காஃபி வித் கிட்டு – தாயின் புலம்பல் – வள்ளுவன் – ஹிந்தி – ஆலு டிக்கி

காஃபி வித் கிட்டு – பகுதி – 28

படித்ததில் பிடித்தது – ஒரு தாயின் புலம்பல்:

சமீபத்தில் ஒரு நண்பர் பகிர்ந்து கொண்ட கவிதை. எழுதியவருக்குப் பாராட்டுகளும் வாழ்த்துகளும்.

எனதருமை மகனே !

எனதருமை மகனே !

.

நான் உன்னை

மிகவும் நேசிக்கிறேன்..

முதுமையின் வாசலில் - நான்

முதலடி வைக்கையில் தள்ளாட்டம்

என்மீது வெள்ளோட்டம் பார்க்கும்...

.

கொஞ்சம் பொறுமை கொள்க !

அதிகம் புரிந்து கொள்க !

என்முதுமை பார்த்து முகம் சுளிக்காதே !

நான் சாப்பிடுகையில் கைநடுங்கி சாதம் சிந்தி விட்டேனா?

சத்தம் போடாதே.....

உனக்கு நான்

நிலாச்சோறு ஊட்டிய நாட்களை நினைவு கூர்க !

.

ஆடை மாற்றுகையில் அவதிப் படுகிறேனா?

அசுத்தம் செய்து விட்டேனா?

ஆத்திரப்படாதே.....

படுக்கை முழுதும் நீ பண்ணிய ஈரங்களின்

ஈர நினைவுகளை இதயம் கொள்க !

ஒரே பேச்சை, தேய்ந்த ஒலிநாடா போல்

ஓயாமல் சொல்கிறேனா?

சலித்துக் கொள்ளாதே....

.

ஒரே மாயாவி கதையை ஒரு நூறு முறை

எனை படிக்கச் சொல்லி

நீ உறங்கிய இரவுகளை ஞாபகம் கொள்க !

நான் குளிக்க மறுக்கிறேனா?

சோம்பேறித்தனம் என்று சுடுசொல் வீசாதே....

.

உன்னை குளிக்க வைக்க

நான் செய்த யுக்திகளை எனக்காக புதுப்பித்துத் தருக!

புதிய தொழில்நுட்பம்,

புதிய பயன்பாடுகள் - உன்

புயல் வேகப் புரிந்துகொளல்

சத்தியமாய் எனக்குச்

சாத்தியமில்லை !

கேவலப் படுத்தாதே....

கற்றுத் தருக !

கவனித்துப் பழக அவகாசம் தருக !

.

இனி,

சில நேரங்களில் - என் நினைவுப் பிரழ்ச்சியால்

ஞாபங்கள் அறுந்து போகலாம்,

உரையாடல் உடைந்து போகலாம்!

நிறைய வேலை இருக்கிறதென்று

நேரம் பார்க்காதே.....

.

என் அருகிருந்து

ஆற்றாமை தேற்றுக!

ஆசுவாசப் படுத்துக!

என் கால்கள் என்னை ஏமாற்றுகையில்

நீ முதல் நடை பழக

என் விரல் நீண்டது போல்

கைகொடுத்து எனக்கு உதவி செய்க !

ஒரு நாள் சொல்வேன் நான்,

வாழ்ந்தது போதுமென்று !

வருத்தப் படாதே.....

.

சில வயது வரை வாழ்க்கைக்கு அர்த்தமில்லை...

சில வயதுக்கு மேல் வாழ்வதில் அர்த்தமில்லை...

.

காலம் வரும்போது - இதை

நீயும் புரிந்து கொள்வாய் !

இனி நான் வேண்டுவதெல்லாம்

நீ எனை புரிந்து கொண்ட புன்னகை !

மீண்டும் மீண்டும் சொல்கிறேன் !

.

எனதருமை மகனே !

நான் உன்னை

மிகவும் நேசிக்கிறேன்.....

என் வாழ்வு

அமைதியோடும் - உன்

அரவணைப்போடும்

முற்று பெற

முயற்சியேனும் செய்வாயா..????

இந்த வாரத்தில் ஒரு குறும்படம் - வள்ளுவன்:

அவன் அவளாக மாறும்போது சந்திக்கும் பிரச்சனைகள். நல்லதொரு குறும்படம். சுமார் 22 நிமிடங்கள் ஓடும் இப்படத்தினை சிறப்பாக எடுத்திருக்கிறார்கள். பார்க்கலாமே…

ஹிந்தி அட்ராசிட்டிஸ்!

நண்பர் பத்மநாபன் எனக்கு முன்னரே தில்லி வந்து விட்டவர். தமிழகத்தில் இருக்கும்போது அவரது உறவினர் ஒருவரிடம் ஹிந்தி பயின்றவர். ஆனாலும் இன்னமும் ஹிந்தி வார்த்தைகள் அவ்வப்போது தடுமாறும் என்பது அவரே ஒத்துக் கொள்ளும் விஷயம்! சென்ற வாரம் அவருடன் பேசிக் கொண்டிருந்த போது சொன்ன ஒரு ஸ்வாரஸ்யமான விஷயம்… என்னை விடப் பெரியவர் என்றாலும், ஒருவரை ஒருவர் “அண்ணாச்சி” என்றே அழைத்துக் கொள்வது வழக்கமாக இருக்கிறது எங்களுக்குள்!

”அண்ணாச்சி, நேத்து அலுவலகத்தில் ஹிந்தி காரங்கிட்ட பேசும்போது பல்லியோட தொல்லை பத்தி சொல்ல வேண்டியிருந்தது. பல்லிக்கு ஹிந்தில என்ன வார்த்தைன்னு யோசிச்சு யோசிச்சு பார்க்கிறேன், மனசுக்குள்ள நிக்குது, ஆனா வெளியே வரமாட்டேங்குது! ரொம்ப யோசிச்சு யோசிச்சு, மண்டை குழம்பிடுச்சு… அடப் போங்கய்யா, நீங்களும் உங்க ஹிந்தியும்னு நினைச்சு “Crocodile கா சோட்டா பச்சா”ன்னு அடிச்சு விட்டேன்! ஹாஹா… அவனுங்களுக்கு புரிஞ்சு போச்சு நான் என்ன சொல்லவறேன்னு… ஓ… ‘சிப்கலியா?” என்று கரெக்டா ஹிந்தி வார்த்தையைச் சொல்ல, ‘அதே தான் சிப்கலியே தான்!”

இதை அவர் சிரித்தபடியே சொல்ல, நானும் சிரித்து ரசித்தேன். நீங்களும் சிரித்து ரசிக்க இங்கே பகிர்ந்தேன்!

ஆலு டிக்கி:

ப்ரயாக்ராஜ் நகரில் சாலையோரத்தில் வைத்து விற்றுக் கொண்டிருந்த ஆலு டிக்கி! உருளைக்கிழங்கை வேக வைத்து காரசாரமாக இப்படி விற்கிறார்கள்! சாப்பிடத் தோன்றினாலும் சாப்பிட வில்லை! பார்த்து ரசிக்க மட்டுமே!

என்ன நண்பர்களே, இந்த வாரத்தின் காஃபி வித் கிட்டு பதிவு உங்களுக்குப் பிடித்திருக்கிறதா? உங்கள் கருத்துகளைச் சொல்லுங்களேன். விரைவில் வேறு சில செய்திகளோடு மீண்டும் ச[சி]ந்திப்போம்….

 

நட்புடன்

வெங்கட்

புது தில்லி