ஓவியத்திற்கு கவிதை – கவிஞர் கணக்காயன் [அன்னம் விடு தூது – 13]

அன்பின் நண்பர்களுக்கு, 20.03.2013 அன்று வெளியிட்ட கவிஞர்களுக்கு/கதாசிரியர்களுக்கு ஒரு அழைப்பு! எனும் பதிவின் அழைப்பினை ஏற்று, வந்திருக்கும் ஒரு கவிதையை இன்று இங்கே பகிர்ந்துள்ளேன். கணக்காயன் எனும் வலைப்பூவில் எழுதி வரும் கவிஞர் கணக்காயன் அவர்கள் எழுதிய கவிதை இது.

அன்னம் விடு தூது பகிர்வுகள் வரிசையில் இது பதிமூன்றாம் பகிர்வு.

 

பட உதவி: சுதேசமித்திரன் 1957

 

சிற்றூரின் நீள்சாலை, ஓர்ப்பக்கம் நன்நீழல்

சுற்றுமுள ஓங்குமரம், சுந்தரியாள் அங்கமர,

பற்றோடும் ஈரன்னம், பக்குவமாய் நீருணியில்,

நற்றவமே ஆற்றல்போல், தம்மன்பை நேர்பகிர்ந்து,

புற்றரையின் மாதினுக்கு புத்திமதி சொல்கிறதோ?

வற்றாத நல்லுரவு வாகாகப் பெற்றிடற்கே?

காற்றாலே ஊருணியின் நீர்ப்பரப்பில் காண்சலனம்,

ஏற்றாற்போல் தாமரைப்பூ கூம்பியவை சற்றசைவு,

ஆற்றாமை நெஞ்சத்தே, ஆறலைக்கும் எண்ணங்கள்

சேற்றினிலே வாழ்தவளை சேர்த்தொலிக்கும் சத்தங்கள்,

தோற்றமாம் பலமீன்கள் ஒக்கனமாய் நீந்துமெழில்,

தேற்றத்தை தந்திடுமோ ஏந்திழைக்கு இச்சூழல்?

மாற்றமிலா ஏமாற்றம் மாணிழைக்கு எஞ்சிடுமோ?

-          கவிஞர் கணக்காயன்.

என்ன நண்பர்களே இப்பகிர்வினை ரசித்தீர்களா? பகிர்வுக்கான பாராட்டுகளுக்கு உரியவர் ஆசிரியர் மட்டுமே! பகிர்வினை எழுதிய கவிஞர் கணக்காயன் அவர்களுக்கு ஒரு பூங்கொத்து!

அடுத்த பதிவில் சந்திக்கும் வரை.....

நட்புடன்

வெங்கட்.

புது தில்லி.