சுவரொட்டி – குறும்படம்

ஒவ்வொரு புதன் கிழமையும் குறும்படம் ஒன்றை பகிர்ந்து கொள்ளும் ஆசை அதிகரித்து விட்டது. அதற்காகவே YOUTUBE-ல் குறும்படங்களை பார்ப்பதும் அதிகரித்து விட்டது.  ஒரு சில படங்கள் மனதை மிகவும் தொட்டு விடுகிற படங்களாக இருக்கின்றன. சென்ற வார ஞாயிறில் பார்த்ததில் இரண்டு மூன்று குறும்படங்கள் மிகவும் கவர்ந்தன.  அவற்றில் ஒன்று இந்த புதன் கிழமை – மனதினைத் தொட்ட படமாக இங்கே உங்கள் ரசனைக்கு.

கலைஞர் தொலைக்காட்சியில் வரும் “நாளைய இயக்குனர்” நிகழ்ச்சியில் வெளிவந்து அங்கே விருது பெற்ற குறும்படம் இது என தெரிவித்து இருந்தார்கள். நிச்சயம் விருது பெறக் கூடிய கருத்தினைக் கொண்ட திரைப்படம் தான் சுவரொட்டி.  திரையரங்கில் காட்டும் படங்களுக்கான சுவரொட்டிகளை ஒட்டும் ஒருவருக்கும், பூ விற்கும் ஒரு பெண்ணிற்கும் உண்டாகும் காதல் மிக அழகாகக் காண்பிக்கப் பட்டுள்ளது இக்குறும்படத்தில்.

முதல் முதலில் ஒரு படத்திற்கான சுவரொட்டி ஒட்டப் போகும் இரவு வேளையில் அந்தப் பெண்ணையும் ஒரு இளைஞனையும் சந்திக்கிறார் கதாநாயகன். அந்த இளைஞர் பூ விற்கும் பெண்ணை தொந்தரவு செய்ய, அவரிடமிருந்து காப்பாற்றுகிறார்.  அதன் பிறகு கொஞ்சம் கொஞ்சமாக சுவரொட்டி ஒட்டும் இளைஞருக்கு தான் காப்பாற்றிய பெண்ணின் மேல் காதல் வளர்கிறது – அதை அழகாய் “காதல்” படத்தின் 25-வது நாள், 50-ஆவது நாள், 100-வது நாள் சுவரொட்டி ஒட்டிக் காண்பிக்கிறார். நூறாவது நாள் தனது காதலைச் சொல்லப் போகும்போது என்ன நடக்கிறது? படத்தினைப் பாருங்களேன்!

என்னைக் கவர்ந்த இக்குறும்படம் உங்களையும் கவரும் என்ற நம்பிக்கையில் இங்கே பகிர்ந்து கொண்டிருக்கிறேன்.

இந்த அருமையான குறும்படத்தினை இயக்கியவருக்கும், இக்குறும்படத்தில் பணிபுரிந்தவர்களுக்கும் எனது மனமார்ந்த வாழ்த்துகள். இதனை YOUTUBE-ல் இணைத்தவர்களுக்கும் நன்றி. 

என்ன நண்பர்களே, குறும்படத்தினை ரசித்தீர்களா? மீண்டும் அடுத்த புதன் அன்று வேறு ஒரு குறும்படம் காண தயாராக இருங்கள்.

மீண்டும் சந்திக்கும் வரை......

நட்புடன்

வெங்கட்.

புது தில்லி.