பிச்சை – குறும்படம்

சென்ற புதன் அன்று கேட்பாரற்று – குறும்படம் என்ற பகிர்வில் முதியோர் இல்லத்தில் நடக்கும் ஒரு படத்தினைப் பார்த்தோம். இந்த வாரம் வேறு ஒரு குறும்படம்....   என்ன குறும்படம், என்ன மொழி என்றெல்லாம் உங்களுக்கு கேள்வி எழலாம்! அதற்கு முன்னரே சொல்லி விடுகிறேன்.

இந்த வார குறும்படம் தமிழ் மொழி படம் அல்ல. இந்த குறும்படம் மலையாளத்தில். ஆனாலும் சுலபமாக புரியும் படிதான் இருக்கும்.  அதனால் பயப்பட வேண்டியதில்லை. குறும்படம் எனும்போது பேசப்படும் வசனங்கள் மிகக் குறைவே. படம் பற்றிய சிறு குறிப்பு இதோ.

இரண்டு நண்பர்கள் ஒரு பழைய இரண்டு சக்கர வாகனத்தில் கேரளத்தின் மரங்கள் நிறைந்த காட்டு வழியாக வந்து கொண்டிருக்கிறார்கள். பின்பக்கத்தில் அமர்ந்திருக்கும் நபரை முக்கிய சாலைக்கு வந்து பேருந்து நிறுத்தத்தில் கொண்டு விடுகிறார். அங்கே கண் தெரியாத ஒரு பெரியவர் பிச்சை எடுத்துக் கொண்டு இருக்கிறார். ஆள் நடமாட்டம் புரிந்தவுடன், உட்கார்ந்திருந்த பெரியவர் தட்டுத் தடுமாறி எழுந்து வந்து அந்த இளைஞரிடம் ஒரு தேநீர் குடிக்க காசு கேட்கிறார்.

அந்தப் பெரியவரிடம் “ஆயிரம் ரூபாய்க்கு சில்லறை இருக்குமா? இல்லை ஆஸ்திரேலியா டாலர் தந்தால் மாற்றிக் கொள்கிறாரா?” என்றெல்லாம் கேட்டு அவரைக் கிண்டல் செய்து சிரிக்கிறார்கள் இரு நண்பர்களும். இருசக்கர வாகனத்தில் வந்த நண்பர் இவரை விட்டுச் சென்ற பின் என்ன நடக்கிறது, லிஃப்ட் கேட்ட வேண்டிய அவசியம் ஏன் ஏற்பட்டது, அவருக்கு லிஃப்ட் கிடைத்ததா, இல்லையா என்பதைக் குறும்படத்தினைப் பார்த்து தெரிந்து கொள்ளுங்கள்!

உங்கள் ரசனைக்கு இதோ அந்த குறும்படம்.... 

எளியோரைக் கண்டு எள்ளி நகையாடல் கூடாது என்பதை இங்கே அழகாய்ச் சொல்லி இருக்கிறார் இந்த குறும்படத்தினை எடுத்த இயக்குனர் பாலு. அந்த இயக்குனருக்கும், அவரது சகாக்களுக்கும் வாழ்த்துகளும் பூங்கொத்தும்!

மீண்டும் வேறொரு பகிர்வில் உங்களைச் சந்திக்கும் வரை.....

நட்புடன்

வெங்கட்.

புது தில்லி.