காஃபி வித் கிட்டு-118 - ஒரு பெண் பல கணவர்கள் - தப்பில்ல - சாரு நிவேதிதா - கடலும் சூரியனும் - ஓட்ஸ் முட்டியா - கருப்பு ஆடு

அன்பின் நண்பர்களுக்கு, இனிய காலை வணக்கம். இந்த நாளில் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

நேற்று வெளியிட்ட Mesmerising Meghalaya பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

LUCK IS WHAT HAPPENS WHEN PREPARATION MEETS OPPORTUNITY.

******

இந்த வாரத்தின் செய்தி - ஒரு பெண் பல கணவர்கள்: 

படம்: நன்றி தினமலர்

ஜோஹனஸ்பர்க்: தென் ஆப்பிரிக்காவில், பெண்கள் ஒன்றுக்கும் மேற்பட்ட ஆண்களை திருமணம் செய்து கொள்ள அனுமதி அளிக்கும் திட்டத்துக்கு, பல்வேறு தரப்பிலும் எதிர்ப்பு வலுத்து உள்ளது.

உலக அளவில் மிக தாராளமான அரசியலமைப்பு சட்டங்கள் உடைய நாடாக தென் ஆப்பிரிக்கா உள்ளது. இங்கு ஓரின திருமணங்கள், ஒரு ஆண், பல பெண்களை திருமணம் செய்து கொள்வது ஆகியவற்றுக்கு சட்டப்பூர்வமாக அனுமதி அளிக்கப்பட்டுள்ளது. இந்நிலையில் திருமண விவகாரத்தில் பெண்களுக்கு சம உரிமை அளிக்கப்பட வேண்டும் என்ற கோரிக்கை, நீண்ட நாட்களாக முன்வைக்கப்பட்டு வருகிறது.

'ஒரு ஆண், பல பெண்களை திருமணம் செய்து கொள்ள சட்டம் அனுமதிப்பதை போல, ஒரு பெண், பல ஆண்களை மணக்க அனுமதிக்க வேண்டும்' என, பாலின உரிமை ஆர்வலர்கள் தரப்பில் அரசிடம் கோரிக்கை வைக்கப்பட்டது. இதையடுத்து திருமண சட்டத்தில் சீர்திருத்தம் செய்து, இதற்கு அனுமதி அளிக்க அரசு முடிவு செய்தது.

இந்த புதிய சட்டம் குறித்து அந்நாட்டு பார்லி.,யில் அறிக்கை தாக்கல் செய்யப்பட்டது. மேலும், இந்த புதிய சட்டம் குறித்து பல்வேறு தரப்பினரின் கருத்தை அரசு கேட்டது. இதற்கு, கடுமையான எதிர்ப்பு கிளம்பியுள்ளது.'இது ஆப்பிரிக்க கலாசாரத்தை அழித்துவிடும். பிறக்கும் குழந்தைகளின் எதிர்காலத்தை பாதிக்கும். ஆணின் இடத்தை பெண்ணுக்கு வழங்க முடியாது' என, பல்வேறு விதமான கருத்துக்கள் கூறப்பட்டு உள்ளன.

நன்றி:  தினமலர்

ஒரு ஆண் பல பெண்களை மணக்கலாம் என்ற சட்டம் சரியென்றால், ஒரு பெண் பல ஆண்களை மணக்கலாம் என்ற சட்டமும் சரியே!  உங்களுடைய கருத்துகளை பின்னூட்டத்தில் சொல்லலாமே!

******

இந்த வாரத்தின் பின்னோக்கிப் பார்க்கலாம் பதிவு - உங்க மேல தப்பில்ல:

2015-ஆம் ஆண்டு இதே நாளில் வெளியிட்ட பதிவு - ஃப்ரூட் சாலட் – 137 – மருமகள் மெச்சிய மாமியார் – வீட்டு சாப்பாடு - மெட்ரோ

பதிவிலிருந்து சில வரிகள் இங்கே! முழு பதிவினையும் படிக்க, மேலே உள்ள சுட்டியைச் சொடுக்கலாம்!

வாடகைக் கார் ஒன்றில் பயணிக்கும் போது ஏதோ கேட்பதற்காக ஓட்டுனரைத் தொட்டாராம் பயணி.  அவர் தொட்டவுடன், அலறிய ஓட்டுனர், தட்டுத்தடுமாறி, சாலையிலிருந்து விலகி நடை பாதையில் சென்று சாலை ஓரத்தில் இருக்கும் ஒரு கடையை கிட்டத்தட்ட மோதும் நிலைக்கு வந்து வண்டியை நிறுத்தினாராம்.

அடடா....  நான் சாதாரணமா தொட்டதுக்கே இப்படி ஆயிடுச்சே...  என்று பயணி, ஓட்டுனரிடம் மன்னிப்பு கேட்க.....  அப்போது அந்த ஓட்டுனர் சொன்னாராம்......

....

....

....

....

உங்க மேல தப்பு ஒண்ணும் இல்ல! நேத்து வரைக்கும் நான் ”சவ ஊர்தி” ஓட்டிட்டு இருந்தேன். இன்னிக்கு தான் பயணிகள் வாகனம் ஓட்டறேன்! பழைய நினைப்புல பயந்துட்டேன்! 

யோசிக்கும் போதே டெரரா இருக்குல்லே!

******

இந்த வாரத்தில் படித்தது  - சாரு நிவேதிதா: 

இதுவரை சாரு நிவேதிதா அவர்களது எழுத்துகளை வாசித்ததே இல்லை.  இதைச் சொல்வதில் வருத்தமும் இல்லை! பல எழுத்தாளர்களின் படைப்புகளை ஒரு அறிமுகம் இல்லாமல் வாசிக்க முடிவதில்லை. இவரையும் ஏனோ இது வரை வாசிக்கவில்லை.  முந்தைய காஃபி வித் கிட்டு பதிவொன்றில் சொன்னது போல சமீப மாதங்களாக Bynge App வழி சில கதைகளை, தொடர்களை படித்து வருகிறேன். அந்த செயலியில் சாரு அவர்களின் கட்டுரைகளும் இருப்பதாக அவ்வப்போது அறிவிப்புகள் வந்த வண்ணமே இருக்கும்.  அப்படி பல முறை வந்த பிறகு அவரது ”அ-காலம்” கட்டுரைகளில் இரண்டு அத்தியாயங்களைப் படித்தேன்.  அதில் மும்பை மற்றும் தில்லி குறித்து இப்படி எழுதி இருக்கிறார்…

“மும்பையும் தில்லியும் சபிக்கப்பட்ட நகரங்கள். இந்தியாவில் மனித ரத்தத்தை மிக அதிக அளவில் குடித்த நகரங்கள் இவை.”  

ஏன் அப்படி ஒரு எண்ணம் அவருக்கு என்பதையும் எழுதி இருக்கிறார்!  முழு கட்டுரை படிக்க நினைத்தால் செயலி வழி படிக்கலாம்! 

******

இந்த வாரத்தின் ரசித்த புகைப்படம்   - கடலும் சூரியனும்:

அழகழகாய் இயற்கைக் காட்சிகளை தனது வாட்ஸப் நிலைத் தகவலாக வைப்பார். தினம் தினம் நான்கு ஐந்து படங்களாவது இப்படி வைத்து விடுவது வழக்கம்.  அப்படி அவர் வைத்திருந்த நிலைத்தகவல் ஒன்று உங்கள் பார்வைக்கு.  படம் எடுத்தவருக்கு வாழ்த்துகள். ஃபோட்டோஷாப் செய்த படமாகவும் இருக்கலாம்! சொல்வதற்கில்லை!

******

இந்த வாரத்தின் உணவு   - ஓட்ஸ் முட்டியா (Oats Muthiya): 

இந்த வாரத்தின் உணவாக ஒரு ஸ்டார்ட்டர்! பொதுவாக வட இந்திய திருமணங்களில் இந்த ஸ்டாட்டர் விதம் விதமாக கொடுப்பதுண்டு. இப்போதைய தென்னிந்திய திருமணங்களிலும் இந்த வழக்கங்கள் வந்து விட்டன. என்றாலும் இங்கே இருக்கும் வகைகள் அங்கே இல்லை என்றே சொல்ல வேண்டும்! அப்படி ஒரு ஸ்டாட்டர் ஓட்ஸ் முட்டியா - ஆங்கிலத்தில் Oats Muthiya! எப்படிச் செய்வது என்று தெரிந்து கொள்ள விரும்பினால் - சமைத்துப் பார்க்க விரும்பினால் இந்தத் தளத்தின் வழி தெரிந்து கொண்டு சமைக்கலாம்! ருசிக்கலாம்! 

******

இந்த வாரத்தின் தகவல் - வித்தியாசமான பெயர் கொண்ட இரயில் நிலையம்/ஊர்: 

எனக்கு ஒரு பழக்கம் உண்டு. எந்தச் சமயத்தில் பயணம் செய்தாலும், அது இரயில் பயணமாக இருந்தாலும், சாலை வழி பயணமாக இருந்தாலும் சரி வழியில் வரும் சின்னச் சின்ன ஊர்களின் பெயர்களை பார்த்து அதில் வித்தியாசமான பெயர்கள் இருந்தால் அவற்றை சேமித்துக் கொள்வேன் - படமாகவோ இல்லை தகவலாகவோ! அப்படி வித்தியாசமான சில ஊர்களின் பெயர்கள், இரயில் நிலையங்களின் பெயர்கள் இணையத்திலும் கிடைக்கின்றன.  காலா பக்ரா என்று ஜலந்தர் மாவட்டத்தில் ஒரு ஊர் - அதாவது கருப்பு ஆடு!   அங்கே மனிதர்களுக்குள்ளும் கருப்பாடுகள் அதிகமோ? வித்தியாசமான பெயர்தானே! இன்னும் சில பெயர்கள் வேறு மொழிகளில் வேறு சங்கடமான அர்த்தம் தரக்கூடிய வார்த்தைகளாகவும் அமைந்து விடுகின்றன! 

******

நண்பர்களே, இந்த வாரத்தின் காஃபி வித் கிட்டு பதிவு குறித்த தங்கள் எண்ணங்களை பின்னூட்டம் வாயிலாக பகிர்ந்து கொள்ளுங்கள்.  நாளை வேறொரு பதிவுடன் உங்களைச் சந்திக்கும் வரை…

நட்புடன்

வெங்கட் நாகராஜ்

புது தில்லியிலிருந்து…