ஓவியக் கவிதை – 8 – திரு இராய செல்லப்பா.

டிசம்பர் மாதம் ஏழாம் தேதி “கவிதை எழுத வாருங்கள்” என்ற தலைப்பில் என்னுடைய வலைப்பூவில் ஒரு படத்தினை வெளியிட்டு கவிதை எழுத அழைப்பு விடுத்திருந்தேன். வருகிற 31-ஆம் தேதி வரை கவிதைகள் எழுதி அனுப்பலாம் எனவும் அதில் சொல்லி இருந்தேன். இந்த வேண்டுகோளுக்கு செவி சாய்த்து சில நண்பர்கள் கவிதைகளை எழுதி அனுப்பி இருக்கிறார்கள். அந்த வரிசையில் இது எட்டாம் கவிதை.

ஓவியம் எழுத அழைப்பு விடுத்து, வெளியிட்ட ஓவியம் திரு ராஜன் அவர்களின் கைவண்ணத்தில் உருவானது. ஓவியம் கீழே.

இந்த ஓவியத்திற்கான கவிதை எழுதிய திரு இராய செல்லப்பா அவர்கள் பற்றிய சிறு குறிப்பு:

செல்லப்பா தமிழ் டைரி எனும் வலைப்பூவில் தொடர்ந்து எழுதி வரும் திரு இராய செல்லப்பா அவர்கள் எங்கள் ஊர் தில்லியில் சில காலம் இருந்தவர் எனத் தெரிந்த போது மகிழ்ச்சி.  வெகு விரைவில் அவரது சிறுகதைத் தொகுப்பு ”தாத்தா தோட்டத்து வெள்ளரிக்காய்” புத்தகமாக வெளிவர இருக்கிறது – அகநாழிகை வெளியீடாக. சமீபத்தில் நடந்த சென்னை பதிவர் சந்திப்பில் இவரைப் பார்த்திருந்தாலும் பேசவில்லை. அடுத்த சென்னை பயணத்தின் போது சந்திக்க வேண்டும்.    

மேலே கொடுத்துள்ள ஓவியத்திற்கு திரு இராய செல்லப்பா அவர்கள் எழுதிய கவிதையை ரசிக்கலாம் வாருங்கள்....

வண்டே ஓடி மறைந்திடு!

பூவினும் மெல்லிய பூ இவள்! – இந்தப்

பொய்கையின் வண்டுகள் சூழ்வதோ?

பூந்தேன் உண்ணும் போக்கிலே – இவள்

பூவுடல் தீண்டுதல் நியாயமோ?

செந்தா மரைமுகம் ஏந்தியே - இரு

செவ்விள நீர்களும் தாங்கியே

கொண்டா டும் விழி நாணியே – இவள்

கொஞ்சிடும் போதுன் தொல்லையோ?

காதல் என்பது போர்க்களம்- இந்தக்

கன்னியின் மஞ்சமோ பூக்களம்! – பிறர்

பார்த்திடக் காதல் செய்வதோ? - பூ

வண்டே ஓடி மறைந்திடு!

-          -    கவிஞர் இராய செல்லப்பா, சென்னை

என்ன நண்பர்களே, கவிதையை ரசித்தீர்களா?  இந்த ஓவியத்திற்கான எட்டாம் கவிதை இது. கவிதை படைத்த திரு இராய செல்லப்பா அவர்களுக்கு ஒரு அழகிய பூங்கொத்து!

டிசம்பர் 31-ஆம் தேதி வரை வந்த மொத்த கவிதைகள் பதிமூன்று மட்டுமே.  ஒரு சிலர் கேட்டுக் கொண்டதற்கு இணங்க, இந்த கடைசி தினத்தினை இன்னும் கொஞ்சம் தள்ளி வைத்துவிட முடிவு செய்துவிட்டேன். ஆகையால் ஜனவரி-10-ஆம் தேதி நள்ளிரவு வரை எனது மின்னஞ்சலுக்கு அனுப்பி வைக்கிற அத்தனை கவிதைகளும் அவை வந்த வரிசையிலேயே எல்லா கவிதைகளும் வரும் நாட்களில் இங்கே பதிவு செய்யப்படும். கவிதை எழுதி அனுப்பிய அனைத்து நல்லுள்ளங்களுக்கும், கவிதைகளை ரசித்துக் கருத்து பகிரும் நண்பர்களுக்கும் மனமார்ந்த நன்றி.

மீண்டும் வேறொரு பகிர்வில் சந்திக்கும் வரை......

நட்புடன்

வெங்கட்.

புது தில்லி.

முந்தைய பகுதிகள்:

ஓவியக் கவிதை - 1 - திரு இ.சே. இராமன்

ஓவியக் கவிதை - 2 - திரு காரஞ்சன் [சேஷ்]

ஓவியக் கவிதை - 3 - திரு ரா. ஈ. பத்மநாபன்

ஓவியக் கவிதை - 4 - திருமதி பி. தமிழ் முகில் நீலமேகம் 

ஓவியக் கவிதை - 5 - திரு கவியாழி கண்ணதாசன்

ஓவியக் கவிதை – 6 – அம்பாளடியாள்

ஓவியக் கவிதை – 7 – காயத்ரி