ஓவியக் கவிதை – 2 – திரு காரஞ்சன் [சேஷ்]

டிசம்பர் மாதம் ஏழாம் தேதி “கவிதை எழுத வாருங்கள்” என்ற தலைப்பில் என்னுடைய வலைப்பூவில் ஒரு படத்தினை வெளியிட்டு கவிதை எழுத அழைப்பு விடுத்திருந்தேன். வருகிற 31-ஆம் தேதி வரை கவிதைகள் எழுதி அனுப்பலாம் எனவும் அதில் சொல்லி இருந்தேன். இந்த வேண்டுகோளுக்கு செவி சாய்த்து சில நண்பர்கள் கவிதைகளை எழுதி அனுப்பி இருக்கிறார்கள். அந்த வரிசையில் இந்த பகிர்வில் இரண்டாம் கவிதை.

ஓவியம் எழுத அழைப்பு விடுத்து, வெளியிட்ட ஓவியம் திரு ராஜன் அவர்களின் கைவண்ணத்தில் உருவானது. ஓவியம் கீழே.

இந்த ஓவியத்திற்கான கவிதை எழுதிய திரு சேஷாத்ரி [காரஞ்சன்] அவர்கள் பற்றிய சிறு குறிப்பு:

காரஞ்சன் சிந்தனைகள் எனும் வலைப்பூவில் எழுதிக் கொண்டிருக்கும் திரு சேஷாத்ரி புதுவையில் வசிப்பவர்.  இந்த கவிதை அழைப்பில் முதல் கவிதையை எழுதிய திரு இ.சே. இராமன் அவர்களின் உறவினர். இதுவரை நேரில் சந்தித்தது இல்லையென்றாலும் சில சமயங்களில் அலைபேசி மூலம் பேசியது உண்டு. சில படங்களைத் தேர்ந்தெடுத்து அவற்றுக்கான கவிதைகளை அவ்வப்போது தனது பக்கத்தில் வெளியிடுவார். அத்தனையும் சிறப்பான பகிர்வுகள்.  

திரு சேஷாத்ரி ஓவியத்திற்கு எழுதிய கவிதையை ரசிக்கலாம் வாருங்கள்....

    பொங்கிவரும் அன்புடனே

நங்கையவள் கூந்தலிலே

நறுமண மலர்ச்சரத்தை

நாயகன்தான் சூட்டிவிட

எங்கிருந்து வந்தனவோ?

இத்தனை வண்டினங்கள்!

பூவிதழில் தேனருந்த

போட்டியாய் வந்தனவோ?

வலிமைமிகு கரத்தாலே

வண்டினத்தை அவன் விரட்ட

நாணித் தலைசாய்க்கும்

நங்கையவள் கண்ணிரண்டும்

வண்டுகளாய் மாறி

வாலிபனை மொய்ப்பதென்ன?

                                                -காரஞ்சன் (சேஷ்)

என்ன நண்பர்களே, கவிதை ரசித்தீர்களா?  இந்த ஓவியத்திற்கான இரண்டாம் கவிதை இது. கவிதை படைத்த திரு சேஷாத்ரி அவர்களுக்கு ஒரு அழகிய பூங்கொத்து!

வரும் 31-ஆம் தேதி வரை நேரமிருக்கிறது. கவிதை எழுத விருப்பம் இருப்பவர்கள் ஓவியத்திற்கான கவிதை எழுதி எனது மின்னஞ்சலில் [venkatnagaraj@gmail.com] அனுப்பி வைத்தால் கவிதை வந்த வரிசைப்படி ஒவ்வொன்றாய் எனது பக்கத்தில் வெளியிடுகிறேன். இங்கே வெளியிட்ட பிறகு உங்கள் பக்கத்திலும் வெளியிடலாம்.

மீண்டும் வேறொரு பகிர்வில் சந்திக்கும் வரை......

நட்புடன்

வெங்கட்.

புது தில்லி.

முந்தைய பகுதி:

ஓவியக் கவிதை - 1 - திரு. இ.சே. இராமன்