கதம்பம் – சுக்குட்டிக் கீரை – கிருமிகள் – மகாநதி – ஜோடி ஜோடியாய்….

சுக்குட்டிக் கீரை….

சமையல் ஆச்சு!! வத்தக்குழம்பும், சுக்குட்டி கீரை வதக்கலும். அட என்னங்க!! அப்படின்னா என்னன்னு கேட்கறீங்களா??? எங்கூரு அதாங்க கொங்கு நாடாம் கோவையில் மணத்தக்காளி கீரையை அப்படித்தான் சொல்வாங்க.

எல்லோருக்கும் இந்த நாள் இனிய நாளாக அமையட்டும்.

ரோஷ்ணி கார்னர்:

மகளின் கைவண்ணம் – Germs and Personal Hygiene….

மகாநதி…

ஒரு சராசரி மனிதனின் வாழ்வைப் புரட்டிப் போட்ட கதை. மகளை மீட்டுக் கொண்டு வரும் தருணம். எத்தனை முறை பார்த்தாலும் மனதை பிழிய வைக்கிறது.

இந்த நாள் இனிய நாள்:

ஆடி வெள்ளியில் கோவிலில் விளக்கு ஏற்றி வைத்து, அரசமரத்து நாகர்களுக்கு பாலும் விட்டு வந்தேன். அங்கே ஒரு பெண்மணி எல்லோருக்கும் வெற்றிலை தாம்பூலம் கொடுத்தார். குங்குமம் இட்டுக் கொண்டு, நல்லதே நடக்கட்டும்! எனச் சொல்லி தாம்பூலம் எடுத்துக் கொண்டேன். அந்த பெண்மணி முகத்தில் சந்தோஷம்.

அரசமரத்தில் கிளைக்கு கிளை நம் முன்னோர்கள். பால் கிடைக்குமா!! பழங்கள் கிடைக்குமா! பர்ஸை எடுத்துப் போலாமா! என பார்த்துக் கொண்டிருந்தார்கள்.

ஜோடி ஜோடியாய்…

திருச்சியின் முக்கிய சுற்றுலாத் தலங்களில் ஒன்றாக ஆசியாவிலேயே பெரிதான வண்ணத்துப்பூச்சி பூங்கா உருவாகி வருகிறது. அது எங்கள் குடியிருப்பு வழியாகத் தான் செல்ல வேண்டும்.

இதற்கு ஸ்ரீரங்கம் பேருந்து நிலையத்திலிருந்து மினி பஸ் ஒன்று சென்று வருகிறது. இந்த பூங்கா ஆரம்பித்தது முதல் இந்த மினி பஸ் காலியாகவே செல்வதில்லை. இளம் ஜோடிகளால் நிரம்பி வழிகிறது.

இன்று மதியம் மகளின் பள்ளிக்கு செல்ல வேண்டியிருந்தது. இந்த மினி பஸ்ஸில் சென்றால் பள்ளிக்கு எதிரிலேயே இறங்கலாம் என்பதால் சரியாக பிடித்தேன். ஏறியதிலிருந்து பார்த்தால் பேருந்து முழுவதும் ஜோடிகள் தான். தலை சாய்த்து படுத்துக் கொண்டும், தழுவிக் கொண்டும், பொது இடத்தில் தான் இருக்கிறோம் என்று அவர்களுக்கு தெரியாத நிலை.

பேருந்தில் வேறு காதல் பாட்டுக்கள். காதல் நிலாவே பூவே!! இந்த பாடலை இதுவரை கேட்ட நினைவில்லை. அனைவருமே கல்லூரியில் பயில்பவர்கள் தான். இந்த உறவு திருமணத்தில் முடிந்தால் நல்லது. அப்படி இல்லையென்றால்...????

ஃபார்வர்ட் பூதம்….

நம்முடைய சுகம், துக்கம், சொத்து, உணவு என்று எதையாவது பகிர்ந்து கொள்கிறோமோ இல்லையோ!!! ஃபார்வார்டு மெசேஜ்களை அள்ள அள்ள குறையாத செல்வம் போல பகிர்ந்து கொள்கிறோம்.

யாராவது அதை முழுதாக படிக்கிறார்களா??? என்றால் இல்லை. ஆனால் தன்னிடம் வந்த ஃபார்வார்டுகளை அடுத்த நொடியே அடுத்தவர்களோடு பகிர்ந்து கொள்ள வேண்டும் என்ற குணம் வந்தது என்று?

ஒருமுறை படித்த மெசேஜ்களே மீண்டும் மீண்டும் தாம்பூலத்தில் தரும் ப்ளவுஸ் பிட் போல சுற்றிக் கொண்டே இருக்கிறது. இதற்காகவே ஒவ்வொரு முறையும் யோசித்து உபயோகமான பொருளாக தந்து மாற்றம் செய்து விட்டோம். ஆனால், இந்த மெசேஜ் தொல்லையிலிருந்து தப்புவது எப்படி?

ஒருமுறை ஒரு எண்ணிற்கு அழைத்து பேசிவிட்டால் போதும் அடுத்த நொடியிலிருந்து வைரஸ் நம்மை தொற்றிக் கொள்ள ஆரம்பிக்கும். இதற்காகவே பல குழுமங்களிலிருந்து வெளிவர துவங்கியிருக்கிறேன். முடிந்தவரை அனைத்தையுமே mute செய்து வைத்திருக்கிறேன். என்னவோ போங்க.

ஸ்வாரஸ்யமான பழமொழி:

இன்று காலையில் கேட்ட பழமொழி!!

நாத்தனாருக்கு போடற சோப்பும், நார்த்தங்காய்க்கு போடற உப்பும் வீணாய்ப் போகாதாம்!

நல்லாருக்கில்ல.

என் மாமியார் கூட இதுமாதிரி நிறைய சொல்வாங்க. டெல்லியில் ஒரு டைரியில் எழுதி வைத்திருந்தேன்.

விரைவில் வேறு சில கதம்பச் செய்திகளோடு மீண்டும் ச[சி]ந்திப்போம்….

 

நட்புடன்

ஆதி வெங்கட்