சில ஓவியங்கள்….

தீபாவளிக்கு இப்பல்லாம் ரெடிமேட் உடைகள் தானே வாங்குகிறோம். அப்படி சட்டை வாங்கும்போது அதை மடித்து வைக்கும் கடைக்காரர்கள் உள்ளே ஒரு தடியான அட்டையை வைத்து மடிப்பார்கள். சட்டையை போட்டுக்கொள்ள அதைப் பிரிக்கும்போது அந்த அட்டையை பொதுவாய் எடுத்து குப்பையில் போட்டுவிடுவார்கள்.  எங்க வீட்டுல அதைக்கூட எடுத்து வைத்து விடுவது உண்டு! எதுக்காவது பயன்படும்னு அம்மணி சொல்வாங்க!

என் மகள் கையில் அந்த அட்டை கிடைக்க அதிலிருந்து செவ்வகமாக ஒரு அட்டையை வெட்டி, மீதி இருக்கும் அட்டையில் இன்னும் சில வடிவங்களில் வெட்டி அதில் கலர் பென்சில் கொண்டு வரைந்து எதையாவது செய்து கொண்டிருப்பாள்.  அப்படி அவள் தயாரித்த இரண்டு ஓவியங்கள் இங்கே கொடுத்துள்ளேன்! மூன்றாவது ஒரு பென்சில் ஓவியம்!

முதல் ஓவியம்….

வான மண்டலத்தில் பறந்து கொண்டிருக்கும் மூன்று ஹாட் ஏர் பலூன்கள்.  ”அதில் யாரும்மா உட்கார்ந்து இருக்காங்க!”ன்னு கேட்டா, ”ஒரு பலூன்ல ஒருத்தர் தாம்பா உட்காரணும் – ஒண்ணுல நீ, இன்னொண்ணுல அம்மா, கடைசி பலூன்ல நான்!” பலூன்களும், கீழே இருக்கும் கூடைகளும் தனித்தனியே வெட்டி வரையப்பட்டவை. பிறகு அதை பெரிய செவ்வகத்தில் ஒட்டியிருக்கிறார்!

இரண்டாவது ஓவியம்…..

ஒரு மலை. மலையை முட்டியபடிச் செல்லும் மேகங்கள்.  மலை மீது ஒரு வீடு. பக்கத்தில் சூரியன். அது சரி கீழே உடைகள் தொங்குகிறதே? இரண்டு ஐஸ்க்ரீம் குச்சிகள் கீழே ஒரு நூல் கட்டி அதில் துணி காயப் போட்டிருக்கு! :)

மூன்றாவது – பென்சில் ஓவியம்

போகோ சானலில் வரும் பீம் மற்றும் நண்பர்கள் இப்போதைய எல்லாக் குழந்தைகளுக்கும் மிகவும் பிடித்தவர்கள். இங்கே லட்டு உண்ணும் பீமின் படத்தினை வரைந்திருக்கிறார் பென்சிலால்!

என்ன நண்பர்களே ஓவியங்களை ரசித்தீர்களா!

மீண்டும் வேறொரு பதிவில் சந்திக்கும் வரை…..

நட்புடன்

வெங்கட்.

திருவரங்கத்திலிருந்து…..