காஃபி வித் கிட்டு - 140 - கோபுரம் சிறுகதை - ஆலு டிக்கி - தொடர்ந்து வந்த பேய் - நஹி ஃபிஸ்லேங்கே - நிழற்படம் - - பணக்காரர் - கேள்விகள்

 

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட தமிழகப் பயணம் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

யாரும் எனக்கு உதவி செய்வதில்லை என்று கவலைப்படுவதை முதலில் விட்டுவிடுங்கள். மற்றவரின் உதவி என்பது உங்களுக்குள்ளேயே இருக்கும் நம்பிக்கை எனும் ஆயுதத்தை ஒப்பிடும்போது தூசுக்கு சமமானது.

 

******

 

இந்த வாரத்தின் ரசித்த கதை - கோபுரம் :

 

இந்த வாரம் சு. சமுத்திரம் அவர்கள் எழுதி, 1993-ஆம் ஆண்டு வெளியான ஒரு சிறுகதை. கதையின் தலைப்பு - கோபுரம்.  வீட்டில் திருடர்கள் வந்தபோது நடந்தவற்றை கதையாக எழுதி இருக்கிறார்.  க்ரைம் கதை என்று சொல்வதை விட ஒரு குடும்பத்தலைவரின் தைரியம் குறித்த கதை என்று கூட சொல்லலாம்.  சிறுகதைகள்.காம் என்ற தலைப்பில் ஒரு தளம் இருக்கிறது.  அந்தத் தளத்தில் இது போன்று நிறைய கதைகள் இருக்கின்றன.  அவ்வப்போது அத்தளம் சென்று வாசிப்பதுண்டு. அப்படி வாசித்த கதை உங்களின் ரசனைக்கும் வாசிப்பிற்கும் இந்த வாரத்தின் ரசித்த கதையாக! கதைக்கான சுட்டி கீழே.

 

கோபுரம் - சு. சமுத்திரம்

 

******

 

இந்த வாரத்தின் உணவு/இனிப்பு - ஆலு டிக்கி:

 

வட இந்தியர்களுக்கு ஆலு என ஹிந்தியில் அழைக்கப்படும் உருளைக் கிழங்கு மீது அதீத ஆர்வம் உண்டு.  தினம் தினம் இந்த ஆலுவை உணவில் சேர்த்துக் கொள்ளும் சிலரைப் பார்த்திருக்கிறேன். ஹரியானா மாநிலத்தைச் சேர்ந்த நண்பர் ஒருவர் ஆலு, ப்யாஜ் போன்றவற்றை (DH)தடி எனப்படும் கணக்கில் - ஒரு (DH)தடி என்பது ஐந்து கிலோ அளவு - வாங்குவார். அதிலும் குறிப்பாக விலை குறைவாக இருக்கும் குளிர் நாட்களில்! அல்லது 25 கிலோ கொண்ட மூட்டையாக! ஒன்றிரண்டு மாதங்களில் அவை தீர்ந்து விடும்.  இந்த ஆலு கொண்டு விதம் விதமாக சமைப்பதுண்டு.  அப்படி ஒரு ஸ்னாக் (Snack) தான் ஆலு டிக்கி! சமீபத்தில் ஒரு உணவகத்தில் சாப்பிட்ட ஆலு டிக்கி மேலே படமாக!

 

******

 

பழைய நினைப்புடா பேராண்டி: தொடர்ந்து வந்த பேய்!

 

2014-ஆம் ஆண்டு இதே நாளில் வெளியிட்ட பதிவு - தொடர்ந்து வந்த பேய்!

 

நண்பர் பத்மநாபன் அவர்களின் அனுபவம் ஒன்று பதிவாக வெளியிட்டிருந்தேன். அந்தப் பதிவிலிருந்து சில வரிகள் இங்கே! முழு பதிவினையும் படிக்க, மேலே உள்ள சுட்டியைச் சொடுக்கலாம்! 

 

நாங்கள் சென்ற ஊருக்கும் எங்கள் ஊருக்கும் நடுவே இருந்த தூரம் முன்னர் சொன்னபடி ஏழு கிலோ மீட்டர். அதைக் கடப்பது ஒன்றும் பெரிய விஷயமில்லை என நாங்கள் நடந்தாலும் உள்ளூர ஒரு பயம் – காரணம், வழியில் ஒரு சுடுகாடு உண்டு! பொதுவாக இரவு நேரங்களில் மனித நடமாட்டம் சுத்தமாக இருக்காது. ஆனால் அங்கே பேய்கள் நடமாட்டம் அதிகமாக இருக்கும் எனவும், அவற்றிடம் மாட்டிக்கொண்ட மனிதர்கள் பற்றிய கதைகள் அவ்வப்போது கேட்டதுண்டு. இருந்தும் பயத்தினை வெளியே காட்டாது நடந்து கொண்டிருந்தேன். நண்பர் சும்மா இருக்காது, “ஏலே, பேய் நடமாட்டம் இங்கே உண்டுலே... கொலுசு சத்தமோ, மல்லிகை வாசமோ வந்தா திரும்பிப் பார்க்காதேலே” எனச் சொல்லவே மனதில் கிலி அதிகமானது!

 

சுடுகாடு சமீபத்தில் வந்து கொண்டிருந்தபோது ‘வெரசா நடப்போம்....  வழியிலே மாடன் கோவில் இருக்குல்லா, அதுவரைக்கும் நடந்துட்டா அவர் பார்த்துப்பார்” என்று சொல்லி நடையை விரைவாக்க, பின்னாலே “சரசர” வென சத்தம். கூடவே காற்றில் மல்லிகை வாசம் வர இரண்டு பேருக்கும் கிலி! ஓட்டமும் நடையுமாக மாடன் சாமி கோவில் வரை வந்துவிட்டோம். ஆனாலும் எங்களுக்கு பின்னால் திரும்ப தைரியமில்லை. ஏனெனில் மாடன் சாமி கோவிலைத் தாண்டிய பிறகும் மல்லிகை வாசம் தொடர்ந்து கொண்டிருந்தது!

 

மாடன் சாமிக்கும் பயப்படாத இந்த பேய், நிச்சயம் அடுத்த ஒன்றரை கிலோ மீட்டர் தொலைவில் இருக்கும் சுடலைமாடனுக்கு நிச்சயம் கட்டுப்படும், ஆகவே இன்னும் வேகமாக நடப்போம் எனச் சொல்லிக் கொண்டே, ”திரும்பி மட்டும் பார்க்காதலே, ஒரே அப்பு அப்பினா, ரத்தம் கக்கிடுவோம்!” என நடந்தோம் – அதாவது நடப்பதாக நினைத்து ஓடினோம்.

 

******

 

இந்த வாரத்தின் ரசித்த விளம்பரம் - நஹி ஃபிஸ்லேங்கே :

 

சோமானி டைல்ஸ் விளம்பரம் ஒன்று - ஹிந்தியில் இருந்தாலும் ரசிக்க முடியும் என்றே தோன்றுகிறது! பாருங்களேன்.  அந்தச் சிறுவனின் நடிப்பும் மூதாட்டியின் நடிப்பும் சிறப்பு.

 

மேலே உள்ள காணொளியைப் பார்க்க இயலவில்லை என்றால், கீழே உள்ள சுட்டி வழி பார்க்கலாம்!

 

Somany Ceramics #NahiPhislenge - YouTube

 

******

 

இந்த வாரத்தின் ரசித்த நிழற்படம் - குண அமுதன் :

 

குண அமுதன் எனும் நிழற்படக் கலைஞர் எடுக்கும் படங்களுக்கு நான் ஒரு ரசிகன்.  அவரது முகநூல் பக்கத்தில் பகிர்ந்து கொள்ளும் படங்கள் ஒவ்வொன்றுமே அழகு.  தொடர்ந்து ரசிக்கும் விதத்தில் அவர் எடுத்த நிழற்படங்கள் இருக்கும்.  அப்படி பகிர்ந்த படங்களில் சமீபத்தில் ஒன்று மிகவும் இரசிக்கும்படி இருந்தது.  படமும் அது குறித்த தகவலும் அவர் வார்த்தைகளில் கீழே!

 

தண்ணீரில் விழும் நிழல் உங்களின் மறுபதிப்பாக இருக்கிறது. வெறும்தரையில் வெயிலால் கருகிப் போய் விடுகிற நிழலின் உருவம் தண்ணீரிலே உயிர் பெற்றுவிடுகிறது. ஒரு புகைப்படக்காரனுக்கு அது அகம் நிறைக்கும் அனுபவம்.

 

தண்ணீரில் விழும் பிம்பத்தின் வீரியம் தெரிவதற்காக இங்கே படத்தை தலைகீழாகப் பதிவு செய்திருக்கிறேன். உங்களுக்கும் அந்த அனுபவம் கிட்டும் என்று நம்புகிறேன்.

 

-           இரா.குண அமுதன்.

 

******

 

இந்த வாரத்தின் ரசித்த நிலைத்தகவல் - பணக்காரர் :

 

இந்த வாரத்தின் ரசித்த நிலைத்தகவல் மேலே! சொல்லும் விஷயம் சரி தானே!

 

*****

 

இந்த வாரத்தின் எண்ணங்கள்- கேள்விகள்

 

சிலர் எதைப்பற்றி வேண்டுமானாலும் கேள்வி கேட்டு விடுகிறார்கள் - அதுவும் கேட்கப்படும் கேள்வி தனிநபர் சம்பந்தப்பட்டதாக இருந்தாலும் - கேட்பவர்கள் முதியவர்களாக இருந்தும் கூட!  அதிலும் கேட்கப்படும் நபருக்கு, அந்த கேள்வியின் பதிலில் எந்த விதத்திலும் சம்பந்தம் இல்லாவிடினும் கூட!  சபை நாகரீகம் என்ற ஒன்று குறித்து அவர்கள் அறிந்திருக்க வாய்ப்பில்லை போலும்! என்ன வேண்டுமானாலும் கேட்கலாம் என நினைப்பவர்கள், அப்படிக் கேட்பது அவர்கள் பிறப்புரிமை என நினைத்து விடுகிறார்கள் போலும்! 

 

*****

 

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….