ஃப்ரூட் சாலட் – 70 – தண்ணீர் தரும் ATM - பொய் - சொன்னது யார்?

இந்த வார செய்தி:

ஹிமாச்சல் நகரின் ஷிம்லா பற்றி நாம் எல்லோருக்கும் தெரியும். ’சிம்லா ஸ்பெஷல்” போன்ற எத்தனை படத்தில் பார்த்திருப்போம்! அங்கே தண்ணீரால் பரவும் மஞ்சள் காமாலை போன்ற நோய்கள் குளிர் காலத்தில் நிறையவே பரவி வருகிறது. ஒவ்வொரு வருடமும் குளிர் காலம் வரும்போது கூடவே தண்ணீரால் பரவும் நோய்களையும் கூட்டிக்கொண்டு வருகிறதாம்.  இது அரசாங்கத்தினைக் கொஞ்சம் ஆட்டி வைக்க, என்ன செய்யலாம் என மண்டையைப் போட்டு குழப்பி ஒரு புது வித யோசனையை செய்திருக்கிறார்கள். 

”பணத்தை தண்ணீர் மாதிரி செலவு செய்யறான்” அப்படின்னு சிலர் சொல்லி கேட்டு இருப்பீங்களே, அந்த பணம் எடுக்க இப்பல்லாம் வங்கிகள் பல இடங்களில் ATM [Any Time Money] அமைத்து அவர்கள் தரும் அடையாள அட்டையைச் சொருகி வேண்டிய பணத்தினை எடுத்துக் கொள்ளும் வசதி தருவது போல தண்ணீரையும் தந்தால்! எப்படி இருக்கும் என யோசித்து, ஷிம்லா மற்றும் சில சுற்றுலா தளங்களிலும், பக்தர்கள் நிறைய வரும் புனிதத் தலங்களிலும் ஏற்பாடு செய்ய முடிவு செய்திருக்கிறார்கள்.

ஒரு லிட்டர் தண்ணீருக்கு 30 முதல் 50 பைசா வரை வசூலித்து தண்ணீரை இயந்திரம் மூலம் தர, முதலில் ஆறு இடங்களில் சோதனை முறையில் ஆரம்பிக்க இருக்கிறார்கள்.  இனிமேல் ATM மூலம் பணம் மட்டும் வராது, தண்ணீரும் வர இருக்கிறது! இதற்கான பிரத்யேக தண்ணீர் ATM அமைக்க சில அமைப்புகளிடம் கேட்டிருக்கிறார்கள். 

அவர்கள் இந்த தண்ணீர் ATM அமைப்பது மட்டுமின்றி, தரும் தண்ணீர் சுத்தமானது தானா என்பதை அவ்வப்போது பரிசோதனையும் செய்ய வேண்டும். அரசாங்கமும் தனது பங்கிற்கு சோதனைகளைச் செய்து வரும்.  இப்படி சுத்தமான குடிதண்ணீர் தருவதன் மூலம் எல்லா குளிர் காலங்களிலும் இங்கே வரும் தண்ணீர் மூலம் பரவும் வியாதிகளை நீக்க நினைக்கிறது ஹிமாச்சல பிரதேச அரசாங்கம்.....

முயற்சி வெற்றி பெறுமா? பொறுத்திருந்து தான் பார்க்க வேண்டும்! அந்த இயந்திரம் எப்படி இருக்கப் போகிறது என்பதையும் காண காத்திருக்கத்தான் வேண்டும்! 

இந்த வார முகப்புத்தக இற்றை:

பொய் சொல்லி தப்பிக்க நினைக்காதே. உண்மையைச் சொல்லி மாட்டிக்கொள். ஏனென்றால் பொய் வாழவிடாது. உண்மை சாகவிடாது – விவேகானந்தர்.

இந்த வார குறுஞ்செய்தி: 

WHAT LIES BEHIND US AND WHAT LIES BEFORE US ARE TINY MATTERS WHEN COMPARED TO WHAT LIES WITHIN US – RALPH WALDO EMERSON.

இந்த வார புகைப்படம்: 

இந்த புகைப்படமும் நான் எடுத்தது தான். ஃபாரின் சாக்லேட் சாப்பிட்டதும் அதைச் சுற்றிய பேப்பரை தூர எறிந்து விடாது அதில் பொம்மை செய்தார்கள்! அழகாய் இருக்கவே அதைப் படம் பிடித்தேன்.

சொன்னது யார்?:

சமீபத்தில் ஒரு பழைய பாடல் கேட்டேன். அதற்கு முன்னர் படத்தின் கதாநாயகர் ஒரு வசனம் பேசுகிறார்..... 

“ஆசையல்ல, வெறி. நான் சாகும் போதும் தமிழ் படித்துச் சாக வேண்டும். என் சாம்பலும் தமிழ் மணந்து வேக வேண்டும்!”

இதைச் சொன்னது யாராக இருக்கும்? சொல்லுங்களேன் பின்னூட்டத்தில்!

ரசித்த விளம்பரம்:

கோத்ரேஜ் டி.வி.டி. ப்ளேயர் வந்த புதிது. அதற்கான ஒரு விளம்பரம் – மொத்தமே முப்பது நொடிகள் வரும் இந்த விளம்பரத்தினைப் பாருங்கள் – விற்கும் பொருளின் தரத்தை எப்படி விளம்பரம் செய்கிறார்கள் என! 

படித்ததில் பிடித்தது!:

இந்த வார படித்ததில் பிடித்தது ஹிந்தி மொழியிலிருந்து மொழிபெயர்த்தது. பகிர்ந்து கொண்ட தோழிக்கு நன்றி.

கணவனின் பிறந்தநாளுக்கு பரிசு தரவிரும்பிய மனைவி:  உங்களுக்கு பிறந்த நாள் பரிசு தர நினைத்திருக்கிறேன். என்ன வேண்டும் சொல்லுங்க!

கணவன்: எனக்கு பரிசு வேண்டாம்.

மனைவி: இல்லை சொல்லுங்க என்ன பரிசு வேணும்?

கணவன்: என்னை காதலுடன் பார்; என்னை மதித்து நடந்து கொள், என்னிடம் மரியாதையோடு பேசு. இதைச் செய்தாலே பெரிய பரிசு தான்!

மனைவி: அதெல்லாம் முடியாது! நான் பரிசு தான் தருவேன்!

என்ன நண்பர்களே இந்த ஃப்ரூட் சாலட்-ஐ ரசித்தீர்களா? மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.