ஃப்ரூட் சாலட் – 72 – நால்வர் அணி – மார்கழி திங்கள் – மனைவி

இந்த வார செய்தி:

பாவனம்மா, ரசியாம்மா, லதிகா மற்றும் திலகா எனும் நால்வர் அணி பெங்களூரில் இருந்து பூனே செல்லும் வழியில் இருக்கும் திப்பரெட்டி ஆட்டோ நகர் எனும் இடத்தில் ஒரு உணவகம் நடத்திக் கொண்டிருக்கிறார்கள். இந்த உணவகத்தினை ஆரம்பிக்க எந்த வங்கியும் கடன் கொடுக்காத நிலையில் நண்பர்களுடைய உதவி மூலம் உணவகத்தினை ஆரம்பித்து இருக்கிறார்கள் நால்வரும்.

இன்றைக்கு நாளொன்றுக்கு 7000 ரூபாய் வரை மொத்த விற்பனை நடக்க, இன்னும் தங்களது உணவகத்தினை விரிவு படுத்த முயற்சித்துக் கொண்டிருக்கிறார்கள்.

பொதுவாக இவர்களைப் போன்றவர்கள் ரயில்களில் பிச்சை எடுப்பது போன்ற தொழில்களில் ஈடுபட்டிருக்க, தங்களாலும் உழைத்து சம்பாதிக்க முடியும் என்பதை நிரூபித்துக் கொண்டிருக்கும் இந்த நாலவரும் திருநங்கைகள்.

திருநங்கைகளால் நடத்தப்படும் உணவகம் என்பதால் பலர் இங்கே உணவருந்த தயக்கம் காட்டினாலும், இவர்களது உணவின் சுவை பற்றிய தகவல் தெரிந்து இப்போது இவர்களுக்கும், இவர்களது உணவகத்திற்கும் ஆதரவு தருகிறார்களாம்.

உணவகம் ஆரம்பித்த சில நாட்களுக்கு பிரச்சனைகள் இருந்தாலும் அவற்றை சமாளித்து தொடர்ந்து உணவகத்தினை நடத்தி வரும் இவர்கள், தங்களது சமூகத்தில் மாதிரிகளாக மதிக்கப்படுவதாக பெருமையுடன் கூறுகிறார்கள். தங்களது உணவகங்களில் தங்களைப் போன்றவர்களுக்கே வேலை கொடுத்து அவர்களையும் நல்வழிப்படுத்துவதாக தெரிவித்து இருக்கிறார்கள்.

இந்த நல்ல மனிதர்களுடைய வாழ்க்கை முன்னேற்றப் பாதையில் தொடர்ந்து சொல்ல வாழ்த்துவோம்.  

இந்த வார முகப்புத்தக இற்றை:

ஒரு கணவனும் அவரது மனைவியும் காலாற நடந்து சென்று கொண்டிருந்தார்கள். அப்போது தெருவில் கிடந்த கல் ஒன்றில் கணவன் இடித்துக் கொள்ள, காலில் இருந்து ரத்தமாகக் கொட்டியது. கணவனுக்கு ரத்தம் கொட்டுகிறது என்றால் உடனே தனது உடையிலிருந்து [சேலை/துப்பட்டா] ஒரு பகுதியைக் கிழித்து கட்டு போடுவது நம் நாட்டு வழக்கமல்லவா?  கணவனும் தன்னுடன் வந்திருந்த மனைவியைப் பார்த்தார்.  அதற்கு அந்த மனைவி சொன்ன பதில்:

..

..

..

..

..

..

..

..

துப்பட்டாவை கிழிச்சு கட்டு போடுவேன்னு நினைச்சுக் கூடப் பார்க்காதீங்க! நான் போட்டுட்டு இருக்கறது Designer துப்பட்டா!

  
இந்த வார குறுஞ்செய்தி: 

NEVER BLAME ANYONE IN YOUR LIFE. GOOD PEOPLE GIVE YOU HAPPINESS. BAD PEOPLE GIVE YOU EXPERIENCE. WORST PEOPLE GIVE YOU LESSON. AND THE BEST PEOPLE GIVE YOU MEMORIES.

இந்த வார புகைப்படம்: 

இந்த புகைப்படம் எடுக்கப்பட்டது இரண்டு மூன்று மாதங்களுக்கு முன்னர்.  தமிழகத்தில் திருச்சி அருகே இருக்கும் ஒரு கோவிலின் கோபுரம். கோவில் பற்றிய தகவல்களும் மற்ற புகைப்படங்களும் விரைவில் வரலாம்!

ரசித்த பாடல்:

தலைப்பில் மார்கழி திங்கள் எனப் பார்த்து மார்கழி மாதம் பற்றி ஏதோ எழுதப் போகிறேன் என நினைத்து விட வேண்டாம். நேற்று யூவில் ஏதோ பாடல் தேடிக் கொண்டிருக்கும் போது இந்த பாடல் பார்த்தேன். நான் ரசித்த இந்த “மார்கழித் திங்களல்லவா” பாடல் – சங்கமம் படத்திலிருந்து உங்கள் ரசிப்பிற்கு! 

ரசித்த விளம்பரம்:

இந்தியன் ரயில்வே பற்றிய விளம்பரங்கள் நீங்கள் பார்த்ததுண்டா? இந்த விளம்பரம் பொதுவாக நமது ரயில் நிலையங்களில் நீங்கள் பார்க்கும் விஷயங்களை அழகாய்ச் சொல்கிறது. கூடவே ஒரு அருமையான அறிவுரையும் சொல்கிறது. பாருங்களேன்.

படித்ததில் பிடித்தது!:

சுடுகின்ற நெருப்புக்கு

சூட்சுமம் தெரியாது!

விடிகின்ற பொழுதுக்கு

விரோதம் தெரியாது!

பொழிகின்ற மழைக்கு

பொறாமை தெரியாது!

இரவுக்கும் பகலுக்கும்

இனபேதம் தெரியாது!

இந்த மனிதனுக்கு மட்டும்தான்

எல்லாமே தெரிந்து தொலைக்கிறது!

     வி. செயலட்சுமி.

என்ன நண்பர்களே இந்த ஃப்ரூட் சாலட்-ஐ ரசித்தீர்களா? மீண்டும் ஃப்ரூட் சாலட்-உடன் அடுத்த வெள்ளியன்று சந்திக்கும் வரை…

நட்புடன்

வெங்கட்.
புது தில்லி.