ருபின் பாஸ் - உத்திராகண்ட் - மலையேற்றம் - ப்ரேம் Bபிஷ்ட் - பகுதி ஒன்று

 

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட யாரிவள் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

அவமானத்திற்கு இரண்டு குணங்கள் உண்டு - ஒன்று கோழையை தற்கொலை செய்து கொள்ள வைக்கிறது; மற்றொன்று வீரனை வாழ்ந்து காட்ட வைக்கிறது; இதில் எதுவாக நாம் இருக்க வேண்டும் என்பதை நாமே முடிவு செய்ய வேண்டும்.

 

******

 

சில வாரங்கள் முன்னர் அலுவலக நண்பர் எழுதி பயணத் தொடரான கேதார் தால் உங்களுக்கும் நினைவில் இருக்கும் என நம்புகிறேன்.  சென்ற ஞாயிறன்று அவரின் பயணங்களில் ஒன்றான ”ருபின் பாஸ்” என்ற மலையேற்றப் பயணத்தின் போது எடுத்த நிழற்படங்களில் சிலவற்றை பகிர்ந்து கொள்ள ஆரம்பித்ததும் நினைவில் இருக்கலாம். இன்று முதல் சில பதிவுகளாக ருபின் பாஸ் பயணத்தில்/மலையேற்றத்தில் கிடைத்த அனுபவங்களை உங்களுடன் பகிர்ந்து கொள்ளப் போகிறேன் - அதாவது நண்பர் ப்ரேம் Bபிஷ்ட் பகிர்ந்து கொள்ளப் போகிறார்.  இந்தப் பயணமும் சில ஆண்டுகளுக்கு முன்னர் செய்த பயணம் - அதாவது 2016-ஆம் ஆண்டு செய்த பயணம் தான்.  இவ்வளவு நாட்கள் கழித்து இப்படி ஒரு பயணத் தொடர் தேவையா என்று உங்களுக்குத் தோன்றினால் அதற்கான பதில் - இப்படியான பயணத் தொடர்கள் உங்களில் சிலருக்கேனும் பயன்படலாம் எனும் நல்லெண்ணம் தான்.  

 

சரி எங்கே இருக்கிறது இந்த ருபின் பாஸ்?  இந்த மலையேற்றம் உத்திராகண்ட் மாநிலத்தில் துவங்கி ஹிமாச்சலப் பிரதேச மாநிலத்தில் முடிவடையும் ஒரு மலையேற்றம். India Hikes மற்றும் Trek the Himalayas நிறுவனங்கள் இந்த மலையேற்றப் பயணங்களை ஏற்பாடு செய்கிறார்கள்.  அவர்கள் மூலமும் இந்த மலையேற்றப் பயணங்களை மேற்கொள்ளலாம் என்றாலும், நண்பர் ப்ரேம் உத்திராகண்ட் மாநிலத்தினைச் சேர்ந்தவர் என்பதால் இந்தப் பகுதிகள் குறித்த அனுபவமும், தகவல்களும் அவரிடத்தில் நிறையவே இருக்கிறது என்பதால் அவர்களாகவே சென்று வருவார்கள்.  பயணத்தொடரில் அவர் எழுதி வைத்திருந்த தகவல்கள் தவிர வேறு சில தகவல்களும் சேர்த்து இங்கே பகிர்ந்து கொள்ள இருக்கிறேன்.  வாருங்கள் நண்பர் ப்ரேம் அவர்களின் வார்த்தைகளில் (ஆங்கில மூலம்) - எனது தமிழ் மொழிபெயர்ப்பில் பார்க்கலாம் - ஓவர் டு ப்ரேம் Bபிஷ்ட்!  - வெங்கட் நாகராஜ், புது தில்லி

 

*****

மலையேற்றத்தின் போது...

 

கேதார் தால் பயணம் குறித்து உங்களுடன் பகிர்ந்து கொண்டதில் எனக்கு மகிழ்ச்சி. அந்தத் தொடருக்கு நீங்கள் அனைவரும் அளித்த தொடர்ந்த ஆதரவிற்கு மனம் நிறைந்த நன்றி.  இந்தப் பதிவுடன் தொடங்கும் எனது அடுத்த பயணம் குறித்த தொடருக்கு உங்களை வரவேற்கிறேன். நண்பர் வெங்கட் நாகராஜ் அவர்களின் தளம் வழி எனது அனுபவங்களை பகிர்ந்து கொள்வதில் மகிழ்ச்சி.  எங்களது இந்தப் பயணம் 2016-ஆம் ஆண்டில் மேற்கொண்ட பயணம்.  

 

அழகானதாக மட்டுமல்லாது சவாலானதுமான மலையேற்றம் இந்த ருபின் பாஸ் மலையேற்றம். ருபின் பாஸ் ஹிமாச்சல பிரதேசத்தில் அமைந்துள்ளது என்றாலும் இந்த மலையேற்றமானது உத்தரகாண்ட் மாநிலத்தின் உத்தர்காஷி மாவட்டத்தில் உள்ள தௌலாவில் தொடங்கி மேல் நீர்வீழ்ச்சி வழி பயணித்து, 15250 அடி ருபின் பாஸ் கடந்த பிறகு ஹிமாச்சலப் பிரதேசத்தின் கின்னோர் மாவட்டத்தின் அழகிய சாங்க்லா பள்ளத்தாக்கில் முடிவடைகிறது. காடுகள், கிராமங்கள், நெல் வயல்கள், புல்வெளிகள், பனிப்பாறைகள் மற்றும் பனி நிறைந்த மலைச்சரிவுகள் வழியாக செல்லும் இந்த பாதையானது அடிப்படையில் ஆடுகள் மேய்க்கும் மேய்ப்பர்கள் பயன்படுத்தும் பாதையாகும். இந்தப் பயணத்தினை  என்னைப் போலவே உத்தரகாண்ட் மாநிலத்தைச் சேர்ந்தவர்களான ராஜேஷ் லகேடா மற்றும் ஜஸ்பால் சிங் ராவத் ஆகியோருடன் சேர்ந்து மூன்று பேர் கொண்ட குழுவாக இந்த மலையேற்றத்தினைச் செய்ய முடிவு செய்தோம். ஐந்து நாட்கள் மலையேற்றம் உட்பட ஒரு வார கால பயண அட்டவணையை உருவாக்கிக் கொண்டு அதன் படி பயணித்தோம். அந்த அனுபவங்களை உங்கள் அனைவருடனும் பகிர்ந்து கொள்ள விரும்புகிறோம்!

 

பயணத்தின் முதல் நாள் - 11 ஜூன் 2016:

நோய்டாவிலிருந்து சங்க்ரி...

 

எங்களது இந்தப் பயணம் தில்லியை அடுத்த நோய்டாவிலிருந்து காலை 5 மணியளவில் தொடங்கியது.  எனது நான்கு சக்கர வாகனத்தில் தான் பயணித்தோம்.  அன்றைய தினம் தில்லியிலிருந்து புறப்பட்டு கர்னால், யமுனா நகர், விகாஸ் நகர் வழியே தில்லியிலிருந்து சுமார் 450 கிலோமீட்டர் தொலைவில் இருக்கும் சங்க்ரி எனும் இடத்திற்கு பயணம் செய்வது எங்களது திட்டமாக இருந்தது. சங்க்ரி எனும் சிற்றூரில் தான் அன்றைய இரவு தங்குவதற்காக GMVN (Garhwal Mandal Vikas Nigam) நடத்தும் தங்குமிடத்தில் முன்பதிவு செய்திருந்தோம். GMVN நிறைய தங்குமிடங்களை உத்திராகண்ட் மாநிலத்தின் கட்வால் பகுதியில் அமைத்திருப்பதோடு சில பயண ஏற்பாடுகளையும் செய்து தருகிறார்கள்.  அரசு நிறுவனம் என்பதால் பாதுகாப்பான இடங்களில் இந்த தங்குமிடங்கள் அமைந்திருப்பதோடு வசதிகளும் சரியாகவே இருக்கும்.  கொஞ்சம் அதிக கட்டணம் என்றாலும் சிறப்பான வசதிகளுடன் இந்த இடங்கள் இருக்குமென்பது ஒரு சிறப்பு.  உத்திராகண்ட் மாநிலத்தில் பல இடங்களில் இவர்களது தங்குமிடங்கள் உண்டு. உங்கள் வசதிக்காக, அவர்களது வசதிகளைப் பெற அவர்களது இணையதள முகவரி இங்கே.  இத்தளத்தின் வழி நீங்கள் முன்பதிவு செய்து கொள்ள முடியும். 

தங்குமிடத்தின் ஒரு படம்...

 

முதல் நாள் முழுவதும் சாலைப் பயணம் தான்.  பயணம் அதிக தூரம் என்றாலும் நடுவில் சில இடங்களில் நின்று ஓய்வு எடுத்ததோடு, உணவும் உண்டு எங்கள் இலக்கை முதல் நாள் மாலை சென்றடைந்தோம்.  அடுத்த நாள் பயணம் எப்படி இருந்தது? என்னென்ன தகவல்கள் உண்டு என்பதை எல்லாம் அடுத்த பகுதியில் சொல்கிறேன்.  தொடர்ந்து இந்தப் பயணத்தில் எங்களுடன் இணைந்திருக்க உங்கள் அனைவரையும் அழைக்கிறேன்.  தொடர்ந்து பயணிப்போம்.

 

ப்ரேம் Bபிஷ்ட்

 

******

 

நண்பர் ப்ரேம் அவர்களின் அனுபவங்கள் உங்களுக்கும் பிடித்திருக்கலாம்.  பதிவு வழி பகிர்ந்து கொண்ட விஷயங்கள் குறித்த தங்களது கருத்துகளை பின்னூட்டம் வாயிலாக பகிர்ந்து கொள்ளலாமே!  விரைவில் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….