காஃபி வித் கிட்டு - 141 - தேரோடும் வீதியிலே - விலாசம் கவிதை - Gகாஜர் ஹல்வா - ஓவியம் - முகநூல் பக்கம் - வலைப்பூ - நிலைத்தகவல்

அன்பின் நண்பர்களுக்கு, இனிய காலை வணக்கம். இந்த நாளில் மீண்டும் ஒரு பதிவுடன் உங்கள் அனைவரையும் சந்திப்பதில் மகிழ்ச்சி.   

 

நேற்று வெளியிட்ட கதம்பம் பதிவை படித்து கருத்துகள் தெரிவித்த அனைத்து வலையுலக நண்பர்களுக்கும் மனம் நிறைந்த நன்றி.  இந்த நாளை நல்லதொரு வாசகத்துடன் தொடங்கலாம் வாருங்கள். 

 

COMPANY OF GOOD PEOPLE IS LIKE WALKING INTO A SHOP OF PERFUME. WHETHER YOU BUY THE PERFUME OR NOT, YOU ARE BOUND TO RECEIVE THE FRAGRANCE.

 

******

 

பழைய நினைப்புடா பேராண்டி: தேரோடும் வீதியிலே…

 

2014-ஆம் ஆண்டு இதே நாளில் வெளியிட்ட பதிவு - தேரோடும் வீதியிலே....

 

திருவரங்கத்தில் தேரோட்டம் குறித்த பதிவு ஒன்று வெளியிட்டிருந்தேன். அந்தப் பதிவிலிருந்து சில வரிகள் இங்கே! முழு பதிவினையும் படிக்க, மேலே உள்ள சுட்டியைச் சொடுக்கலாம்! 

 

இன்றைக்கு திருவரங்கம் நகரில் தைத் தேரோட்டம். காலை 06.00 மணிக்கே தேர் தெற்கு வாசல் ரங்கா ரங்கா கோபுரம் அருகிலிருந்து புறப்படும் என அறிவித்திருந்ததால் காலையிலேயே கவசகுண்டலத்தோடு [வேறென்ன, புகைப்படக்கருவி – அது தானே எனது கவச குண்டலம்!] வீட்டிலிருந்து புறப்பட்டேன். தேர் புறப்பாடு ஆவதற்கு முன்னரே அங்கு சென்றுவிட்டேன்.  தெற்கு உத்திர வீதியில் தேரோட்டம் பார்க்க எண்ணிலடங்கா பக்தர்கள் நின்று கொண்டிருக்க, தேரோட்டத்திற்கான ஏற்பாடுகள் நடந்து கொண்டிருந்தது.

 

காவல்துறையைச் சேர்ந்த நண்பர்கள் பலரும் மக்களை ஒழுங்குபடுத்திக் கொண்டிருந்தார்கள். பத்திரிக்கைதுறையிலிருந்து பலரும் வந்திருந்து புகைப்படங்களையும் காணொளிகளையும் எடுக்க ஏதுவாய் நின்று கொண்டிருந்தார்கள். வெளிநாட்டிலிருந்து பல பக்தர்கள் இந்தியாவின் பாரம்பரிய உடையில் காத்திருக்க, இந்தியர்களில் பலர் ஆங்கிலேயர்களின் உடையில் இருந்தார்கள்.

 

உத்திர வீதி முழுவதும் உள்ள வீடுகளில் இருப்பவர்கள் தங்களது வீட்டு வாசலில் பெரிய பெரிய கோலங்களை போட்டு தங்களது உற்சாகத்தினை வெளிப்படுத்தியிருந்தார்கள்.  பலர் வீடுகளில் தேர் கோலம் போடப்பட்டிருந்ததைப் பார்க்க முடிந்தது. முதலில் பாராயணக் கோஷ்டியும், அவர்கள் பின்னே கோவில் யானை ஆண்டாளும், அதையடுத்து கோவில் குதிரையும் வர அதன் பிற்கு தான் தேர் வரும்.

 

******

 

இந்த வாரத்தின் ரசித்த கவிதை - என் விலாசம்:

 

சொல்வனம் பக்கத்தில் படித்து ரசித்த கவிதை ஒன்று உங்கள் பார்வைக்கும் ரசனைக்கும்!

 

இன்று,

என் வீட்டின் மேலிருந்து

இலக்கத்தை அகற்றிவிட்டேன்

தெருவின் பெயரையும் சுத்தமாய் அழித்து விட்டேன்

உன்னை என்னிடம் அழைத்து வரக்கூடிய

பெயர்பலகைகளையும் வழிகாட்டிகளையும் நீக்கிவிட்டேன்.

இருந்தாலும், என்னை நீ கண்டுபிடித்தே தீரவேண்டுமெனில்

ஒவ்வொரு தெருவிலும் ஒவ்வொரு வீட்டிலுமுள்ள

ஒவ்வொரு கதவையும் தட்டு

ஒவ்வொரு நாட்டிலும்.

ஒரு சுதந்திரமான ஆன்மாவை எங்கு கண்டாலும்

என்னக் கண்டுவிட்டாயென அறிந்துகொள்.

இது ஒரு சாபம்

​இது ஒரு வரமும் கூட.​

 

-           அம்ருதா ப்ரீதம்

******

 

இந்த வாரத்தின் இனிப்பு - Gகாஜர் ஹல்வா:

 

குளிர்காலம் என்றாலே வடக்கில் இனிப்பான Gகாஜர் (கேரட்) கிடைக்க ஆரம்பித்து விடும் - அதுவும் விலை குறைவாக! இரண்டு ரூபாய்க்குக் கூட வாங்கி இருக்கிறேன். தற்போது 30 ரூபாயில் கிடைக்கிறது!  அதைப் போலவே CHசிக்குந்தர் (பீட்ரூட் ) கூட சுவையாகக் கிடைக்கும்.  இந்த இரண்டையும் ஹல்வா செய்து சுவைப்பது வழக்கம்.  ஒவ்வொரு வருடமும் குளிர்நாட்களில் இந்த ஹல்வா சாப்பிடாமல் இருந்ததில்லை.  இந்த வருடம் குளிர் நாட்கள் முடியப் போகிறது என்றாலும் சுவைக்கவில்லை என்பது நினைவுக்கு வந்தது.  ஒரு ஞாயிறில் பக்கத்தில் இருக்கும் பங்க்ளா ஸ்வீட்ஸ் கடை வழி சென்ற போது, அப்படியே ஒரு தொன்னை Gகாஜர் ஹல்வா சுவைத்தேன்.  நெய் சொட்டச் சொட்ட நிறைய உலர் பழங்கள் சேர்த்து Gகாஜர் ஹல்வா! நான் சுவைத்த ஹல்வாவின் படம் உங்களுக்காக!

 

******

 

இந்த வாரத்தின் ரசித்த ஓவியம் - Caricature :

 

தில்லியில் இருக்கும் ஒரு அலுவலக நண்பர் திறமைசாலி.  சமீப நாட்களில் அவர் தனது மற(றை)ந்திருந்த திறமையான ஓவியம் வரைவதை மீண்டும் தொடங்கி இருக்கிறார்.  அவ்வப்போது அவர் வரையும் பென்சில் ஓவியங்களை என்னுடன் பகிர்ந்து கொள்வார்.  அவரது அம்மா, அப்பா, மாமனார் என பலரையும் வரைந்ததோடு எனக்கும் அனுப்பி வைப்பார்.  பென்சில் கொண்டு வரைந்த Caricature படங்கள் மிகவும் சிறப்பாக இருந்தது. அவர் வரைந்து அனுப்பிய சில ஓவியங்கள் மேலே! நண்பர் எனது WhatsApp DP பார்த்து என்னையும் வரைந்து அனுப்பி வைத்தார்!  அந்தப் படமும் இங்கே இருக்கிறது.   

******

 

இந்த வாரத்தின் ரசித்த நிழற்படம் - விமலன் :

 

முகநூலில் நண்பர் விமலன் அவர்கள் வித்தியாசமான படங்கள் சேர்த்து அவரது எண்ணங்களை பகிர்ந்து கொள்வார்.  அவர் பகிர்ந்து கொள்ளும் அனைத்து படங்களுமே வித்தியாசமாக இருப்பதோடு அவரது எண்ணங்களும் கவிதை வடிவில், கதை வடிவில் என மிகவும் சிறப்பாக இருக்கும்.  அப்படிச் சமீபத்தில் பகிர்ந்து கொண்ட ஒரு நகரும் படம் (GIF) பார்ர்கும் போதே வித்தியாசமாகவும் இருந்தது.  நான் ரசித்த அந்த படம் இங்கே! 

 

******

 

இந்த வாரத்தின் ரசித்த வலைப்பூ - சோனமுத்தன் :

 

சமீபத்தில் தான் இந்த வலைப்பூ பற்றி தெரிய வந்தது.  அவரது பதிவுகள் சிலவற்றை படித்துப் பார்த்தேன்.  நிறைய எழுதுகிறார் என்றாலும் யாருடைய கருத்துரையும் பார்க்கவில்லை.  அவரது பதிவுகளில் ஒன்றுக்கான சுட்டி கீழே!  முடிந்தால் படித்துப் பாருங்களேன்.

 

"கோலமாவு கோகிலா". (sonamuthan.blogspot.com)

 

*****

 

இந்த வாரத்தின் ரசித்த WhatsApp நிலைத்தகவல் - ஏழ்மை

 

இந்த வாரத்தின் ரசித்த நிலைத்தகவல் ஒன்று உங்கள் பார்வைக்கு! இங்கே திறமை கொட்டிக் கிடக்கிறது என்பதையும் உணர்ந்து கொள்ள முடிகிறது.

 

*****

 

இந்த வாரத்தின் காஃபி வித் கிட்டு பதிவு குறித்த தங்களது எண்ணங்களை பின்னூட்டம் வாயிலாக சொல்லுங்களேன்.  மீண்டும் வேறொரு பதிவுடன் உங்கள் அனைவரையும் சந்திக்கும் வரை…

 

நட்புடன்

 

வெங்கட் நாகராஜ்

புது தில்லியிலிருந்து….