ஓவியக் கவிதை – 5 – கவியாழி கண்ணதாசன்

டிசம்பர் மாதம் ஏழாம் தேதி “கவிதை எழுத வாருங்கள்” என்ற தலைப்பில் என்னுடைய வலைப்பூவில் ஒரு படத்தினை வெளியிட்டு கவிதை எழுத அழைப்பு விடுத்திருந்தேன். வருகிற 31-ஆம் தேதி வரை கவிதைகள் எழுதி அனுப்பலாம் எனவும் அதில் சொல்லி இருந்தேன். இந்த வேண்டுகோளுக்கு செவி சாய்த்து சில நண்பர்கள் கவிதைகளை எழுதி அனுப்பி இருக்கிறார்கள். அந்த வரிசையில் இது ஐந்தாம் கவிதை.

ஓவியம் எழுத அழைப்பு விடுத்து, வெளியிட்ட ஓவியம் திரு ராஜன் அவர்களின் கைவண்ணத்தில் உருவானது. ஓவியம் கீழே.

இந்த ஓவியத்திற்கான கவிதை எழுதிய கவியாழி கண்ணதாசன் அவர்கள் பற்றிய சிறு குறிப்பு:

கவியாழி எனும் வலைப்பூவில் கவிதைகள் படைத்து வரும் திரு கவியாழி கண்ணதாசன் அவர்கள் தனது வலைப்பூவில் வாரத்திற்கு நான்கைந்து கவிதைகளையாவது வெளியிடுகிறார்.  இவரை இந்த ஆண்டு செப்டம்பர் மாதம் ஒன்றாம் தேதி நடைபெற்ற இரண்டாவது பதிவர் சந்திப்பில் தான் முதன் முறையாகச் சந்தித்தேன். சற்று நேரமே பேச முடிந்தாலும் மனதில் நின்றவர்! தொடர்ந்து அவரது தளத்திலும், புத்தகங்களிலும் படைப்புகள் எழுதி புகழ் அடைந்திட எனது வாழ்த்துகள்.

மேலே கொடுத்துள்ள ஓவியத்திற்கு கவியாழி கண்ணதாசன் அவர்கள் எழுதிய கவிதையை ரசிக்கலாம் வாருங்கள்....

மார்கழிப் பூவை சூடியதால்

மங்கையே மயக்கம் வருகிறதா 

மன்னவன் என்னிடம் ஏன்

மலருக்கே  தயக்கம் வருகிறது

தேனிக்களும் வண்டுகளும்

தேனிசை ராகமாய் பாடுகிறது

மயிலும மானுமே மகிழ்ந்து 

மகிழ்ச்சியாய் இங்கு  ஓடுகிறது

நங்கையே நல்லமுதே சுவையே

நானருந்த உனக்கு  நாணமே

நாழியும் கடப்பதாய் கோபமோ

நல்விருந்து படைக்கிறேன் வா

என் அருகில் நீயும் வா

என் மடியில் சாய்ந்திடவா

நின் இதழ் எனக்குத் தா 

நிலையை மறந்த மகிழ்ச்சியைத் தா

-          கவியாழி கண்ணதாசன்

என்ன நண்பர்களே, கவிதை ரசித்தீர்களா?  இந்த ஓவியத்திற்கான ஐந்தாம் கவிதை இது. கவிதை படைத்த கவியாழி கண்ணதாசன் அவர்களுக்கு ஒரு அழகிய பூங்கொத்து!

வரும் 31-ஆம் தேதி வரை நேரமிருக்கிறது. அதாவது இந்த வருடத்தின் கடைசி நாள்! இன்னும் சில நாட்களே இருக்கிறது வருடம் முடிய! கவிதை எழுத விருப்பம் இருப்பவர்கள் ஓவியத்திற்கான கவிதை எழுதி எனது மின்னஞ்சலில் [venkatnagaraj@gmail.com] அனுப்பி வைத்தால் கவிதை வந்த வரிசைப்படி ஒவ்வொன்றாய் எனது பக்கத்தில் வெளியிடுகிறேன். இங்கே வெளியிட்ட பிறகு உங்கள் பக்கத்திலும் வெளியிடலாம்.

மீண்டும் வேறொரு பகிர்வில் சந்திக்கும் வரை......

நட்புடன்

வெங்கட்.

புது தில்லி.

முந்தைய பகுதிகள்:

ஓவியக் கவிதை - 1 - திரு இ.சே. இராமன்

ஓவியக் கவிதை - 2 - திரு காரஞ்சன் [சேஷ்]

ஓவியக் கவிதை - 3 - திரு ரா. ஈ. பத்மநாபன்

ஓவியக் கவிதை - 4 - திருமதி பி. தமிழ் முகில் நீலமேகம்