ஜ்யோதிசர் – ரத்த பூமி பகுதி 5

தொடரின் முந்தைய பகுதிகளுக்கான சுட்டிகள் கீழே.....

ரத்த பூமி - ஒரு புகைப்பட முன்னோட்டம் [பகுதி 1]

பிரம்ம சரோவர் - ரத்த பூமி பகுதி 2

சர்வேஷ்வர் மகாதேவ் - ரத்த பூமி பகுதி 3

பீஷ்ம குண்ட் – ரத்த பூமி பகுதி 4

ரத்த பூமி தொடரில் நாம் அடுத்ததாகப் பார்க்கப் போகும் இடம் ஜ்யோதிசர்.  இந்த இடம் மஹாபாரத யுத்தத்தில் மிக முக்கிய பங்கு வகித்த ஒரு இடம். மஹாபாரத யுத்தத்தின் போது அர்ஜுனன் போர் புரிய தயங்க, இங்கே தான் ஸ்ரீக்ருஷ்ண பகவான் கர்மா-தர்மா ஆகிய இரண்டிலும் உள்ள வித்தியாசத்தினை அர்ஜுனனுக்கு விளக்கமாய் சொன்ன இடம் – அதாங்க – இந்த இடம் தாங்க கீதோபதேசத்தின் பிறப்பிடம்.

குருக்ஷேத்திரா நகரத்திலிருந்து பெஹோவா கிராமத்திற்குச் செல்லும் வழியில் ஐந்து கிலோ மீட்டர் தொலைவில் இருக்கும் இடம் தான் இந்த ஜ்யோதிசர். இந்த இடத்தில் ஒரு பெரிய ஆலமரம். அந்த மரத்தின் கீழே தான் கீதோபதேசம் நடைபெற்றதாக நம்பிக்கை. இந்த இடத்தில் பல்வேறு கால கட்டங்களில் பலவித கட்டுமானங்கள் செய்யப்பட்டு இருப்பதாக வரலாறு கூறுகிறது.

காஷ்மீரத்தின் அரசர் இவ்விடத்தில் ஒரு சிவ லிங்கத்தினைப் பிரதிஷ்டை செய்து வழிபட்டதாகவும், பீஹார் மாநிலத்தின் தர்பங்கா அரசர் ஆலமரத்தினைச் சுற்றி கற்களைக் கொண்டு பீடம் எழுப்பியதாகவும் இங்கே தகவல் பலகைகள் தெரிவிக்கின்றன. பக்கத்திலேயே ஒரு குளமும் உண்டு. வரும் சுற்றுலாப்பயணிகள் இக்குளத்தில் குளிக்கவும் வசதிகள் இருக்கின்றன.

இப்போது இங்கே இருக்கும் ஆலமரம் சுற்றிலும் கற்கள் பதிக்கப்பட்டு ஆலமரத்தினையும், அங்கே வைத்திருக்கும் சிவலிங்கத்தினையும் வழிபட வசதிகள் செய்து வைத்திருக்கிறார்கள்.  கீதோபதேசம் என்று சொன்னவுடன் உங்களுக்கெல்லாம் தேரின் அருகே நின்று கொண்டு இருக்கும் கிருஷ்ணன் நினைவுக்கு வருவார்.

இந்த இடத்தினைக் கண்டு பிடித்து உலகத்தினருக்கு அறிவித்தது ஆதி சங்கரர் என்றும் இங்கே சொல்கிறார்கள். இந்த இடத்தில் 1964-ஆம் ஆண்டு காஞ்சி மடத்தின் அப்போதையான பீடாதிபதியான மஹா பெரியவர் மார்பிள் கல்களால் அமைக்கச் செய்து கிருஷ்ணோபதேச காட்சியை நமது கண்முன்னே கொண்டு வந்து இருக்கிறார். கிழக்கு நோக்கி அமைக்கப்பட்டிருக்கும் இச்சிலையைப் பார்க்கும்போது நாமும் மஹாபாரத காலத்திற்கு மனதளவில் சென்று வருகிறோம்.

பக்கத்திலேயே தங்கும் வசதிகளும் உண்டு. இங்கே இருக்கும் மக்கள் பழமையான பானை வேலைகள், மர வேலைப்பாடுகள், [Dha]தரி என்று சொல்லப்படும் ஜமக்காளம் போன்ற தரைவிரிப்புகள் செய்வது என பல தொழில்களில் ஈடுபட்டுள்ளார்கள். இவை இங்கே விற்பனையும் செய்யப்படுகின்றன. நாங்கள் சென்றபோது அங்கே எப்போதும் போலவே நிறைய சுற்றுலா பயணிகளின் நடமாட்டம். இது காணாது என அங்கே ஏதோ அரசியல் கூட்டமும்.

கூட்டத்திற்கு, மக்களின் கூட்டத்திற்குக் கேட்கவா வேண்டும். வழியெல்லாம் வாகனங்கள், சிறு வியாபாரிகள், அரசியல்வாதிகள் என ஒரே கூட்டம். வெயில் ஆரம்பித்து விட்டதால் குளிர்பான்ங்களும், தண்ணீர் விற்பனையும் அமோகமாக நடைபெற்றுக் கொண்டிருந்தது. கீதோபதேச காட்சியினை 3D படங்களாகப் போட்டு விற்பனை செய்து கொண்டிருந்தான் ஒரு சிறுவன்.

பிளாக்கோமேனியா பிடித்து ஆட்டுவதால், எங்கே சென்றாலும் பதிவுக்கு விஷயம் தேடுவது வழக்கமாகி விட்ட்து. ஜ்யோதிசர் சென்றிருந்தபோது ஒரு பேருந்து நிறைய சுற்றுலா பயணிகள். நிறைய பெண்கள் குறைவாகவே ஆண்கள். அப்படி வந்திருந்த பெண்களில் இருவருக்குள்ளே எதோ பிரச்சனை. கார சாரமாக விவாதம் – எங்கே அடிதடியில் முடியுமோ என்ற நிலை. என்ன தான் சண்டை, அவர்கள் பேசுவது ‘ராஜா காது, கழுதை காது” பகுதிக்கு உதவுமோ என, காதை நீட்டினேன்! சண்டை என மட்டுமே தெரிந்து கொள்ள முடிந்தது – பேசியது ஒரு வார்த்தை புரியவில்லை – அவர்கள் பேசியது அசாமிய மொழி! மொழி புரியாவிட்டாலும் நம் ஊர் குழாயடிச் சண்டைக்கு இவர்கள் ஏற்றவர்கள் என்ற எண்ணம் தோன்றியது.

ஒருவேளை இந்த இடத்தின் ராசியோ....  இங்கே தானே மஹாபாரத யுத்தமே ஆரம்பித்தது! :)

இவங்க சண்டை எங்கே கைகலப்பாக மாறி, கையில் கிடைத்ததை வீசப் போகிறார்களோ என பயந்து அங்கிருந்து விலகினேன். அடுத்து நாம் செல்லப் போவது எங்கே! ரொம்பவே மனசைக் குழப்பிக்கொள்ளாதீங்க! அடுத்த புதன் தெரிந்துவிடப் போகிறது!

மீண்டும் சந்திக்கும் வரை....

நட்புடன்

வெங்கட்.

புது தில்லி.