ஓவியக் கவிதை – 4 – திருமதி பி. தமிழ்முகில் நீலமேகம்

டிசம்பர் மாதம் ஏழாம் தேதி “கவிதை எழுத வாருங்கள்” என்ற தலைப்பில் என்னுடைய வலைப்பூவில் ஒரு படத்தினை வெளியிட்டு கவிதை எழுத அழைப்பு விடுத்திருந்தேன். வருகிற 31-ஆம் தேதி வரை கவிதைகள் எழுதி அனுப்பலாம் எனவும் அதில் சொல்லி இருந்தேன். இந்த வேண்டுகோளுக்கு செவி சாய்த்து சில நண்பர்கள் கவிதைகளை எழுதி அனுப்பி இருக்கிறார்கள். அந்த வரிசையில் இது நான்காம் கவிதை.

ஓவியம் எழுத அழைப்பு விடுத்து, வெளியிட்ட ஓவியம் திரு ராஜன் அவர்களின் கைவண்ணத்தில் உருவானது. ஓவியம் கீழே.

இந்த ஓவியத்திற்கான கவிதை எழுதிய திருமதி பி. தமிழ் முகில் நீலமேகம் அவர்கள் பற்றிய சிறு குறிப்பு:

முகிலின் பக்கங்கள் எனும் வலைப்பூவில் கவிதைகள் படைத்து வரும் திருமதி தமிழ் முகில் அவர்கள் பக்கத்தில் நிறைய கவிதைகள் இருக்கின்றன. ”வல்லமை” இணைய இதழில் அவரது படைப்புகள் பல வெளி வந்திருக்கின்றன. தொடர்ந்து கவிதைகள் படைத்திட எனது வாழ்த்துகள்.

திருமதி தமிழ் முகில் அவர்கள் மேலே கொடுத்த ஓவியத்திற்கு எழுதிய கவிதையை ரசிக்கலாம் வாருங்கள்....

கார் முகிலென நங்கையவள்  குழல்

காற்றில் அலை பாய

கண்ணாளன் சூட்டிய மலர்ச் சரமோ

கானகமெங்கும் மணம்  பரப்ப

காளையவன் மனமும் கன்னியவள்

கவின்தனில்  மயங்கி பின் தாவ

காரிகையோ வெட்கத்தில் முகம் சிவக்க

கனியிதழ் வார்த்தைகள் எல்லாம்

கண்ணாமூச்சி காட்டி ஒளிந்து கொள்ள

கண்களின் சம்பாஷனைகள் அவ்விடம் அரங்கேற

காதல் பார்வையோடு மெளனமே மொழியாகிட

காசினியே கைகளில் தஞ்சம் அடைந்திட

காதல் மொழி  கிளிகள் இரண்டின்

கானமழை நனைத்திடுமே -

கானகத்தை காதல் மழையிலே !!!

-    திருமதி பி.தமிழ் முகில் நீலமேகம்

என்ன நண்பர்களே, கவிதை ரசித்தீர்களா?  இந்த ஓவியத்திற்கான நான்காம் கவிதை இது. கவிதை படைத்த திருமதி பி. தமிழ் முகில் நீலமேகம் அவர்களுக்கு ஒரு அழகிய பூங்கொத்து!

வரும் 31-ஆம் தேதி வரை நேரமிருக்கிறது. அதாவது இந்த வருடத்தின் கடைசி நாள்! இன்னும் சில நாட்களே இருக்கிறது வருடம் முடிய! கவிதை எழுத விருப்பம் இருப்பவர்கள் ஓவியத்திற்கான கவிதை எழுதி எனது மின்னஞ்சலில் [venkatnagaraj@gmail.com] அனுப்பி வைத்தால் கவிதை வந்த வரிசைப்படி ஒவ்வொன்றாய் எனது பக்கத்தில் வெளியிடுகிறேன். இங்கே வெளியிட்ட பிறகு உங்கள் பக்கத்திலும் வெளியிடலாம்.

மீண்டும் வேறொரு பகிர்வில் சந்திக்கும் வரை......

நட்புடன்

வெங்கட்.

புது தில்லி.