சந்தித்ததும் சிந்தித்ததும்: ஓவியக் கவிதை

வியாழன், 2 ஜனவரி, 2014

ஓவியக் கவிதை – 7 –காயத்ரி

டிசம்பர் மாதம் ஏழாம் தேதி “கவிதை எழுத வாருங்கள்” என்ற தலைப்பில் என்னுடைய வலைப்பூவில் ஒரு படத்தினை வெளியிட்டு கவிதை எழுத அழைப்பு விடுத்திருந்தேன். வருகிற 31-ஆம் தேதி வரை கவிதைகள் எழுதி அனுப்பலாம் எனவும் அதில் சொல்லி இருந்தேன். இந்த வேண்டுகோளுக்கு செவி சாய்த்து சில நண்பர்கள் கவிதைகளை எழுதி அனுப்பி இருக்கிறார்கள். அந்த வரிசையில் இது ஏழாம் கவிதை.

ஓவியம் எழுத அழைப்பு விடுத்து, வெளியிட்ட ஓவியம் திரு ராஜன் அவர்களின் கைவண்ணத்தில் உருவானது. ஓவியம் கீழே.

இந்த ஓவியத்திற்கான கவிதையை மின்னஞ்சல் மூலம் அனுப்பிய காயத்ரி அவர்களுக்கு எனது மனமார்ந்த நன்றி.

மேலே கொடுத்துள்ள ஓவியத்திற்கு காயத்ரி அவர்கள் எழுதிய கவிதையை ரசிக்கலாம் வாருங்கள்....

என்னவனே என்னை மயக்கிய மன்னவனே

கண்ணாளனே என்னை களவாடிய கள்வனே

உன்னோடு நான் கொண்ட காதல் பசலையில்

என் மேனியும் குருதியாய் திகைக்கிறதே

மோகத்தீயில் நான் எரிய மேகமாய் உன் காதல் மழை பொழிய‌

யாருமில்லா நந்தவனத்தில் மன்னவனே

நீ சூடிய மலரினில் உன் வாசம் வீச‌

வெட்கத்தில் உன் மார்போடு என் முகம் புதைக்க‌

வேனீர்காலமும், பனிக்காலமாய் குளிர்கிறதே

என்னவரை சீண்டிவிடும் சில்லென தென்றல் காற்று,

என்னை கட்டி அணைத்து.., விரலோடு விரல் கோர்த்து,

இதழோடு இதழ் சேர்த்து கண்கள் மூடி காதல்

சொர்கத்திற்கு நாங்கள் செல்ல, ஒற்றை நிலவு மட்டும்

எங்களை ஏக்கத்தோடு பார்த்து கொண்டு இருக்க,

விண்மின்கள் அர்ச்சனை தூவ, நிலவுக்கு ஆறுதல் சொல்லி விட்டு

திரும்பினோம் மீண்டும் காதல் சொர்கத்திற்குச் செல்ல.

- காயத்ரி

என்ன நண்பர்களே, கவிதை ரசித்தீர்களா? இந்த ஓவியத்திற்கான ஏழாம் கவிதை இது. கவிதை படைத்த காயத்ரி அவர்களுக்கு ஒரு அழகிய பூங்கொத்து!

டிசம்பர் 31-ஆம் தேதி வரை வந்த மொத்த கவிதைகள் பதிமூன்று மட்டுமே. அவை வந்த வரிசையிலேயே எல்லா கவிதைகளும் வரும் நாட்களில் இங்கே பதிவு செய்யப்படும். கவிதை எழுதி அனுப்பிய அனைத்து நல்லுள்ளங்களுக்கும், கவிதைகளை ரசித்துக் கருத்து பகிரும் நண்பர்களுக்கும் மனமார்ந்த நன்றி.

மீண்டும் வேறொரு பகிர்வில் சந்திக்கும் வரை......

நட்புடன்

வெங்கட்.

புது தில்லி.