உள்பெட்டி [INBOX].....

இன்றைக்கு ஒரு குறும்படத்தினைப் பார்க்கலாமா? நாளைய இயக்குனர் நிகழ்ச்சியில் வந்த ஒரு குறும்படம் தான் இன்றைக்குப் பார்க்கப் போகிறோம். படத்தின் தலைப்பு “INBOX” அதாவது உள்பெட்டி [நன்றி “எங்கள் பிளாக்”].  இதில் வசன்ங்களே கிடையாது – அதாவது மௌனப் படம்!

கதை ஆரம்பிப்பது ஒரு கடையில். நாயகி தனக்குப் பிடித்த ஒரு கரடி பொம்மையையும் வேறு சில பொருட்களையும் வாங்குகிறார். கடையின் கொள்கைப் படி நெகிழி கொடுப்பதில்லை. அதனால் அங்கே வைத்திருந்த காகிதப் பைகளில் ஒன்றை விலைகொடுத்து வாங்கி தனது பொருட்களை எடுத்துச் செல்கிறார். அந்தப் பை இன்னொரு பையுடன் ஒட்டியிருந்ததை இரண்டாகப் பிரித்து தான் எடுத்துச் செல்லமுடிகிறது.

சற்று நேரம் கழித்து கதையின் நாயகன் உள்ளாடை வாங்கிக் கொண்டு மேலே பார்த்தால் நெகிழி கொடுக்கமாட்டோம் எனும் பதாகை. சரி என மீதமிருந்த மற்றொரு காகிதப் பையை வாங்கிக் கொண்டு உள்ளாடையை எடுத்துச் செல்கிறார். வீட்டிற்கு வந்து குளித்து துண்டுடன் பையைத் திறந்தால் அதிர்ச்சி – இவரது உள்ளாடைக்குப் பதில் நாயகி வாங்கிய கரடி பொம்மையும் மற்ற பொருட்களும் இருக்கின்றன.

பின்புலத்தில் மெல்லிசை மட்டும் ஒலிக்க, அதே சமயத்தில் அந்தப் பக்கம் நாயகி முகப்புத்தகம் போரடிக்க, தான் வாங்கிய கரடி பொம்மையை எடுக்க பையை எடுத்தால் அவளுக்கும் அதிர்ச்சி. அங்கே நாயகன் வாங்கிய உள்ளாடை.....  ஒரு வித அருவருப்புடன் பையின் உள்ளே அதைப் போட அது காணாமல் போகிறது. அது கிடைக்குமிடம் கதாநாயகன் வைத்திருக்கும் பையில்!  

ஒட்டி இருந்த இரண்டு பைகளில் ஒன்றில் ஒரு பொருளைப் போட்டால் அது தானாகவே அடுத்த பையில் கிடைக்கிறது. இதை வைத்துக் கொண்டு நாயகனுக்கும் நாயகிக்கும் இடையில் சின்னச் சின்ன காகிதங்களில் பரிமாற்றங்கள் நடக்கிறது. அப்போது நடக்கும் விஷயங்களை சுவாரசியமாகத்தான் சொல்லி இருக்கிறார் இயக்குனர். ஒரு முறை நாயகி வாங்கிய கரடி பொம்மையை அனுப்பி, அதன் கழுத்தில் “நாம் சந்திக்கலாமா?” என்று கேட்டு எழுதி அனுப்புகிறார். அதை தனது பையிலிருந்து எடுத்துப் பார்த்த நாயகி, “இதைக் கேட்க இத்தனை நேரமா?” என பதில் தருகிறார்.

மகிழ்ச்சியில் நாயகன் அந்த காகிதப் பையை வைத்துக் கொண்டு நடனம் ஆடியபடியே வெளியே வர கதவின் தாழ்ப்பாளில் மாட்டி அவரது பை கிழிந்து விடுகிறது. அதன் பின்னர் கிழிந்த பையில் போடப்பட்ட எந்த விஷயமும் நாயகியின் பைக்குள் செல்லாமல் அங்கேயே தங்கி விட, நாயகியைக் காண முடியாது தவிக்கிறார் நாயகன்.  பை வாங்கிய இடத்திற்குச் சென்று வேறு பை வாங்கலாம் என ஓட, அந்தக் கடை மூடியிருக்கிறது.

வேறு பை வாங்கினாரா? நாயகனும் நாயகியும் சந்தித்துக் கொண்டார்களா? என்பதை, சுமார் எட்டரை நிமிடம் கொண்ட CURIO FILMS தயாரித்திருக்கும் இந்த INBOX படம் பார்த்துத் தெரிந்து கொள்ளலாமே! படம் இதோ...

 

என்ன நண்பர்களே, குறும்படத்தினை ரசித்தீர்களா? மீண்டும் வேறொரு பதிவில் சந்திக்கும் வரை.....

நட்புடன்

வெங்கட்.

புது தில்லி.