கைச்சிலம்பாட்டம்

தலைநகரிலிருந்து பகுதி - 25

இந்த வருடம் பொங்கல் திருநாளை கொண்டாடும் விதமாக தமிழ்நாடு இயல், இசை, நாடக மன்றமும் தில்லித் தமிழ்ச் சங்கமும் இணைந்து நடத்திய ”மாபெரும் தை தமிழ் விழா 2014” தில்லித் தமிழ்ச் சங்கத்தில் ஜனவரி 17,18 மற்றும் 19-ஆம் தேதிகளில் நடைபெற்றது. முதல் இரண்டு நாட்களும் என்னால் கலந்து கொள்ள இயலவில்லை. ஞாயிற்றுக் கிழமை வேறு சில இடங்களுக்குச் சென்றுவிட்டு தமிழ்ச் சங்கத்தினை அடைந்த போது மணி மாலை 07.00. அப்போதுதான் கிராமியக் கலைஞர்களை கௌரவித்துக் கொண்டிருந்தார்கள்.

முதல் இரண்டு நாட்கள் நடைபெற்ற நிகழ்வுகள் பற்றி நண்பர் பத்மநாபன் சொல்லிக் கொண்டிருந்தார். ஞாயிறு அன்று நடைபெற்றது மூன்றே நிகழ்ச்சிகள் என்றாலும் முத்தான நிகழ்ச்சிகள். முதலில் திருச்சி கல்லூரி ஒன்றில் படிக்கும் நான்கு மாணவிகளின் கரகாட்டம், அதன் பிறகு பொய்க்கால் குதிரை ஆட்டம், நிறைவாக கைச்சிலம்பாட்டம்.

கரகாட்டம் வெகு சிறப்பாக இருந்தது. கல்லூரியில் படிக்கும் இந்த பெண்கள் நமது மாநிலத்தின் பாரம்பரிய கலைகளில் ஒன்றான கரகாட்டத்தினை இன்னும் தொடர்ந்து கொண்டிருப்பது பாராட்டுக்குரியது. இவர்கள் நடனம் முடிந்த போது அறிவிப்பாளர் சொன்ன விஷயம் ஒன்றினை இங்கே பகிர்ந்து கொள்வது சிறப்பாக இருக்கும் என்பதால், அதையும் இங்கே எழுதுகிறேன். இந்த வருடம் குடியரசு தின விழாவில் தமிழக அரசின் சார்பில் இவர்கள் நான்கு பேரும் கரகம் ஆட இருக்கிறார்கள். இந்த யுவதிகளுக்கு உங்கள் சார்பில் எனது பாராட்டுகள்!

பொய்க்கால் குதிரை ஆட்டமும் மிகவும் சிறப்பாக இருந்தது. மராட்டியர்கள் வழி வந்த இந்த கலை இன்னமும் தஞ்சை பகுதிகளில் இருக்கிறது. தஞ்சை பகுதியில் இருந்து தான் இன்றைய நிகழ்வில் பொய்க்கால் குதிரை ஆட்டம் நடத்திய இருவரும் வந்திருந்தார்கள்.  இவர்கள் நடுவே ஒரு சிறிய மேஜிக் நிகழ்ச்சியும் நடத்தினார்கள். இந்த இருவரும் கணவன் – மனைவி என்பது கூடுதல் தகவல்.   

என்னை மட்டுமல்லாது, திரளாக வந்திருந்த தமிழ் மக்கள் பலரையும் வெகுவாக ஈர்த்தது கைச் சிலம்பாட்டம் என்று அறிமுகப்படுத்தப்பட்ட ஆட்டம் தான்.  முதலில் அறிவிப்பு செய்தபோது ஏதோ கழி வைத்து விளையாடும் சிலம்பாட்டம் என்று நினைத்திருந்தேன்.  மேடையில் வந்த கிராமியக் கலைஞர்களிடம் சிலம்பாட்டம் ஆட ஏதுவாய் கழி ஏதும் இல்லாது இருக்கவே அனைவரும் ஆர்வத்துடன் பார்த்துக் கொண்டிருந்தனர்.

கைச்சிலம்பாட்டம் என்பது கிராமியக் கலைகளில் ஒன்று எனவும், கண்ணகி மதுரையை எரித்தபோது கையில் வைத்திருந்த ஒரு கால் சிலம்பு போல இக் கலைஞர்கள் கைகளில் சிலம்புகள் வைத்துக் கொண்டு, கால்களில் சதங்கை கட்டிக் கொண்டு ஆடுவது என்பதும் அறிவிப்பாளர் சொன்ன பிறகே தெரிந்தது. அப்பப்பா இந்த இளைஞர்கள் ஆடிய ஆட்டம்! ரசித்துக் கொண்டிருந்த  அனைவரையும் எழுந்து ஆட வைத்தது என்று சொன்னால் மிகையாகாது. சில சமயங்களில் புகைப்படம் எடுத்துக் கொண்டிருந்த நானும் அதை விடுத்து கரகோஷம் எழுப்பியபடியே இருந்து விட்டேன்!

கைகளில் சிலம்பு கொண்டு அவர்கள் ஆடிய ஆட்டமும், பல்வேறு விதமான சாகசங்களும் மனதினைக் கொள்ளை கொண்டது. அநாயாசமாக ஒருவர் மீது ஒருவர் நின்று கொண்டும், சைக்கிள் மீது ஏறி நின்றும், அவர்கள் செய்த பல விஷயங்களை விவரிக்க எனக்கு வார்த்தைகள் பற்றாக்குறை என்று தான் சொல்ல வேண்டும். இன்றைய பதிவில் அவர்களது கைச்சிலம்பாட்டம் நிகழ்வின் போது எடுத்த சில படங்களை மட்டும் பகிர்ந்து கொள்கிறேன். மற்ற படங்கள் பிறிதொரு சமயத்தில்.....

சிறப்பான இந்த கலைஞர்களுக்கு, விழாவின் ஆரம்பத்தில் தமிழ்நாடு இயல், இசை, நாடக மன்றத்தின் செயலாளர் குமாரி சச்சு அவர்கள் பாராட்டுச் சான்றிதழ்கள் வழங்கினார்கள். நிகழ்வின் முடிவில் அனைத்து கலைஞர்கள், உருமி, மேளம், நாயனம் போன்ற வாத்தியங்களை இசைத்தவர்கள் ஆகிய அனைவரும் மேடையில் மொத்தமாக நின்று கொண்டிருக்க, அவர்களை அப்படியே என் காமெராவுக்குள் சிறை பிடித்து அவர்களை வாழ்த்தி மனதில் அவர்கள் தந்த நிகழ்வுகளை அசை போட்டபடியே வெளியே வந்தோம் நானும் நண்பர் பத்மநாபனும்.

பாரம்பரிய கலைகளில் பலவற்றை சினிமா எனும் பேரரக்கனுக்கு இழந்து விட்ட நிலையில் இது போன்ற பாரம்பரிய கலைஞர்களை தொடர்ந்து ஆதரிக்கும் தில்லித் தமிழ்ச் சங்கத்திற்கு எனது வாழ்த்துகள்.

மீண்டும் சந்திப்போம்....

நட்புடன்

வெங்கட்.

புது தில்லி.