Rail Wire - இலவச இணைய சேவை – துர்பிரயோகம்

இந்திய ரயில்வே துறை இந்த ஆண்டு துவங்கிய ஒரு சேவை – நாடு முழுவதிலும் உள்ள முக்கிய இரயில் நிலையங்களில் இலவச இணைய சேவை. Rail wire மற்றும் Google இணைந்து இந்த இலவச WI-FI சேவையை வழங்குகிறார்கள். சமீபத்தில் தமிழகம் வந்திருந்தபோது திருச்சி ரயில் நிலையத்திலும் சென்னையின் சில ரயில் நிலையங்களில் இந்த இலவச WI-FI சேவையை பயன்படுத்தும் வாய்ப்பு கிடைத்தது. நல்ல வேகத்தில் இணைய இணைப்பு கிடைத்தது.  ஒன்றரை மணி நேரத்திற்கும் மேலாக திருச்சி ரயில் நிலையத்தில் காத்திருந்தபோது இந்த இலவச இணைய வசதி தான் கைகொடுத்தது.

FACEBOOK, BLOG, WHATSAPP என அனைத்தும் பயன்படுத்தினேன் அந்த ஒன்றரை மணி நேரமும்.  சென்னை எக்மோர் ரயில் நிலையத்திலும் இச்சேவையை பயன்படுத்தினேன்.  இணைப்பு இலவசம் என்பது மட்டுமல்ல, நல்ல வேகமும் இருந்தது என்பதைச் சொல்ல வேண்டும்.  இந்த இலவச சேவையை வழங்கும் ரயில்வே துறைக்கு மனம் நிறைந்த பாராட்டுகள்.  பயன்படுத்துவதும் அத்தனை கடினமான விஷயம் இல்லை. 

மிகச் சுலபமாக WI-FI இணைப்பை நமது Android அலைபேசிகளில் சேர்க்க முடிகிறது. நமது அலைபேசிக்கு ஒரு கடவுச்சொல் வர, அதை உள்ளீடு செய்து சில நொடிகளில் நாம் இணைய இணைப்பை பெற்று விட முடிகிறது.

விமான நிலையங்களிலும் இப்படி இலவச இணைப்பு உண்டு என்றாலும் அரை மணி நேரம், அல்லது 45 நிமிடங்கள் மட்டுமே இந்த இலவச இணைப்பு கிடைக்கும்.  அந்த இணைப்பும் அத்தனை வேகமில்லை. Facebook-ல் உலவும்போதே ரொம்பவும் மெதுவாகத் தான் இயங்குகிறது.  ரயில் துறை தரும் வசதியை ஒப்பிடும்போது விமான நிலையத்தில் கிடைக்கும் சேவை மோசம் என்று தான் சொல்ல வேண்டும். 

இலவசம் என்றாலே நம் மக்களுக்கு அதிக ஆசை தான். தமிழகத்தில் இலவசம் கொடுத்துக் கொடுத்தே ஆட்சியை பிடிக்கும் வித்தையைத் தானே பல வருடங்களாகச் செய்து வருகிறார்கள் ஆட்சியாளர்கள்.  இப்படி கிடைக்கும் இலவச வசதிகளை நல்ல வழியில் பயன்படுத்தினால் பரவாயில்லை. அதையும் துர்பிரயோகம் செய்வதில் இந்தியர்களுக்கு இணையில்லை…..

சமீபத்தில் ஒரு செய்தி படிக்க நேர்ந்தது. Railwire மற்றும் Google இணைந்து வழங்கும் இந்த இலவச WI-FI எந்த ரயில் நிலையங்களில் அதிகம் பயன்படுத்துகிறார்கள், எந்த விஷயங்களைப் பார்க்க பயன்படுத்துகிறார்கள் என்று பார்த்தபோது ஒரு அதிர்ச்சியான விஷயம் தெரிய வந்திருக்கிறது.  ஒரு மாத காலத்திற்கு முன்னர் சேவை துவங்கப்பட்ட பட்னா நகரின் ரயில் நிலையத்தில் இந்தச் சேவையை அதிகமாக பயன்படுத்தியது எதற்குத் தெரியுமா?   ஆபாச வீடியோக்கள் தரவிறக்கம் செய்யவும், அதைப் பார்க்கவுமே அதிகம் பேர் பயன்படுத்தி இருக்கிறார்கள். 

ரயில் நிலையத்திற்கு வந்து பயணத்திற்காகக் காத்திருக்கும்போது இவர்களுக்கு பலான படங்கள் பார்க்கத் தோன்றுகிறது. வக்கிர புத்தி கொண்டவர்களுக்கு இங்கே குறைவில்லை. ஆபாசப் படங்களுக்குத் தான் முதலிடம். எல்லா நேரமும் ஒரே நினைப்பு தான் போலும் அவர்களுக்கு!  அடுத்த அதிக பயன்பாடு YOUTUBE மற்றும் WIKIPEDIA தளங்களைப் பார்வையிட பயன்படுத்தி இருக்கிறார்கள்.

இலவச சேவைய பயன்படுத்திய நபர்களின் எண்ணிக்கைப் பட்டியலிலும் பாட்னாவிற்குத் தான் முதலிடம்.  இரண்டாமிடம் ஜெய்ப்பூர்.  மூன்றாவது மற்றும் நான்காம் இடங்களில் பெங்களூருவும் புது தில்லியும்.  சென்னை எந்த இடத்தில் இருக்கிறது என்பது தெரியவில்லை. பெரும்பாலானவர்களுக்கு இந்த வசதி இருப்பது தெரியவில்லை என்றும் தோன்றுகிறது. 

இந்த இலவச இணைய வசதியை இந்தியாவின் பல ரயில் நிலையங்களுக்கும் கொண்டு செல்ல வேண்டும் என்ற திட்டத்தில் இருக்கும் இந்திய ரயில்வே பட்னா விஷயம் பற்றி தெரிந்ததும் கொஞ்சம் யோசிக்கிறது. முறையான பயன்பாடு இருக்கும் என்றால் இலவச இணைப்பு தரலாம்.  இப்படித் தேவையில்லாத விஷயங்களுக்குப் பயன்படுத்தவா நாம் இலவச சேவையைத் தர வேண்டும் என்றும், இந்தச் சேவையை நிறுத்தி விடலாமா என்றும் யோசிக்கிறது ரயில்வே துறை.  

இலவசமாகக் கிடைப்பதையும் நிறுத்த வழி செய்து விடுவார்கள் போல இந்த பட்னா வாசிகள்…… இது பற்றி உங்கள் எண்ணம் என்ன என்பதைப் பின்னூட்டத்தில் சொல்லுங்களேன்……

மீண்டும் ச[சி]ந்திப்போம்….

நட்புடன்

வெங்கட்

புது தில்லி.