மச்சான் அவ உன்ன பார்க்கறாடா.....

இந்த வார குறும்படம் மலையாள மொழியில். ஆனாலும் உங்களுக்கு மலையாளம் தெரிந்திருக்க வேண்டிய அவசியம் இல்லை! ஏனெனில் இதில் வசனமே இல்லை! :) மலையாளத்தில் “அலியா அவளு நின்னே நோக்குன்னு” என்ற பெயரில் வெளிவந்த இந்த குறும்படத்தின் எழுத்தும் இயக்கமும் டோனி டேவிஸ். Say Creations தயாரிப்பில் வெளி வந்த இக்குறும்படத்தின் கதையைப் பார்க்கலாம்!

ஒரு அறையில் பல மாணவர்கள் தேர்வு எழுத தயாராக அமர்ந்திருக்கிறார்கள். தேர்வு ஆரம்பிக்கிறது. அனைத்து மாணவர்களும் கேள்வித்தாளை வாங்கி விடைகளை எழுதத் துவங்க, ஒருவர் மட்டும் கேள்விகளுக்கு விடை தெரியாது முழித்துக் கொண்டிருக்கிறார். முன்னால் இருக்கும் நபரிடம் அவரது விடைத்தாளை காண்பிக்கும்படி கேட்கிறார். அவர் மறுக்க, தவிக்கிறார்.

அங்கும் இங்கும் பார்த்து யாராவது தனக்கு கேள்வித்தாளை தரமாட்டார்களா என தவிக்கிறார்.  இன்னும் ஒருவரிடம் கேட்க அவரும் தர மறுக்க, என்ன செய்வது எனத் தெரியாமல் தடுமாறுகிறார். பிறகு அவருக்கு ஒரு யோசனை வருகிறது. காண்பிக்க மறுத்த நபரிடம் ”மச்சான் அவ உன்ன பார்க்கறாடா” என்று சொல்ல, பின்னால் இருக்கும் பெண்ணைத் திரும்பிப் பார்க்கிறார்.

பெண்ணைப் பார்த்ததும் அந்த நபருக்கு பல நினைவுகள். இப்போது முதல் நபர் விடைத்தாளைக் கேட்க, சற்றே நகர்த்தி வைத்து விடைகளை காண்பிக்கிறார். சில நிமிடங்களுக்குப் பிறகு என்ன நடக்கிறது என்பதை திரையில் பார்க்கலாமே! குறும்படம் பார்க்க உங்களுக்குத் தேவை ஐந்து நிமிடங்கள் மட்டுமே! :)

)

என்ன நண்பர்களே, இந்த வார குறும்படத்தினை ரசித்தீர்களா? மீண்டும் வேறொரு பகிர்வில் சந்திப்போம்...

நட்புடன்

வெங்கட்.

புது தில்லி.