சாப்பாட்டுப் புராணம் – நெய் தோசையும் ஒரு கோப்பை தேநீரும்

 நன்றி: கடல்பயணங்கள் சுரேஷ்

ரசித்து சாப்பிடுபவர்கள் ஒரு வகை.  ருசிக்கு சாப்பிடுபவர்கள் சிலர்.  என்னைப் போல சிலர் பசிக்கு சாப்பிடுபவர்கள்! எப்படி இருந்தாலும் சாப்பாடு இல்லாது யாராலும் இருக்க முடியாதே. என்னைப் போல பசிக்கு மட்டுமே சாப்பிடும் சிலரும் ஒரு சில உணவு வகைகளை ருசித்து, அனுபவித்து சாப்பிடுவது உண்டு.  அப்படிப்பட்ட சில உணவு வகைகளை தான் ரசித்து, ருசித்து, மகிழ்ச்சி கொண்டது மட்டுமன்றி, மற்றவர்களுக்கும் பகிர்ந்து கொள்ளும் எண்ணம் இருந்தால் எப்படி இருக்கும். 

அப்படி பகிர்ந்து கொள்ளும் நல்லெண்ணத்தோடு 2007-ஆம் ஆண்டு ”தினமணி” நாளிதழின் இணைப்பிதழான “கொண்டாட்ட”த்தில் “ஈட்டிங் கார்னர்” என்று ஒரு பகுதி துவங்கப்பட்டது. இப்பகுதியில் தமிழகத்தின் பாரம்பரிய உணவுகள் மட்டுமல்லாது பிற மாநிலங்களிலிருந்தும், மேலை நாடுகளிலிருந்தும் வந்து இங்கு காலூன்றி இங்கு தனித்துவம் பெற்ற உணவு வகைகளைப் பற்றியும் தமிழகத்தில் இருந்த ”காப்பி க்ளப்”புகள், தங்கும் விடுதிகள் அவற்றில் கிடைத்த உணவு என அருமையான பல கட்டுரைகளை ”சமஸ்” அவர்கள் தொடர்ந்து எழுதி வந்தார். 

அப்படி 2007-ல் ஆரம்பித்து 2009-ஆம் வருடம் வரை வந்த கட்டுரைகளை தொகுத்து ஒரு புத்தகமாக வெளியிட்டால்? சாப்பாட்டுப் பிரியர்களை “ஆஹா என்னவொரு வசதி” என்று சொல்ல வைக்குமே!  அதை “துளி வெளியீடு” செய்திருக்கிறார்கள்.  நேதாஜி டீ, தஞ்சாவூர் காபி, திருவானைக்கா நெய் தோசை, பாம்பே பாதாம்கீர், விருத்தாசலம் தவலை அடை, பாளையங்கோட்டை முறுக்கு என்று ஒவ்வொன்றாய் அவர் சொல்லிக் கொண்டு வரும்போது நமக்கும் அங்கெல்லாம் சென்று அந்த உணவு வகைகளை சாப்பிட்டுப் பார்க்கும் ஆவல் நிச்சயம் உண்டாகும். 

ஒவ்வொரு உணவு வகை பற்றிச் சொல்லும் போது அவை எப்படி வந்தது? அவ்வுணவை எப்படிச் செய்வது, அதன் பின்னணியில் இருக்கும் கதை என்ன, அவ்வுணவு தயாரித்தவர்கள் பட்ட கஷ்டங்கள், என பல்வேறு சுவையான தகவல்களைச் சொல்லும் இவரது கட்டுரைகள் படிக்கும்போதே நம்மையும் அச்சுவைக்குள் இழுத்துச் சென்று விடுவது நிச்சயம்.  உதாரணமாக “ஒரு கோப்பை டீ” என்ற முதல் கட்டுரையிலிருந்து ஒரு பகுதி இங்கே!

தேயிலையின் பூர்வீகம் தென்கிழக்கு ஆசியா. இந்தியாவின் வடகிழக்குப் பகுதி வடக்கு பர்மா மற்றும் தென்மேற்கு சீனாவில் பல நூற்றாண்டுகளுக்கு முன்னரே தேயிலை விளைந்திருக்கிறது. ஆயினும், டீயை முதன் முதலாக பருகத் தொடங்கியவர்கள் சீனர்களே. இந்தியாவில் ஆங்கிலேயர்களின் வருகைக்குப் பின்னரே டீ குடிக்கும் பழக்கம் ஏற்பட்டது. இந்தியர்களை டீ ருசிக்கு அடிமையாக்கிவிட்டால் இந்த வியாபாரத்தில் கொழுத்த லாபம் பார்க்கலாம் என்று திட்டமிட்ட ஆங்கிலேயர்கள் ஆரம்ப காலத்தில் ஊர் ஊராக இனாமாகவே டீ கொடுத்தார்கள். திடீரென ஒரு நாள், “இனி டீக்கு விலையுண்டு” என்று அவர்கள் சொன்னபோதுதான் நம்மாட்களுக்குத் தெரிந்தது நம் நாக்குகள் டீக்கு அடிமையாகிவிட்டன என்று. அப்புறம் தேயிலை விற்பனைக்கு வந்தபோது அதை வாங்கிக் கண்ட கண்ட நேரத்திலும் காய்ச்சிக் குடித்துவிட்டு இரவெல்லாம் கொட்ட கொட்ட விழித்துக் கொண்டிருந்த கதையை அந்தக் காலத்து பெருசுகளிடம் இன்றைக்கும் கேட்கலாம்.

திருவானைக்கா நெய் தோசை பற்றி அவர் எழுதி இருப்பதை படிக்கும் போது நம் நாசிகளில் தானாகவே நெய் மணம் ஏறிக்கொள்வதை உணர்வீர்கள்.  ஆஹா என்ன ஒரு மணம்!

“பொன்னிறத்தில் ஒரு குழல் போல சுருட்டி இலையில் வைக்கிறார்கள். சமையல்காரரின் கைப்பக்குவம் ரேகையாய் தோசையில் ஓடுகிறது. தொட்டுகையாகத் தேங்காய்ச் சட்னி, காரச் சட்னி, வெங்காய சாம்பார் தருகிறார்கள். ஆனால் முதல் தோசைக்கு இவை எதுவுமே தேவையில்லை. நெய் மணத்தைத் தொட்டுக் கொண்டே சாப்பிட்டுவிடலாம். ஒரு ஜோடி தோசை, ஒன்று நெய் மணத்தைத் தொட்டுக் கொண்டு, மற்றொன்று சட்னி, சாம்பார் தொட்டுக்கொண்டு திவாயானுபவத்தை உணர்வீர்கள்.” 

இப்படி ஒவ்வொரு கட்டுரையும் படிக்கும்போதே நமக்கு நாவில் நீர் ஊற ஆரம்பித்து விடுவது சர்வ நிச்சயம்.  பானங்கள், சிற்றுண்டி, சைவ, அசைவ உணவுகள் என்று அனைத்தையும் விடாது எழுதி இருக்கிறார்.  பெரும்பாலான கட்டுரைகளில் வந்த உணவுகள் தஞ்சை, திருச்சி மாவட்டத்தினைச் சுற்றியே இருக்கின்றன.  இருந்தாலும், வடலூரின் அணையா அடுப்பு, திருநெல்வேலி இருட்டுக் கடை அல்வா என்று சில கட்டுரைகள் தமிழகத்தின் மற்ற பகுதிகளையும் தொட்டுச் செல்கிறது. 

இந்த புத்தகத்தில் இருக்கும் அனைத்து உணவுகளையும் அந்தந்த ஊருக்குச் சென்று அனுபவித்து உண்ண ஆசை உண்டு.  தமிழகத்திற்கு வந்து போகும் சில நாட்களில் இப்படிப் பட்ட ஆசை நிராசையாகத்தான் இருக்கிறது.  ஆனாலும் நமது சக வலைப்பதிவர் “கடல் பயணங்கள்” சுரேஷ் குமார் இப்புத்தகத்தில் சொல்லி இருக்கும் அனைத்து இடங்களுக்கும் சென்று அவ்வுணவு வகைகளை ரசித்து ருசிப்பதோடு நம்முடனும் அந்த அனுபவங்களை பகிர்ந்து கொண்டு வருகிறார்.  மிகச் சமீபத்தில் அப்படி அவர் எழுதிய கட்டுரை ஒன்று அறுசுவை [சமஸ்] – கும்பகோணம் பூரி – பாஸந்தி!!  இக்கட்டுரையும் படித்து பாஸந்தியின் சுவையில் நீங்களும் மூழ்கிடலாமே!

இப்புத்தகத்தில் குறிப்பிட்டுள்ள அனைத்து உணவு வகைகளையும் நீங்கள் தெரிந்து கொள்ள வேண்டுமாயின் துளி வெளியீடாக நவம்பர் 2014-ல் வந்திருக்கும் மூன்றாம் பதிப்பினை ரூபாய் 80 கொடுத்து வாங்கிக் கொள்ளலாம்.  புத்தகம் வாங்க நீங்கள் அணுக வேண்டிய மின்னஞ்சல் முகவரி thuliveliyeedu@gmail.com அலைபேசி எண் – 0 – 9444204501.  புத்தகத்தில் இருக்கும் மொத்த பக்கங்கள் – 112.  மொத்த கட்டுரைகள் – 38.

என்ன நண்பர்களே உடனே மின்னஞ்சல் ஒன்றை தட்டி விடப் போகிறீர்கள் அல்லவா? 

மீண்டும் வேறொரு வாசிப்பனுவத்துடன் விரைவில் சந்திக்கிறேன்!

நட்புடன்

வெங்கட்.

புது தில்லி.