மஹா கும்பமேளா – ஒரு பயணம் – பகுதி 5 – பலியிடப்பட்ட யானை

மஹா கும்பமேளா – ஒரு பயணம் – பகுதி 1 பகுதி 2 பகுதி 3 பகுதி 4

முஸ்கி: இத்தொடரின் முந்தைய பகுதியான மஹா கும்பமேளா – ஒரு பயணம் – பகுதி 4 – குகனின் வழித்தோன்றலுடன் ஒரு பேட்டி ஏனோ என்னைத் தொடரும் நண்பர்களின் டாஷ்போர்டில் அப்டேட் ஆகவில்லை. படிக்காதவர்கள் படித்துவிட்டு இங்கே வரலாமே!

அமிதாப் கட்டிய படகுத் துறை

சென்ற பதிவின் முடிவில் படகில் பயணித்த போது பார்த்த விஷயங்களை இந்தப் பகிர்வில் சொல்கிறேன் எனச் சொல்லி இருந்தேன். நாங்கள் படகில் ஏறி அமர்ந்த இடம் யமுனை ஆற்றில் இருக்கும் படகுத் துறை. இங்கிருந்து கங்கையை நோக்கிச் செல்லும் போது தான் அலஹாபாத் கோட்டை வரும். அதற்கு முன்னர் நடிகர் அமிதாப் பச்சன் அவர்கள் இந்த பாராளுமன்ற தொகுதியின் உறுப்பினராக  இருந்தபோது கட்டிய படகுத் துறை வருகிறது. கோவா போலவே இங்கும் ஒரு அழகிய படகுத் துறை வேண்டுமென கட்டினார் என எங்கள் குகன் சொல்லிக் கொண்டு வந்தார்.

 ஆற்றின் நடுவில் மிதவை!

ஆற்றின் நடுவே பெரிய கயிறு கொண்டு பல டின்களை இணைத்து மிதவையாகப் போட்டு வைத்திருந்தார்கள் இராணுவ வீரர்கள். மிதவைக்கு அப்பால் படகுகளோ, சுற்றுலா வந்த பயணிகளோ சென்று விடக்கூடாது என எச்சரிக்கை செய்யவே இந்த தடை. தடைக்கு அப்புறம் அவ்வப்போது விரைவுப் படகுகளில் அவர்கள் ரோந்து செல்வதை பார்க்க முடிந்தது. கோடிக்கணக்கில் பயணிகள் பல படகுகளில் பயணிக்கும் சமயத்தில் இது போல ஏற்பாடுகள் அவசியம் தான்.

 பறவைகளுக்கும் உணவு!

நீங்கள் படகில் பயணிக்கும்போது உங்கள் அருகே வரும் படகொன்றில் ஒரே ஒரு படகோட்டி மட்டும் பார்க்கலாம். அவர் வேறு யாருமல்ல. தின்பண்டம் விற்பவர். கடலை மாவு கொண்டு செய்யப்பட்ட இந்த தின்பண்டம் நீங்கள் உண்ண அல்ல! பறவைகளுக்கு அளிக்க! ஐந்து ரூபாய், பத்து ரூபாய் என சிறிய பாக்கெட்டுகளும், நூறு ரூபாய் பாக்கெட்டுகளும் வைத்திருக்கிறார். நீங்கள் அவரிடமிருந்து வாங்கி கொஞ்சமாக எடுத்து அப்படியே காற்றிலே வீச, உங்களை நோக்கி நூற்றுக் கணக்கில் பறவைகள் அப்படியே பறந்து வந்து தண்ணீரில் அமர்ந்து, அவ்வுணவினை சாப்பிடும் அழகே அழகு.

பறவைக் கூட்டம்!

கோட்டையை நோக்கி முன்னேறுவோம். கோட்டை அக்பர் காலத்திய கோட்டை. இங்கே பல சேதங்கள் தற்போது ஏற்பட்டு இருக்கிறது. கோட்டையின் சுவர்களில் பல இடங்களில் மரங்கள் வளர்ந்து இருப்பதைப் பார்க்கலாம். கோட்டை பற்றிய விவரங்கள் எனது முந்தைய காசி-அலஹாபாத் பயணத் தொடரில் அக்பர் கட்டிய அலஹாபாத் கோட்டை எனும் கட்டுரையில் பகிர்ந்ததை உங்களுக்கு நினைவு படுத்துகிறேன்.

இடிபட்ட கோட்டைச் சுவர் – மீன்பிடிக்க ஏதுவாய்

கோட்டை கட்ட ஆரம்பிக்கும்போது பல தடங்கல்கள் ஏற்பட்டதாம். யமுனையின் கரையோரம் கட்டிய சுவர் இடிந்து விழுந்து கொண்டே இருக்க, என்ன செய்வதென்று புரியாது தவித்த போது அவர்களுக்கு கிடைத்த வழி ஒரு பலி! அதுவும் கஜராஜனைப் பலி கொடுக்க வேண்டும் என்ற வழி! அக்பரது யானைப் படையிலிருந்து ஒரு யானையைப் பலி கொடுத்து அதன் பின் கோட்டை கட்டுவதை தொடர்ந்தார்களாம்.

யானையை பலியிட்ட இடம்.

தலைகீழ் யானை வடிவினை பூஜிக்கும் பெண்மணி

அந்த யானையை பலி கொடுத்த இடத்தில் இப்போதும் ஒரு யானையின் உருவத்தினை கோட்டைச் சுவரில் பார்க்க முடிகிறது. சிவப்பு வண்ணம் பூசி யானையை தெய்வமாக வழிபடுகிறார்கள் பலர். சிலபயணிகள் படகில் சென்று அதற்கு அருகே இறங்கி பூஜை செய்வதைப் பார்க்க முடிந்தது. யானைப் பலி! அப்பா என்ன ஒரு கொடுமை. நினைக்கவே பரிதாபமாக இருந்தது எனக்கு. படகில் பயணிக்கும் போது அந்த யானைக்கு எவ்வளவு வலித்திருக்கும் என நினைத்தபடியே தான் பயணிக்க முடிந்தது!

என்ன நண்பர்களே, அந்த யானையின் மரணம் உங்களையும் பாதித்து இருக்குமென நம்புகிறேன். பயணக் கட்டுரையின் அடுத்த பகுதியில் உங்களைச் சந்திக்கும் வரை.....

நட்புடன்

வெங்கட்.

புது தில்லி.