காஃபி வித் கிட்டு - 143 - TULIP பூக்கள் - தென்னிந்தியாவிலும் பனிப்பொழிவு - தொடர் பதிவு - பசலை - உயிரோவியம் - கூச்சம் - நிலவு

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட யாரிவள் பகுதி இரண்டு பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

எத்தனையோ மேதைகளை உருவாக்கி பெருமையுடன் உயர்ந்து நிற்கும் பள்ளிக்கூடம், வாக்குச் சாவடியான பின்பு, ஒரு உத்தமனைக் கூட உருவாக்க முடியாமல் உடைந்து போகிறது :(

 

******

 

இந்த வாரத்தின் நிழற்படம் - TULIP பூக்கள் :

 

ஜனவரி கடைசி, ஃபிப்ரவரி மாதம்  TULIP பூக்களுக்கான காலமாக தலைநகரில் இருக்கிறது.  பல சாலை சந்திப்புகள், பூங்காக்கள் என பல இடங்களில் இந்த பூக்கள் பார்வையாளர்களை கவர்ந்திழுக்கின்றன.  சில பூங்காக்களுக்குச் சென்றாலும் பெரிதாக படம் எடுக்கவில்லை.  சாலை சந்திப்புகளிலும் நின்று படம் எடுக்கத் தோன்றவில்லை.  சென்ற சில வாரங்களாக ஞாயிற்றுக் கிழமைகளில் மதிய நேரம் நண்பர்கள் சிலர் குடும்பத்துடன் டால்கட்டோரா பூங்காவில் சந்திப்பதை வழக்கமாக வைத்திருக்கிறோம்.  அதிக குளிரும் இல்லாமல் அதிக வெய்யிலும் இல்லாமல் இருக்கும் இந்த நாட்கள் இப்படியான சந்திப்புகளுக்குச் சிறந்தது.  அப்படி ஒரு ஞாயிற்றுக் கிழமை பூங்கா சென்ற போது எடுத்த ஒர் நிழற்படம் மேலே!

  

******

 

இந்த வாரத்தின் தகவல் - தென்னகத்திலும் பனிப் பொழிவு :

 

இந்தியாவின் வடக்கு மாநிலங்களில் பனிப்பொழிவு அதிகமாக இருக்கும் என்பதை உங்களில் பலரும் அறிந்திருக்கலாம்.   ஆனால் தென்னிந்தியாவிலும் ஒரு இடத்தில் பனிப்பொழிவு இருக்கும் என்ற தகவலை நீங்கள் அறிந்ததுண்டா?  தென்னகத்தில் ஜீரோ டிகிரிக்கும் கீழே தட்பவெப்பம் இருக்கும் ஒரு இடம் உண்டு என்பதை நீங்கள் அறிவீர்களா?  விசாகப்பட்டினத்திலிருந்து சுமார் 100 கிலோ மீட்டர் தொலைவில் இருக்கும் லம்பாசிங்கி (LAMBASINGI) எனும் இடம் ”தென்னகத்தின் கஷ்மீர்” என்று அறியப்படுகிறது என்று ஒரு தகவலை இந்தத் தளத்தில் படித்தேன்.   அழகான இடம் என்று தெரிகிறது.  இந்த இடத்தினை உங்களில் யாரேனும் பார்த்ததுண்டா?  வாய்ப்பு கிடைத்தால் சென்று வரலாம் என்று தோன்றுகிறது! இந்த இடத்தின் அருகாமையில் அருவி, காஃபித் தோட்டங்கள் போன்றவையும் உண்டு என்பது கூடுதல் தகவல்.  இரண்டு மூன்று நாட்கள் சுற்றுலாவாக இந்தப் பகுதிக்குச் சென்று வரலாம்!

 

******

 

பழைய நினைப்புடா பேராண்டி: ஒன்றிலிருந்து பன்னிரெண்டு வரை [தொடர் பதிவு]

 

2012-ஆம் ஆண்டு இதே நாளில் வெளியிட்ட பதிவு - ஒன்றிலிருந்து பன்னிரெண்டு வரை [தொடர் பதிவு]

 

வலையுலகில் நிறைய தொடர் பதிவுகள் வெளிவந்து கொண்டிருந்த நாட்கள் உங்களில் நினைவில் இருக்கலாம். தொடர் பதிவுகளை எழுத அழைப்பு வந்தாலே பயம் வந்த நாட்கள் கூட உண்டு! ஹாஹா…  2012-ஆம் ஆண்டில் இதே நாளில் இப்படி ஒரு தொடர் பதிவு எழுதி வெளியிட்டு இருந்தேன். அந்தப் பதிவிலிருந்து சில வரிகள் இங்கே.  

 

1977-ஆம் வருடம் - எனக்கு அப்ப 6 வயது.  அப்பாவும் அம்மாவும் நெய்வேலி பழுப்பு நிலக்கரி நிறுவனம் நடத்தும் துவக்கப்பள்ளியில் என்னை முதலாம் வகுப்பில் சேர்த்து விட்டார்கள் – அதே பள்ளியில் எனது அக்காவும் படித்ததால்! முதல் வகுப்பில் எனக்கு வகுப்பு ஆசிரியர் திருமதி நாமகிரி.  அவர்களுக்கு குழந்தைகள் இல்லாத குறையே தெரியாமல் எங்களையே குழந்தைகளாகப் பாவித்தவர்.  பாதி நாட்கள் எனது வகுப்பில் இருந்து அழுதபடியே ஓடி அக்காவின் வகுப்புக்குச் சென்றுவிடுவேன்.  அவளும் ஒவ்வொருமுறையும் எனது வகுப்பில் அலுக்காமல் கொண்டு வந்து விடுவாள்.  இப்படி ஓடிப்போவது குறைந்தது ஒரு மாதமாவது நடந்திருக்கும் என அக்கா சொல்வாள்! 

 

பிறகு ஒரு பிடிப்பு வந்து என் வகுப்பிலேயே அமர்ந்து படிக்க ஆரம்பித்தேன்.  ஒவ்வொரு நாளும் காலையில் அம்மா கொடுக்கும் மதிய உணவினை [சாம்பார் சாதம், தயிர் சாதம் என்று தினமும் ஏதாவது ஒன்று] ஒரு அலுமினிய தூக்கிலும், பாடப் புத்தகங்களை ஒரு அலுமினிய பெட்டியிலும் எடுத்துக்கொண்டு வீட்டிலிருந்து கிளம்பி ஒன்றரை கிலோ மீட்டர் தொலைவில் இருக்கும் ”என்.எல்.சி. துவக்கப்பள்ளி, வட்டம்-18” செல்வேன்.  முதல் ஐந்து வகுப்புகளில் ரொம்ப சமத்து நான்….[அதற்குப் பிறகு தான் வால் முளைத்ததோ!]  எந்த விஷமமும் செய்ய மாட்டேன் என அம்மா இப்போதும் கூட சொல்வார்கள்…  ரொம்ப பொறுமைசாலி எனச் சொல்லி, அதுவும் இரண்டாம் வகுப்பு படித்தபோது பள்ளி ஆண்டு விழாவில் “கல் பொறுக்கிப் போடும்” ஒரு விளையாட்டில் பொறுமையாக பொறுக்கியும் மூன்றாம் பரிசாக, ஆரஞ்சு வண்ணத்தில் ஒரு பிளாஸ்டிக் கிண்ணம் [அதை பிச்சைக்காரன் கிண்ணம் என மற்றவர்கள் சொன்னது வேறு விஷயம்] பரிசாகக் கிடைத்ததை  அடிக்கடிச் சொல்வார்கள்.  [பல வருடம் அந்தக் கிண்ணத்தை  அம்மா வைத்திருந்தார்கள்…]

 

முழு பதிவினையும் மேலே கொடுத்திருக்கும் சுட்டி வழி படித்து ரசிக்கலாம்! 

 

******

 

இந்த வாரத்தின் வலைப்பூ அறிமுகம் - அந்தமான் தமிழ் நெஞ்சன் :

 

இந்த வாரம் கம்பராமயணம் குறித்து தேடிய போது இந்த வலைப்பூவை பார்க்க நேர்ந்தது.  சில பதிவுகளை படித்த போது ”அந்தமான் தீவில் துறைமுகப் பணியில் பொறியாளரான என் தமிழ் இலக்கிய தாகத்தின் வடிகால் தான் இந்த வலைப்பூ” என்ற அவரது அறிமுகம் பார்க்க நேர்ந்தது.  ஆஹா அந்தமான் வாசி என்றதுமே மனதில் எனது அந்தமான் பயணம் நினைவுக்கு வந்தது.  தமிழ் மீது பற்றுக் கொண்ட இந்த மனிதர் எழுதிய பதிவுகள் ரசனைக்குரியதாக இருக்கிறது.  அப்படி ஒரு பதிவு “பசலை” குறித்த பதிவு - இலக்கியலிருந்து பசலை குறித்து சில எடுத்துக்காட்டுகளை எடுத்துக் காட்டியிருக்கிறார் கிருஷ்ணமூர்த்தி என்கிற இந்த வலைப்பதிவாளர்.  ”கையும் ஓடலை காலும் ஓடலை = பசலை” என்ற தலைப்பிட்ட பதிவை கீழே உள்ள சுட்டி வழி படித்து ரசிக்கலாம்!

 

”கையும் ஓடலை காலும் ஓடலை = பசலை”

 

******

 

இந்த வாரத்தின் ரசித்த ஓவியம் - உயிரோவியம் :

 

Biswaal. the artist என்ற ஒரு ஓவியக் கலைஞரின் முகநூல் பக்கத்தை அவ்வப்போது பார்ப்பதுண்டு (நன்றி தோழி ஸ்ரீமதி ரவி).  சில ஓவியங்கள் உயிரோட்டத்துடன் இருப்பதைப் பார்க்கும்போதே அவரின் திறமை வியக்க வைக்கும். சமீபத்தில் பார்த்து ரசித்த அவர் வரைந்த ஓவியம் இரண்டு மேலே! எத்தனை சிறப்பாக வரைந்திருக்கிறார் பாருங்களேன். 

 

******

 

இந்த வாரத்தின் ரசித்த நகைச்சுவை - கூச்சமா இருக்கு :

*****

 

இந்த வாரத்தின் ரசித்த நிழற்படம் - நிலவு

 

நிலவு யாருக்குத் தான் பிடிக்காது! இந்த நிலவும் உங்களுக்குப் பிடிக்கலாம்! நான் பார்த்து ரசித்த இந்த நிழற்படத்தினை நீங்களும் பாருங்களேன். 

 

*****

 

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….