வாசிப்பனுபவம் - ரங்கா Vs ரங்கா பாகம் 2 - அஜுத்யா காந்தன்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட காஃபி வித் கிட்டு பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

******

சஹானா இணைய இதழின் வாசிப்புப் போட்டிக்காக, நான் படித்த, முகநூலில் கருத்துரை பகிர்ந்து கொண்ட ஒரு மின்னூல் அஜுத்யா காந்தன் அவர்கள் எழுதிய “ரங்கா Vs ரங்கா பாகம் - 2” எனும் மின்னூல். மின்னூல் குறித்து இன்றைய பதிவில் பார்க்கலாம் வாருங்கள்! 

வகை: நாவல்

வெளியீடு: அமேசான் கிண்டில்

பக்கங்கள்: 367

விலை: ரூபாய் 240/-

மின்னூல் தரவிறக்கம் செய்ய சுட்டி கீழே:

ரங்கா vs ரங்கா: பாகம் - 2 (Tamil Edition) eBook : Kanthan, Ajudhya: Amazon.in: Kindle Store

******* 

பாகம்-2 என்று சொல்லும் போதே இந்தக் கதைக்கு பாகம் ஒன்றும் உண்டு என்பது உங்களுக்கு விளங்கும்.  இப்படி பாகங்கள் கொண்ட நூலினை வாசிப்பதில் ஒரு சிக்கல்! தொடர்ந்து வாசிக்க வேண்டியிருக்கும் - இந்த மாதம் முதல் பாகத்தினை வாசித்து விட்டு அடுத்த மாதம் இரண்டாம் பாகம் வாசித்தால், முதல் பாகத்தில் படித்த சில விஷயங்களை நாம் மறந்து விடக் கூடும்.  இரண்டு பாகங்களுக்கே இப்படி என்றால், போட்டியில் உள்ள ஒரு நூலுக்கு மொத்தம் நான்கு பாகம்! மாதம் ஒரு பாகம் என்றால், நான்கு மாதங்கள் வரை அந்தக் கதையை நினைவில் வைத்துக் கொள்ள வேண்டும்! மறதி இருப்பவர்களுக்கு இது கொஞ்சம் கடினமான விஷயம் என்பதை இங்கே பதிவு செய்து விட்டு, இன்றைக்கு பார்க்கப் போகும் நூலினை குறித்து எழுதத் தொடங்குகிறேன். 

இரண்டாவது பாகம் என்பதால் முதல் வேலையாக, நூலின் முதல் பாகத்தினை வாசித்தேன் (சென்ற மாதப் போட்டியில் இருந்தாலும், வாசிக்க இயலவில்லை!) முதல் பாகம் குறித்து சுருக்கமாகச் சொல்லி விடுகிறேன். நூலில் இரண்டு ரங்காக்கள் - ரங்கா எனும் மூதாட்டி - அவரது வளர்ப்பில் வளரும் பேத்தி ரங்கா!  வீட்டுச் சூழல்கள், பேத்தி ரங்கா பார்க்கும் பல குடும்பங்களில் இருக்கும் ஆண்களின் நடவடிக்கைகள் அவளை ஆண்களை வெறுப்பவளாக மாற்றி விடுகிறது.  அவளுடனேயே பாட்டி வீட்டில் வளரும் வாசு - பாட்டி ரங்கா, வாசுவையும் வளர்க்கிறார் - வாசுவின் பெற்றோர் காலமாகிவிட, அவனுக்கென்று யாரும் இல்லை என்பதால்! வாசு மட்டுமே பேத்தி ரங்காவினைப் பொறுத்த வரை நல்லதொரு தோழன், சகோதரன். மற்ற ஆண்கள் அனைவரின் மேலும் ஒரு வெறுப்பு. தனக்குப் பிறகு பேத்தி ரங்காவிற்கு யாருமே இல்லாமல் போய்விடுமோ என்று அவளை திருமணம் செய்து கொள்ள வற்புறுத்துகிறாள் பாட்டி ரங்கா. ஆனால் பேத்தி ரங்கா எடுத்த முடிவு கொஞ்சம் வித்தியாசமானது - நம் நாட்டின் சூழலுக்கு சரியில்லாதது!  அப்படி எடுத்த முடிவு - திருமணம் செய்து கொள்ளாமல், Test Tube Baby முறையில் யாராவது ஒரு டோனர் மூலம் குழந்தை பெற்றுக் கொள்வது என்ற முடிவு.  அவளுக்கு இரட்டை குழந்தைகள் - ஆண் ஒன்று, பெண் ஒன்று இப்படி பிறக்கிறது.  தகப்பன் யார் என்று தெரியாமல், தாய் மட்டுமே இரண்டு குழந்தைகளை வளர்ப்பது இந்த சமுதாயத்தில் சாத்தியமா?  அவளுக்கு என்னென்ன பிரச்சனைகள் வந்தது என்பதெல்லாம் சொல்லி நம்மை யோசிக்க வைக்கிறார் முதல் பாகத்தில்! 

சரி இரண்டாம் பாகத்திற்கு வருவோம். பேத்தி ரங்கா குழந்தை பெற்றுக் கொள்வது, பாட்டி ரங்காவின் பால்ய கால நண்பரும், மருத்துவருமான சேதுராம் அவர்களின் மருத்துவமனையில்! மருத்துவர் சேதுராம் அவர்களின் பேரன் உபேந்திரா - அவர் ஒரு வக்கீல்.  பேத்தி ரங்காவும் ஒரு வக்கீல்.  எப்போது சந்தித்தாலும் உபேந்திரா மற்றும் ரங்கா ஆகியோர் சண்டையிட்டுக் கொண்டே இருக்கிறார்கள்.  அதிலும் ரங்கா, உபேந்திராவினை இரண்டு வழக்குகளில் வென்றுவிட, இருவரும் பாம்பும் கீரியும் போல சண்டை போட்டுக் கொண்டிருக்கிறார்கள்.  திருமணமே ஆகாமல், குழந்தை பெற்றுக் கொண்ட ரங்கா மீது அப்படி ஒரு நல்ல அபிப்ராயம் இல்லை உபேந்திராவிற்கு! ஆனால் அவனுக்கு தெரியாத ஒரு விஷயம் - அந்த இரண்டு குழந்தைகளுக்கான விந்தணு அவனிடமிருந்து எடுக்கப்பட்டது என்பதும், அதனால் அக்குழந்தைகளின் தகப்பன் அவனே என்பதும்.  மருத்துவமனை அவர்களுடையது என்பதால் ஒரு சோதனைக்காக விந்தணுக்களைக் கொடுத்திருக்க, கல்யாணமே வேண்டாம் என்று சுற்றிக் கொண்டிருந்த அவனையும், அதே எண்ணத்தில் ஆண்கள் மீது வெறுப்பாக இருந்த ரங்காவையும் முடிச்சுப் போட்டிருக்கிறார்கள் - இருவருக்குமே தெரியாமல். 

தனது குழந்தைகள் என்று தெரிந்ததும், உரிமை கோரி வழக்கு போடுகிறான் உபேந்திரா.  தீர்ப்பு அவனுக்கு சாதகமாகி விட, அதன் பிறகு என்ன நடக்கிறது. தந்தை யாரென்று தெரியாமல் குழந்தைகள் வளர்ப்பதில் என்னென்ன பிரச்சனைகள் உண்டாகிறது, சமுதாயத்தில் அவளுக்குக் கிடைத்த வேதனைகள், தீர்வு தான் என்ன என்பதையெல்லாம் விரிவாக எழுதி இருக்கிறார் கதாசிரியர் அஜுத்யா காந்தன்.  உபேந்திரா - ரங்கா ஆகியோர் திருமணம் புரிந்து கொண்டார்களா? அவர்கள் சந்தித்த பிரச்சனைகள் என்னென்ன என்று நீங்கள் தெரிந்து கொள்ள நூலாசிரியரின் ரங்கா Vs ரங்கா மின்னூலை வாசிக்கலாம்.  

வித்தியாசமான ஒரு கதைக்கருவினை எடுத்து, அதில் உள்ள பிரச்சனைகளையும் நாட்டு நடப்பையும் சொல்லி இருக்கும் நூலாசிரியருக்கு வாழ்த்துகளும் பாராட்டுகளும்.  இன்றைக்கு சமுதாயத்தில் இப்படியான சில Single Parent-கள் இருந்தாலும் அவர்கள் சந்திக்க இருக்கும் பிரச்சனைகளை இந்த நூல் வழி பார்க்கலாம்!

*******

எங்களது இல்லத்திலிருந்து, நான், எனது இல்லத்தரசி மற்றும் நண்பர் சுப்ரமணியன் என மூவரும் எழுதி இதுவரை வெளியிட்ட மின்னூல்களுக்கான சுட்டி கீழே.  முடிந்தால் எங்களது நூல்களை தரவிறக்கம் செய்து வாசிப்பதோடு, உங்கள் வாசிப்பனுபவங்களையும் பகிர்ந்து கொண்டால் மகிழ்ச்சி!  

சந்தித்ததும் சிந்தித்ததும்: மின்புத்தகங்கள்...

மீண்டும் ஒரு வாசிப்பனுபவத்துடன் உங்கள் அனைவரையும் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து….