நீங்க நல்லவரா கெட்டவரா?

தலைநகரிலிருந்து....

பதவியும் பலமும் ஒரு மனிதனை என்னவெல்லாம் செய்யத் தூண்டுகிறது. தனக்கு பதவி தந்தவர்களையே தூக்கி எறிந்து விட்டு தான் பதவி ஏறவும் துடிக்கிறார்கள். எல்லா அதிகாரங்களையும் பறித்துக்கொள்ளவும் முயற்சிக்கிறார்கள்.  ஆட்சிக்கு வந்து சில நாட்களே ஆன நிலையில் அதற்குள்ளாகவே தில்லி அரசில் நிறைய பிரச்சனைகள். நேற்று அவர்களுக்குள் இருக்கும் பூசல்கள் வெளியே வந்திருக்கிறது.  இன்றைய அரசியல் மட்டுமல்லாது பண்டைக்கால ராஜாக்கள் சமயத்திலும் இப்படித்தான் போலும்.

 வெளிப்புற வாயிலிலிருந்து எடுத்த படம்!

மீர்சா முகிம் அபுல் மன்சூர் கான், அவத்[dh] பகுதியின் மன்னராகவும் தில்லியில் ஆண்ட முகலாயப் பேரரசர்  முஹம்மது ஷா அவர்களின் இராஜப் பிரதிநிதியாகவும் செயல்பட்டவர். பணபலம் மற்றும் அதிகாரபலம் படைத்தவராகத் திகழ்ந்தவர். மன்னர் முஹம்மது ஷா இறந்த பிறகு, அவத்[dh] நாட்டிலிருந்து தில்லிக்கு குடிபெயர்ந்தார். மன்னரின் இறப்பிற்குப் பிறகு முஹம்மது ஷா அஹ்மத் ஷா முஹலாயப் பேரரசின் மன்னராக பொறுப்பேற்க, மீர்சா முகிம் அபுல் மன்சூர் கான் அவர்களுக்கு வாசிர் உல் மல்க்-இ-ஹிந்துஸ்தான் என்ற பட்டம் அளித்து முதல் அமைச்சராகப் பொறுப்பு தரப்பட்டது.

 என்னவொரு பிரம்மாண்டம்....

முஹம்மது ஷா அஹ்மத் ஷா காலத்தில் முகலாயப் பேரரசு தன் பலத்தினை இழந்து வெகு சில இடங்களையே தக்க வைத்துக் கொண்டிருந்தது. மன்னர் மது, மாது போன்ற விஷயங்களில் மூழ்கிக் கிடக்க, மீர்சா வானளாவிய அதிகாரங்களை வைத்துக்கொண்டு, மன்னரை தன் இஷ்டத்திற்கு ஆட்டிப் படைத்துக் கொண்டிருந்தார்.  முதலமைச்சர் மீர்சாவின் இப்போக்கு பிடிக்காத மன்னரின் குடும்பத்தினர் மராட்டியர்களின் உதவி கொண்டு முதலமைச்சர் பதவியை மீர்சாவிடமிருந்து பறித்தது மட்டுமல்லாது தில்லியை விட்டே விரட்டினார்களாம்.

 கல்லிலே கலைவண்ணம் கண்டான்....

அதன் பிறகு ஒரு வருடத்திற்குள்ளாகவே மீர்சா இறந்து விட்டார். அவர் இறந்த பிறகு அவரது மகன் நவாப் ஷுஜௌத் தௌலா முகலாயப் பேரரசரிடம் தான் தனது தந்தைக்கு தில்லியில் ஒரு கல்லறை கட்ட விரும்புவதாகவும் அதற்கு மன்னர் தயைகூர்ந்து அனுமதி தரவேண்டும் என்று கேட்டுக்கொள்ள மன்னரும் அனுமதி தந்தார். தில்லியில் மீர்சா முகிம் அபுல் மன்சூர் கானுக்கு ஒரு கல்லறை கட்டும் முயற்சி தொடங்கியது.

 கல்லறை....  வெளிப்புறத்திலிருந்து எடுத்த படம்

தில்லியில் இருக்கும் ஹூமாயூன் கல்லறை போலவே மீர்சா முகிம் அபுல் மன்சூர் கான் அவர்களது கல்லறையும் மிகச் சிறப்பாக கட்டப்பட்டு முடிக்கப்பட்டது – அது நடந்தது 1753-54 ஆம் ஆண்டு என அக்கல்லறையின் வெளியே வைத்திருக்கும் தகவல் பலகை சொல்கிறது. கல்லறை மட்டுமல்லாது அதைச் சுற்றிலும் அழகிய பூங்கா, மசூதி, தங்குமிடங்கள் என சிறப்பான முறையில் அமைக்கப்பட்டன.

 கல்லறைக் கட்டிடத்தின் உள்ளே நிழலில் ஓய்வெடுக்கும் காவலாளி

அதெல்லாம் சரி, இப்படி தில்லியில் மீர்சா முகிம் அபுல் மன்சூர் கான் கல்லறை என்ற பேர் கேள்விப்பட்டதே இல்லையே என்று உங்களுக்குத் தோன்றலாம்! இந்தப் பெயர் அவரது இயற்பெயராக இருந்தாலும் அவருக்குக் கொடுக்கப்பட்ட அடைமொழியாலேயே அவர் இன்றளவும் நினைவில் இருக்கிறார். அவரது பெயரில் ஒரு விமான நிலையம், மிகவும் பிரபலமான ஒரு மருத்துவமனை, செல்வந்தர்கள் வாழும் ஒரு இடம் என பலவும் தில்லியில் உண்டு! அவருக்கு கொடுக்கப்பட்ட அடைமொழி “சஃப்தர்ஜங்”!

 கட்டிடக்கலையை ரசிக்க வந்த வருங்காலம்!

முகலாயக் கட்டிடக் கலையில் உங்களுக்கு விருப்பமிருந்தால், பூங்காக்கள் அமைக்கப்பட்டிருக்கும் விதம் பார்க்கும் ஆசையிருந்தால் நிச்சயம் நீங்கள் இங்கே சென்று ரசிக்கலாம். 

மொட்டை மாடி மொட்டை மாடி

ஒரு லவ் ஜோடி லவ் ஜோடி!

தில்லியின் பல கல்லறைகள் போலவே இங்கும் காதலர்கள் நடமாட்டம் அதிகம். தங்களை மறந்து, இருக்கும் சூழ்நிலை மறந்து பரவச நிலையில் அமர்ந்திருக்கும் பல காதலர்களை இங்கே காணமுடியும். காதலர்களைப் போலவே புறாக்களும் இங்கே நிறைய உண்டு!

 தூது செல்லத் தயாராக இருக்கிறதோ இப்புறா!

தில்லியிலுள்ள இவ்விடத்திற்கு மெட்ரோ மூலமும் நீங்கள் வர முடியும். அருகிலுள்ள மெட்ரோ நிலையம் – ஜோர்பாக்[G]. சஃப்தர்ஜங் சாலை மற்றும் அரபிந்தோ சாலை சந்திக்கும் இடத்தில் இருக்கும் இக்கல்லறை எல்லா நாட்களும் காலையிலிருந்து மாலை வரை திறந்திருக்கும். இங்கே நுழைவுக்கட்டணமும் உண்டு – இந்தியர்களுக்கு 5 ரூபாய், வெளி நாட்டவர்களுக்கு 100 ரூபாய். புகைப்படக்கருவிக்கு கட்டணமில்லை. காணொளி கருவிகளுக்கு 25 ரூபாய் கட்டணம்.

அடுத்த தில்லி பயணத்தில் இங்கேயும் சென்று வாருங்களேன்! அவ்வப்போது தில்லியில் இருக்கும் மற்ற இடங்களைப் பற்றியும் பார்க்கலாமா? நீங்க ரெடின்னா நானும் ரெடி!

மீண்டும் சந்திப்போம்.....

நட்புடன்

வெங்கட்.

புது தில்லி.

டிஸ்கி-1: சென்ற நவம்பர் மாதம் புகைப்படங்கள் எடுப்பதற்காகவே நானும் நண்பர் ஒருவரும் இங்கே சென்றிருந்தோம்.  இப்பதிவில் தந்திருக்கும் படங்கள் இரண்டு பேரும் எடுத்ததிலிருந்து.

டிஸ்கி-2: காதலர்கள் படம், காவலாளி படம் இரண்டும் Silhouette Photography என முயற்சி செய்ய எடுத்த படங்கள்....  நன்றாக வந்திருக்கிறதா என்று சொல்லுங்களேன்!