ஐநூறும் ஆயிரமும் செல்லாக் காசு!

படம்: இணையத்திலிருந்து...

08-11-2016 நள்ளிரவு முதல் 500 ரூபாய் மற்றும் 1000 ரூபாய் நோட்டுகள் செல்லாது என இந்திய அரசாங்கம் அறிவிப்பு செய்திருப்பதை நீங்கள் அனைவருமே இந்நேரம் தெரிந்து கொண்டிருப்பீர்கள். இந்தப் பதிவு இந்த முடிவு நல்ல முடிவா இல்லை கெட்ட முடிவா என்பதைப் பற்றியது அல்ல. சாதாரண மனிதர்கள் இதில் அதிகம் கவலைப்பட வேண்டியதில்லை.  சின்னச் சின்னதாய் சில பிரச்சனைகள் இருக்கலாம். கவலைப்பட வேண்டியதெல்லாம், வீட்டில் மூட்டை மூட்டையாக பணமாக வைத்திருப்பவர்கள் மட்டுமே.

இப்படி யாரிடமுமே மூட்டை மூட்டையாக இல்லை என்று சொல்லாதீர்கள்.  தலைநகர் தில்லியில் இப்படி இருப்பவர்கள் பலரை நான் பார்த்திருக்கிறேன். அவர்கள் தான் கவலைப் பட வேண்டும்.  இன்றைய தேதியில் என்னிடம் ஒரு 500 ரூபாய் நோட்டு கூட இல்லை! இன்றைக்கு தான் பணம் எடுக்க வேண்டும் என நினைத்திருந்தேன் – ஆனால் அலுவலகத்திலிருந்து வீடு திரும்பும்போதே மணி ஒன்பது. சரி நாளைக்கு எடுத்துக் கொள்ளலாம் என திரும்பிவிட்டேன்.  அதுவும் ஒரு விதத்தில் நல்லதாகப் போயிற்று.

அடடா, இப்படி திடீரென அறிவிப்பு வந்தால் என்ன செய்வது? எங்களிடம் இருப்பதெல்லாம் செல்லாக் காசு தானா? என்ற கவலை சாதரணர்களுக்குத் தேவையில்லை.  டிசம்பர் 30-ஆம் தேதி வரை இந்த நோட்டுகளை உங்கள் அருகில் உள்ள வங்கி, தபால் நிலையம் ஆகியவற்றில் மாற்றிக் கொள்ளலாம்.  ”ஐயா, அதுக்குள்ள மாத்த முடியவில்லை…. என்றாலும் கவலை வேண்டாம்.  மார்ச் 31 வரை தகுந்த அடையாள அட்டையைக் காண்பித்து உங்கள் பணத்தினை மாற்றிக் கொள்ளலாம்!” உங்களிடம் இருப்பது உங்கள் பணம், வரி ஏய்ப்பு செய்யவில்லை என்றால் எதற்கு கவலைப் பட வேண்டும். 

இன்னும் இரண்டு நாட்களுக்கு மருத்துவமனைகள், பெட்ரோல் பங்குகள், விமான நிலையம், ரயில் நிலையம், பேருந்து நிலையம் ஆகியவற்றில் நவம்பர் 11 நள்ளிரவு வரை இந்த நோட்டுகள் வாங்கிக் கொள்வார்கள்.  மற்ற நோட்டுகள் வழக்கம்போலச் செல்லும். 

இடுகாடு/சுடுகாடு/மயானம் ஆகிய இடங்களிலும் நவம்பர் 11 வரை இந்த 500/1000 ரூபாய் நோட்டுகள் நவம்பர் 11 நள்ளிரவு வரை செல்லும் [இங்கே எதற்கு என்ற ஒரு சின்ன சந்தேகம்… மூட்டைமூட்டையாக கள்ளப் பணம் வைத்திருக்கும் பல பண முதலைகளுக்கு இந்த செய்தி தந்த அதிர்ச்சியில் மரணம் ஏற்படலாம் என்பதாலோ?]

மற்றபடி உங்கள் அவசரத் தேவைக்கு காசோலை, Draft, Credit/Debit Card ஐ பயன்படுத்தலாம்.

இன்னும் சில நாட்களுக்குள் புதிய 500 ரூபாய் மற்றும் 2000 ரூபாய் நோட்டுகள் அறிமுகம் செய்யப்படும். [இந்த புதிய 2000 ரூபாய் நோட்டுகளில் NGC எனப்படும் Nano GPS Chip இருக்கும். அதன் மூலம் புதியதாய் யாரும் கருப்புப் பணம் சேர்க்க முடியாது. கூடுதல் விவரங்கள் இணையத்தில் உண்டு. தனியாக பதிவு செய்கிறேன்].

இன்றைக்கு வேறு பதிவு போடுவதாகத் தான் இருந்தேன் – Schedule செய்தும் வைத்திருந்தேன். ஆனால் இரவு வீடு திரும்பும்போது பார்த்த செய்தி என்பதால் இதை இன்று பதிவிடுகிறேன்… அதற்குள் இந்தச் செய்தியை வைத்து நிறைய முகப்புத்தக இற்றைகளும், ஜோக்குகளும் வர ஆரம்பித்து விட்டன.  சில புகைப்படங்களில் 500 ரூபாய் மற்றும் 1000 ரூபாய் நோட்டுகளில் சுண்டல் கட்டித் தருவது போல வந்து கொண்டிருக்கிறது! நான் படித்த சில துணுக்குகள் கீழே…..

Don’t worry friends…..  I will accept all your Rs.500 and Rs.1000 notes without asking any question….. at Rs.12 per kg.!

1 min silence for all those who have their weddings tomorrow and day after.  They will get only blank envelopes!

அம்மா தாயே…. அம்பது நூறு போதும்மா..  ஐநூறு, ஆயிரம் வேண்டாம்மா….

பின்ன மோடின்னா தாடி வெச்சுக்கிட்டு, கண்ணாடி போட்டுக்கிட்டு, குர்தா போட்டுக்கிட்டு ஃப்ளைட் ஏறி நாடு நாடா சுத்தறவர்னு நினைச்சீங்களா?  மோடி டா!

அமெரிக்கர்கள் வோட்டில் பிசி….. இந்தியர்கள் நோட்டில் பிசி…..

என்னைப் பொறுத்த வரை இந்த விஷயத்திற்காக அதிகம் கவலைப்படத் தேவையில்லை என்று தான் சொல்லுவேன்.  இதுவும் கடந்து போகும்  என்பதை நினைவில் வைத்துக் கொள்ளுங்கள்…..

மீண்டும் ச[சி]ந்திப்போம்…..

நட்புடன்

வெங்கட்.

புது தில்லி.