்ண முடியாத

புளி ஏப்பக்காரனா இவ்வீட்டுக்காரன் ?’

பார்த்துச் செல்பவர் பார்வையிலிருந்து

பழுத்துதிர்கிறது பொறாமை.

ஆள் அயரும் சந்தர்ப்பத்திற்காக

பெரும் சிறார் கூட்டம் ஒன்று

ரகசிய போலீஸ்போல

வீதிகளில் திரிகிறது.

மரத்தை

அடிக்கடி இட்டுப் பார்க்கிறது

எங்கிருந்தோ வரும் ஒரு கல்.

முனையில் கேள்விக்குறி மாட்டிய குச்சியோடு

செல்லும் ஒருவன்

வீட்டில் யாருமில்லாவிட்டால்

கொத்துக் கொத்தாய்ப் பறித்துவிட அலைகிறான்.

அது முள்மரமாக இருப்பதால்

யாராலும் தழுவி ஏறப்படாமல் தப்பித்திருக்கிறது.

நாங்களும் பழங்களைப் பறித்துண்பதில்லை.

யாரையும் பறிக்க விடுவதில்லை.

மாற்றான் தோட்ட மலரையும்

மாற்றான் வீட்டு மங்கையையும்

மாற்றான் மரத்துக் கனியையும்

காலந்தோறும்

கவர்ந்துகொண்டேயிருந்திருக்கிறது இவ்வுலகம்.

கனிமரத்தைக் கண்டுசெல்வோனின் கண்ணிலும்

அதே கள்மம் சுடர்கிறது.

அவர்களுக்குத் தெரியுமா

இந்தப் பழமரத்தை நம்பி

பத்துக் கிளிகள் இருக்கின்றன என்பது ?

பதினைந்து தூக்கணாங்குருவிகள்

தினமும் வந்து போகின்றன என்பது ?

சிட்டுகள் சில கூடி

சித்திரம் பயில்வது ? 

-          மகுடேஸ்வரன்.....   

நெய்வேலியில் இருந்த போது வீட்டில் பல சீதாப்பழ மரங்கள். பல நேரங்களில், அணில்கள் உண்வதற்கென்றே பழங்களைப் பறிக்காது விட்டு விடுவோம். அது நினைவில் வந்து மனதைக் கொஞ்சம் நனைத்தது!

என்ன நண்பர்களே இந்த ஃப்ரூட் சாலட்-ஐ ரசித்தீர்களா? மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.